قازاقستان مۇسىلماندارىنىڭ باس ورداسىندا قمدب توراعاسىنىڭ ورىنباسارى, نايب ءمۇفتي ب.ەسماحاننىڭ توراعالىعىمەن ۇلتتىق ساراپتاۋ ورتالىعى ماماندارىنىڭ قاتىسۋىمەن حالال يندۋسترياسىن دامىتۋعا, لابوراتوريالىق جۇمىستاردى جانداندىرۋعا ارنالعان القالى ءماجىلىس ءوتتى. بۇل تۋرالى muftyat.kz حابارلادى.
رەسمي كەزدەسۋگە قمدب حالال ونىمدەرىن ستاندارتتاۋ ءبولىمىنىڭ مەڭگەرۋشىسى ب.مىرزاگەلديەۆ, «حالال دامۋ» جشس-نىڭ ديرەكتورى ا.ەلجانوۆ جانە قر دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ كوميتەتىنىڭ «ۇلتتىق ساراپتاما ورتالىعى» شجق رمك باس ديرەكتورى ك.و.بالىكباەۆ, ۇسو ەكسپەرتيزا بويىنشا ماماندارى: ۋ.ب.اشيرباەۆ, ن.ر.سالاماتوۆ, ۇسو ءباسپاسوز حاتشىسى ا.سۋراگانوۆا قاتىستى.
باسقوسۋدا ءمۇفتيات پەن ۇلتتىق ساراپتاما ورتالىعىنىڭ بىرلەسكەن جوبالارىن جۇزەگە اسىرۋ, ءوزارا تاجىريبە الماسۋ, ازىق-ت ۇلىك قاۋىپسىزدىگىن قامتاماسىز ەتۋ, حالال ونىمدەرگە لابوراتوريالىق ساراپتاما جۇرگىزۋدى ارتتىرۋ, وسى سالادا ءدىني باسقارما مەن ورتالىقتىڭ ورتاق قىزمەتىن جانداندىرۋ, ت.ب. ماسەلەلەر جان-جاقتى ءسوز بولدى.
تالاي جىلدار بويى الماتى قالاسىندا ورنالاسقان «Treegene» مولەكۋلالىق-گەنەتيكالىق زەرتحاناسى مەن «كازنيۆي» قازاق عىلىمي-زەرتتەۋ ۆەتەريناريا ينستيتۋتى زەرتحاناسىمەن تىعىز بايلانىستا جۇمىستار اتقارىپ كەلگەن «حالال دامۋ» جشس بۇگىن استانا قالاسىنداعى نەگىزگى ورتالىق اپپاراتىنان جانە 20 فيليالدان قۇرالاتىن قر دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ كوميتەتىنىڭ «ۇلتتىق ساراپتاما ورتالىعىمەن» ءوزارا ىنتىماقتاستىق تۋرالى كەلىسىمگە قول قويدى. بۇدان بىلاي «حالال دامۋ» جشس-نىڭ لابوراتوريالىق جۇمىستارى 14 وبلىستىق جانە الماتى جانە استانا قالالارى بويىنشا جۇرگىزىلەتىن بولادى.