استانا اكىمدىگىندە ەلوردا اكىمى باقىت سۇلتانوۆ پەن حالىقارالىق پاراليمپيالىق كوميتەتتىڭ پرەزيدەنتى ەندريۋ پارسونستىڭ كەزدەسۋى ءوتتى دەپ حابارلايدى قالالىق اكىمدىكتىڭ رەسمي سايتى.
كەزدەسۋ بارىسىندا باقىت سۇلتانوۆ ەلوردا اكىمدىگى مەن قر ۇلتتىق پاراليمپيالىق كوميتەتىنىڭ بىرلەسكەن كۇشىمەن استانادا مۇگەدەكتىگى بار جانداردىڭ سپورتپەن شۇعىلدانۋىنا مۇمكىندىك بەرەتىن زاماناۋي پاراليمپيالىق جاتتىعۋ ورتالىعىنىڭ اشىلعاندىعىن اتاپ ءوتتى.
«قازىرگى تاڭدا استانادا مۇمكىندىگى شەكتەۋلى جانداردى قولداۋعا باعىتتالعان باعدارلاما ىسكە اسىرىلىپ جاتىر. سونىمەن قاتار, پاراليمپيالىق سپورت – ءومىردىڭ قيىندىقتارىنا قاراماستان ادامنىڭ ەل دامۋىنا ءوزىنىڭ سۇبەلى ۇلەسىن قوسا الاتىندىعىن دالەلدەۋدىڭ ەڭ جارقىن ءتاسىلى. مۇمكىندىگى شەكتەۋلى جاندار قاتىساتىن حالىقارالىق جارىستاردا قازاقستاننىڭ تۋى بيىككە كوتەرىلگەندە بويدى بيلەيتىن ماقتانىشتان ارتىق سەزىم جوق شىعار», – دەدى باقىت سۇلتانوۆ.
ەندريۋ پارسونس مىرزا استانادا زاماناۋي كوپبەيىندى سپورت كەشەندەرىنىڭ جۇمىس ىستەيتىندىگىن تىلگە تيەك ەتتى. بۇدان بولەك, ول مەملەكەتتىك مەكەمەلەردىڭ قازاقستاندا پاراليمپيالىق سپورت تۇرلەرىنىڭ دامۋىنا قولداۋ كورسەتۋىن جوعارى باعالادى.
«مەن استاناداعى ءتۇرلى سپورتتىق ورتالىقتاردىڭ جۇمىسىنا, پاراليمپيالىق جاتتىعۋ ورتالىعىنىڭ جۇمىسىنا ءتانتى بولدىم. ءبىز بولعان سپورت كەشەندەرىندە مۇمكىندىگى شەكتەۋلى جانداردىڭ سپورتپەن شۇعىلدانۋى ءۇشىن بارلىق جاعداي جاسالعان. سونداي-اق, ءبىز ارنايى ءبىلىم بەرۋ باعدارلاماسى ىسكە اسىرىلىپ جاتقان № 83 مەكتەپكە دە بارىپ قايتتىق. ونىڭ ماقساتى – مۇمكىندىگى شەكتەۋلى ازاماتتارعا دەگەن قارىم-قاتىناستى وزگەرتۋ»,– دەدى حالىقارالىق پاراليمپيالىق كوميتەتتىڭ پرەزيدەنتى.
كەزدەسۋ قورىتىندىسى بويىنشا تاراپتار الداعى جازدا استانادا پاراپاۋەرليفتينگتەن وتەتىن الەم چەمپيوناتىن وتكىزۋ ماسەلەلەرىن تالقىلادى. سونداي-اق, الداعى ىنتىماقتاستىق ماسەلەلەرى قاراستىرىلدى.