ءبىرجان سال اۋدانىندا شاعىن جانە ورتا بيزنەس سۋبەكتىلەرىنىڭ سانى 900-دەن استى. شامامان 3 مىڭعا ادام تۇراقتى جۇمىس ورىندارىمەن قامتىلىپ وتىر.
ءبىرجان سال اۋدانىندا وتكەن جىلى ونەركاسىپتىك ونىمدەردى ءوندىرۋ كولەمىنىڭ يندەكسى 127 پايىزدى قۇرادى. مۇنداي ناتيجە «سەمىزباي U», «وركەن-اتانسور», «كوكشە تسەمەنت» كاسىپورىندارىنداعى ۋران, تەمىر كەنى, تسەمەنت ءوندىرىسىنىڭ ارتۋىمەن تىكەلەي بايلانىستى. ال, اۋىل شارۋاشىلىعى سالاسىنداعى وندىرىلگەن ءونىم كولەمى 19 ميلليارد تەڭگەدەن استى. ۋاقىت تالابىنا ساي, اۋىلشارۋاشىلىعىنا ساندىق تەحنولوگيالاردى ەنگىزۋ جۇمىستارى جالعاسۋدا. اۋدان اكىمى ەرمەك نۇعىمانوۆتىڭ ايتۋىنا قاراعاندا, وتكەن جىلى 4 ميلليارد 297 ميلليون تەڭگە ينۆەستيتسيا تارتىلعان. سالىق جانە بيۋدجەتكە تۇسەتىن مىندەتتى تولەمدەر ءتۇسىمى – 108 پروتسەنتتى قۇراپ وتىر.
–اۋداندا 15 اۋىلدىق وكرۋگى بار. 14 جارىم مىڭ حالىق بار. بۇگىنگى كۇنى اۋداننىڭ ەكونوميكاسى تۇراقتى. اۋىل شارۋاشىلىعى دا, ءوندىرىس تە دامىپ كەلەدى. بىلتىر اۋداندا 20 ميلليارد 500 ميلليون تەڭگەنىڭ وندىرىستىك ءونىمى ءوندىرىلدى. سوڭعى ون جىلدىڭ كولەمىندە يندۋستريالدى باعدارلاما اياسىندا ءىرى جوبالار جۇزەگە استى,– اۋدان اكىمى ەرمەك نۇعىمانوۆ.
«ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسىنا اۋدان تۇرعىندارى بەلسەندى قاتىسۋدا. ءبىرىنشى باعىتى بويىنشا 94 ادام كاسىپتىك بىلىممەن قامتىلسا, ەكىنشى باعىتى بويىنشا 110 ادام «باستاۋ بيزنەس» جوباسىنا وقىپ شىققان. سونىمەن بىرگە, 39 ادام 149 ميلليون تەڭگە كولەمىندە شاعىن نەسيە الىپ, جەكە كاسىپتەرىن اشتى. اۋدان تۇرعىندارى شاعىن نەسيەنى كوبىنەسە مال شارۋاشىلىعىن دامىتۋعا الۋدا. سونىڭ ەسەبىنەن اۋداندا ءوزىن-ءوزى جۇمىسپەن قامتىعان تۇرعىنداردىڭ سانى كوبەيىپ, جۇمىسسىزدىق دەڭگەيى تومەندەگەن. قازىر اۋداندا تىركەلگەن جۇمىسسىزدار ۇلەسى 1,9 پروتسەنتتى قۇرايدى.
بايقال ءبايادىل,
«Egemen Qazaqstan»
اقمولا وبلىسى,
ءبىرجان سال اۋدانى