بۇگىن - دۇنيەجۇزىلىك قاتەرلى ىسىككە قارسى كۇرەس كۇنى

اكتسيانىڭ ماقساتى – حالىقتىڭ ونكولوگيالىق اۋرۋلاردىڭ الدىن الۋ جانە ەرتە انىقتاۋ تۋرالى حاباردار بولۋىن ارتتىرۋ, ءوز دەنساۋلىعىنا جاۋاپكەرشىلىكپەن قاراۋدى قالىپتاستىرۋ, قولجەتىمدى سكرينينگتىك تەكسەرۋلەر تۋرالى اقپاراتتاندىرۋ.

2019 جىلدىڭ 1-10 اقپانى ارالىعىندا قازاقستاندا #IAmAndIWill ۇرانىمەن كەڭ اۋقىمدى اقپاراتتىق-اعارتۋشىلىق اكتسيا وتۋدە.

وتكەن جىلى ۇكىمەت قاۋلىسىمەن 2018-2022 جىلدارعا ارنالعان ونكولوگيالىق اۋرۋلارمەن كۇرەس جونىندەگى كەشەندى جوسپار قابىلداندى.:

1. تاۋەكەل فاكتورلارىن باسقارۋ جانە الدىن الۋ

2. جوعارى ءتيىمدى ەرتە دياگنوستيكا

3. ونكولوگيالىق كومەك كورسەتۋدىڭ ينتەگراتسيالانعان مودەلىن ەنگىزۋ

4. كادرلىق الەۋەتتى جانە عىلىمدى دامىتۋ

جىل سايىن قازاقستاندا قاتەرلى ىسىكتىڭ 35 مىڭعا جۋىق جاڭا جاعدايى تىركەلەدى. بۇگىنگى تاڭدا ديسپانسەرلىك ەسەپتە 179 مىڭعا جۋىق قازاقستاندىق تۇر. جىلىنا ونكولوگيالىق اۋرۋلاردان شامامەن 15 مىڭ ادام قايتىس بولادى.

ونكولوگيالىق اۋرۋلاردىڭ ىشىندە 1 ورىندا – ءسۇت بەزى قاتەرلى ىسىگى (12,6%), 2 ورىندا – وكپە قاتەرلى ىسىگى (9,9%), 3 ورىندا – اسقازان قاتەرلى ىسىگى (7,4%), 4 ورىندا-جاتىر موينى جانە توق ىشەك قاتەرلى ىسىگى (4,7%) تۇر.

نەگىزگى فاكتىلەر

قاتەرلى ىسىك الەمدەگى ءولىمنىڭ ەكىنشى نەگىزگى سەبەبى, 2018 جىلى 9,6 ميلليون ءولىمنىڭ سەبەبى وسى اۋرۋدان بولعان. بۇكىل الەمدە التى ءولىمنىڭ بىرەۋى قاتەرلى ىسىكتەن بولادى.

وبىردان بولاتىن ءولىم-ءجىتىمنىڭ 70% تابىسى تومەن جانە ورتاشا ەلدەردە ورىن الادى.

قاتەرلى ىسىكتەن بولاتىن ءولىمنىڭ ۇشتەن بىرىنە 5 فاكتور اسەر ەتەدى: دەنە سالماعىنىڭ جوعارى يندەكسى, جەمىستەر مەن كوكونىستەردى از تۇتىنۋ, دەنە بەلسەندىلىگىنىڭ جوقتىعى, تەمەكى مەن الكوگولدى تۇتىنۋ.

تەمەكىنى پايدالانۋ قاتەرلى ىسىكتىڭ دامۋ قاۋپىنىڭ ەڭ ماڭىزدى فاكتورى جانە شامامەن قاتەرلى ىسىكتەن بولاتىن 22% ولىمگە سەبەپشى.

قاتەرلى ىسىكتىڭ ەكونوميكالىق سالدارى ايتارلىقتاي ءوستى. 2010 جىلى وبىردان بولاتىن جيىنتىق جىلدىق ەكونوميكالىق شىعىن 1,16 ترلن $ شاماسىندا باعالاندى. تومەن جانە ورتاشا تابىس دەڭگەيى بار بەس ەلدىڭ بىرەۋى عانا وبىرعا قارسى كۇرەس ساياساتىن جۇرگىزەدى.