قۇرلىقتىق حوككەي ليگاسىنىڭ (قحل) كەزەكتى تۋر ويىنىن ءوز مۇز ايدىنىندا وتكىزگەن «بارىس» سانكت-پەتەربۋرگتىڭ سكا كلۋبىنان 2:3 ەسەبىمەن ۇتىلىپ قالدى.
قحل-دىڭ تۇراقتى بىرىنشىلىگىندە كوش باستاپ تۇرعان كومانداعا قارسى ءبىزدىڭ حوككەيشىلەر وتە جاقسى وينادى. باسەكەنىڭ ەكىنشى مينۋتىندا اندرە پەتەرسسون گول سوعىپ, جەرگىلىكتى جانكۇيەرلەردى ءبىر جەلپىندىرىپ قويدى. الايدا ءبىرىنشى كەزەڭ اياقتالعانعا دەيىن قوناقتار ەكى شايبا سالىپ, العا شىقتى. بۇل گولداردىڭ اۆتورلارى – نايل ياكۋپوۆ پەن پاۆەل داتسيۋك. ۇزىلىستەن كەيىن نايل ياكۋپوۆ تاعى ءبىر گول سوقسا, 32 مينۋتتا داررەن ءديتستىڭ الىستان باعىتتاعان شايباسى قاقپا تورىنان تابىلدى. وكىنىشكە قاراي, ودان كەيىن ەسەپ وزگەرگەن جوق. وسىلايشا, جەرلەستەرىمىز ءوز ايدىنىندا سكا-عا ەسە جىبەردى. تاعى ءبىر ايتا كەتەرلىگى, وسى باسەكەنى تاماشالاۋ ءۇشىن «بارىس ارەنا» 10 420 جانكۇيەر جينالدى.
قازىرگى كەزدە قحل-تىڭ تۇراقتى بىرىنشىلىگىندە «بارىس» ءالى دە التىنشى ورىندا كەلەدى. 54 كەزدەسۋدەن كەيىن جەرلەستەرىمىز 75 ۇپاي جيدى. ەرتەڭ استانالىقتار فينليانديانىڭ «يوكەريتىن» قابىلدايدى. ودان كەيىن ۋفانىڭ «سالاۆات يۋلاەۆ» (4 اقپان, قوناقتا), ءنوۆوسىبىردىڭ "سيبير» (12 اقپان, ۇيدە), قىتايدىڭ «كۋنلۋن» (14 اقپان, ۇيدە), ومبىنىڭ «اۆانگارد» (16 اقپان, ۇيدە), ۆلاديۆوستوكتىڭ «ادميرال» (18 اقپان, قوناقتا), حاباروۆسكىنىڭ «امۋر» (20 اقپان, قوناقتا) جانە قىتايدىڭ «كۋنلۋن» (22 اقپان, قوناقتا) كلۋبتارىنا قارسى وينايدى.
عالىم سۇلەيمەن,
«Egemen Qazaqstan»