ەلباسىنىڭ تاپسىرماسى بويىنشا «نۇر وتان» پارتياسىنىڭ ۇيىتقى بولۋىمەن العاش رەت وتكىزىلگەن « ۇلى دالا» رەسپۋبليكالىق شىعارماشىلىق بايقاۋى ءوز مارەسىنە جەتتى. سوعان وراي بۇگىن بايقاۋ جەڭىمپازدارى مەن جۇلدەگەرلەرى ماراپاتتالدى. سالتاناتتى ءىس-شاراعا پارتيا توراعاسىنىڭ ءبىرىنشى ورىنباسارى ماۋلەن اشىمباەۆ جانە بەلگىلى اقىن-جازۋشىلار مەن زيالى قاۋىم وكىلدەرى قاتىستى.
وتكەن جىلدىڭ سوڭىندا ەلباسىمىز « ۇلى دالانىڭ جەتى قىرى» اتتى ماقالاسىن جاريالاپ, «رۋحاني جاڭعىرۋ» باعدارلاماسىنا تىڭ سەرپىن بەرگەنى بەلگىلى. سوعان بايلانىستى ەلىمىز بويىنشا اۋقىمدى جۇمىستار قولعا الىنىپ, ناقتى جوبالار جۇزەگە اسىرىلا باستادى. « ۇلى دالا» شىعارماشىلىق بايقاۋى دا سونداي يگى ىستەردىڭ ءبىرى.
بارشا جەڭىمپازدار مەن جۇلدەگەرلەردى قۇتتىقتاعان ماۋلەن اشىمباەۆ الدىمەن ەلباسىنىڭ «رۋحاني جاڭعىرۋ» باعدارلاماسىنىڭ ماڭىزىنا توقتالىپ ءوتتى.
– ەلباسى «:بولاشاققا باعدار: رۋحاني جاڭعىرۋ» جانە « ۇلى دالانىڭ جەتى قىرى» اتتى باعدارلامالىق ماقالالارى ارقىلى ەلىمىزدىڭ يدەولوگيا سالاسىنداعى جاڭا كەزەڭدى باستاپ بەردى. ويتكەنى بۇل ماقالالاردا ۇلتتىق كودتى ساقتاپ, تاريحي سانامىزدى قالىپتاستىرۋعا, سول ارقىلى رۋحاني ءومىرىمىز بەن ۇلتتىق سانامىزدى جاڭعىرتۋعا باعىتتالعان ناقتى ماسەلەلەر كوتەرىلگەن. بۇگىنگىدەي اۋمالى-توكپەلى زاماندا ۇلت بولىپ ساقتالىپ, تاۋەلسىزدىگىمىزدى ماڭگىلىك ەتۋدىڭ قانشالىقتى ماڭىزدى ەكەنى بەلگىلى. سول جولدا وسى ماقالالاردا ايتىلعان باسىمدىقتاردىڭ بەرەرى مول. سوندىقتان ەلباسى كوتەرگەن قۇندىلىقتار مەن يدەيالاردى دارىپتەۋ, ەلىمىزدىڭ رۋحاني جاڭعىرۋىنا ۇلەس قوسۋ – ءبىزدىڭ باستى مىندەتىمىز, – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
سونىمەن قاتار ول وسى جۇمىستاردا قولىنا قالام ۇستاعان جانداردىڭ ءرولى ەرەكشە ەكەنىنە نازار اۋداردى.
– رۋحاني جاڭعىرۋ باعدارلاماسى اياسىندا جاستارمەن جۇيەلى جۇمىس جۇرگىزۋىمىز كەرەك. ول ءۇشىن جاس بۋىنعا قىزىقتى, ولارعا دۇرىس قۇندىلىقتاردى دارىپتەيتىن شىعارمالار قاجەت. سوندىقتان وسىنداي بايقاۋ جاريالاپ, وعان جاس قالامگەرلەردى قاتىستىرۋدى ۇيعاردىق. سول ارقىلى ءبىز جاس اقىن-جازۋشىلارىمىزدىڭ شىعارمالارىنىڭ ناسيحاتتالۋىنا, ولاردىڭ ادەبيەت الەمىندە وزىندىك ورنى بار كورنەكتى قالامگەر بولىپ قالىپتاسۋىنا سەپتىگىمىزدى تيگىزۋدى ماقسات ەتىپ وتىرمىز, – دەدى ماۋلەن اشىمباەۆ.
ودان بولەك, پارتيا توراعاسىنىڭ ءبىرىنشى ورىنباسارى جاس اقىن-جازۋشىلاردى قولداۋعا باعىتتالعان وسىنداي جوبالاردىڭ الداعى ۋاقىتتا دا ءوز جالعاسىن تاباتىنىن جەتكىزدى.
– پارتيامىز تەك وسى بايقاۋمەن شەكتەلىپ قالمايدى. الداعى ۋاقىتتا دا جاس قالامگەرلەردى ىنتالاندىرىپ, قولداۋ ماقساتىندا بىرقاتار جوبالاردى جۇزەگە اسىرامىز. سوندىقتان بۇگىن جۇلدەگەرلەر قاتارىنا ىلىگە الماي قالعان جاستاردى سول جوبالارعا بەلسەنە قاتىسۋعا شاقىرامىن. جالپى وسى بايقاۋعا قاتىسقان جۇمىستاردىڭ بارلىعى الداعى ۋاقىتتا حالىق اراسىندا كەڭىنەن تاراپ, وقىرمانداردىڭ وڭ باعاسىن الادى دەپ سەنەمىن, – دەدى ماۋلەن اشىمباەۆ.
پارتيا بۇل جوبانى قازاقستان جازۋشىلار وداعىمەن بىرلەسىپ ۇيىمداستىرىپ وتىر. تارقاتىپ ايتار بولساق, وتكەن جىلدىڭ قازان ايىندا «نۇر وتان» پارتياسى وتاندىق اقىن-جازۋشىلارعا جۇيەلى قولداۋ كورسەتۋ ءۇشىن جازۋشىلار وداعىمەن ءوزارا ىنتىماقتاستىق تۋرالى مەموراندۋمعا قوي قويعان ەدى. بۇگىنگى بايقاۋ سول يگىلىكتى ءىستىڭ ناقتى جەمىسى. سونداي-اق بۇل قادامنىڭ «جاستار جىلى» اياسىندا جاس قالامگەرلەرىمىزدىڭ شىعارماشىلىقپەن اينالىسۋىنا كورسەتىلگەن ۇلكەن قولداۋ ەكەنى دە ءسوزسىز.
جالپى بايقاۋعا 18 بەن 40 جاس ارالىعىنداعى قالامگەرلەر قاتىستى. شىعارمالاردى قابىلداۋ مەرزىمىنىڭ قىسقالىعىنا قاراماستان 400-دەن استام ەڭبەك كەلىپ تۇسكەن. ناتيجەسىندە بەس بىردەي اتالىم بويىنشا جەڭىمپازدار مەن جۇلدەگەرلەر انىقتالدى.
اتاپ ايتقاندا, «پروزا» اتالىمىندا «قۇدىق باسىنداعى ەكەۋ» شىعارماسىمەن قاتىسقان ماقسات مالىكوۆ ۇزدىك دەپ تانىلدى. ەكىنشى ورىن «مەدال» اتتى تۋىندىنىڭ اۆتورى قانات تىلەۋحانعا بۇيىردى. ال ۇزدىك ۇشتىكتى «كازاحستانەتس» شىعارماسىمەن تاتيانا كرەتوۆا تۇيىندەدى.
سول سياقتى «پوەزيا» اتالىمىندا جانات جاڭقاش ۇلى – 1-ورىن, نۇرگۇل ماۋلينا – 2-ورىن, باتىرحان سارسەنحان 3-ورىن الدى. ءۇش اقىننىڭ دا بايقاۋعا ولەڭدەر توپتاماسىن ۇسىنعانىن اتاپ وتكەن ءجون.
«دراماتۋرگيا, كوركەم فيلمدەر مەن تەلەسەريالدار ستسەناريى» اتالىمىندا تاياۋدا عانا «Qazaqstan» ۇلتتىق تەلەارناسىنان كورسەتىلىپ, كوپتىڭ كوزايىمىنا اينالعان «كەيكى مەرگەن» تەلەسەريالىنىڭ ستسەناريىن جازعان سەرجان زاكەر ۇلى توپ جاردى. ەكىنشى, ءۇشىنشى ورىنداردى تيىسىنشە «ايسۇلۋ» ءفيلمىنىڭ ستسەناريىمەن ايدوس دىلدەباي جانە «ابدىعاپپار» درامالىق تۋىندىسىنىڭ اۆتورى ابىلاي ماۋدانوۆ يەمدەندى.
«بالالارعا ارنالعان شىعارمالار» اتالىمىندا « ۇلى دالانىڭ جەتى قىرى» ولەڭدەر توپتاماسىنىڭ اۆتورى باۋىرجان قاراعىز ۇلى باس جۇلدەنى الدى. «ۇلتتىق مۋزەيگە ەكسكۋرسيا» شىعارماسىنىڭ اۆتورى اسىلان تىلەگەن ەكىنشى ورىنعا تابان تىرەسە, بايقاۋعا «جىلقى دەگەن جانۋار» ولەڭدەر توپتاماسىمەن قاتىسقان سەرىكبول حاسان ءۇشىنشى ورىننان كورىندى.
«پۋبليتسيستيكا» اتالىمىندا 1-ورىن – ماقپال جۇماشەۆاعا (شىعارماسى – «كوك ءبورى توتەمى»), 2-ورىن – قانات ابىلقايىرعا (شىعارماسى – «مۇزداۋان مۇزدىباي»), ال 3-ورىن گۇلبانۋ تەبەگەنوۆاعا (شىعارماسى – «رۋحاني جاڭعىرۋ – ۇشتىلدىلىك») بۇيىردى.
بارلىق جەڭىمپازدار مەن جۇلدەگەرلەرگە قوماقتى قارجىلاي سىياقىلار تاعايىندالدى سوعان وراي 1-ورىن يەگەرلەرىنە – 1,5 ملن, 2-ورىن يەگەرلەرىنە – 750 مىڭ, ال 3-ورىن العان قالامگەرلەرگە 500 مىڭ تەڭگەدەن بەرىلدى.
ايتا كەتەيىك, بايقاۋدىڭ قازىلار القاسىنىڭ قۇرامىندا تولەن ابدىك, الدان سمايىل, نەسىپبەك ايت ۇلى, ۇلىقبەك ەسداۋلەت, نۇرتورە ءجۇسىپ, جۇسىپبەك قورعاسبەك, كوپەن امىربەك جانە ءاليا بوپەجانوۆا سياقتى بەلگىلى قالامگەرلەر بولدى.
تاعى ءبىر اتاپ وتەر جايت, «نۇر وتان» پارتياسى جازۋشىلار وداعىمەن اراداعى مەموراندۋم اياسىندا باسقا دا بىرقاتار جوبانى جۇزەگە اسىرۋدا. ماسەلەن, «استانا» تەلەارناسى ارقىلى قالىڭ كورەرمەنگە جول تارتقان اقىن-جازۋشىلارىمىزدىڭ ونەگەلى ومىرىنەن سىر شەرتەتىن تەلەجوبا, پارتيالىق جوبا اياسىندا جاڭعىرتىلعان كىتاپحانالارداعى كوۆوركينگ-ورتالىقتاردا قالامگەرلەرمەن كەزدەسۋ كەشتەرى جانە كورەرمەندەرگە تاربيەلىك سيپاتتاعى كوركەم دۇنيەلەر ۇسىناتىن ارنايى YouTube-كانال اشۋ جوبالارى وسى باعىتتاعى جۇمىستاردىڭ جەمىسى.