الاشتىڭ رۋحاني استاناسى سانالاتىن سەمەي شاھارىندا «نۇر وتان» پارتياسىنىڭ ۇيىمداستىرۋىمەن «رۋحاني جاڭعىرۋ» باعدارلاماسى اياسىندا « ۇلى دالانىڭ كونە سارىندارى» اتتى ءداستۇرلى مۋزىكا فەستيۆالى ءوتتى.
بابالارىمىزدان قالعان باعلان ونەردى ۇلىقتاۋدى مۇرات ەتكەن شاراعا ارقا, التاي, جەتىسۋ, قاراتاۋ, سىر جانە باتىس مەكتەپتەرىنىڭ كورنەكتى وكىلدەرى – ەسىمى ەلگە كەڭىنەن تانىمال الماس الماتوۆ, ەرلان رىسقالي, جاكەن وماروۆ, شولپان ءدارجانوۆا, باتىرجان مىقتىباەۆ, گۇلميرا سارينا سەكىلدى ونەرپازدارمەن قاتار جەرگىلىكتى انشىلەر ءادىل تۇرعانباەۆ, بەرىك وماروۆ, گۇلدانا نوعايباەۆا قاتىسىپ, كورەرمەننىڭ كوڭىلىن ءبىر سەرپىلتتى. مۋزىكا فەستيۆالىنىڭ اشىلۋ سالتاناتىنا «نۇر وتان» پارتياسىنىڭ حاتشىسى قانىبەك جۇماشەۆ استانادان ارنايى كەلىپ, جىلى لەبىزىن جەتكىزىپ, « ۇلى دالانىڭ كونە سارىندارى» جوباسى ەلىمىزدىڭ 15 قالاسىندا ءوتىپ, قورىتىندىسى كيەلى جەتىسۋ جەرىندە - تالدىقورعان قالاسىندا شىعارىلاتىنىن ايتتى. جىرشى, تەرمەشى, كۇيشىلەر مەن ءداستۇرلى ءاننىڭ دۇلدۇلدەرىنىڭ باسىن قوسقان ونەر دۋمانىنىڭ ماقسات-مۇراتى قانداي, نەگە سەمەيدەن باستالدى؟ بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ءوزىنىڭ فەيسبۋك جەلىسىندەگى پاراقشاسىندا: «پارتيامىزدىڭ 20 جىلدىعىنا وراي وتكىزىلىپ وتىرعان بۇل اۋقىمدى شارانىڭ سەمەي جەرىنەن باستاۋ الۋى دا تەگىن ەمەس. ويتكەنى حاكىم اباي تۋىپ-وسكەن توپىراقتىڭ قازاق ونەرىندەگى الار ورنى ەرەكشە. ەلباسى ءوزىنىڭ « ۇلى دالانىڭ جەتى قىرى» اتتى ماقالاسىندا تاريحي سانانى جاڭعىرتۋدىڭ ءتيىمدى تەتىكتەرىن اتاي كەلىپ, بۇل ىستە دالا فولكلورى مەن مۋزىكاسىنىڭ دا الار ورنى ەرەكشە ەكەنىنە نازار اۋدارعان بولاتىن. وسى تۇرعىدان كەلگەندە, قازاقتىڭ ءان, كۇي, جىر, تەرمە سياقتى اسىل قۇندىلىقتارىن كەڭىنەن دارىپتەيتىن فەستيۆالدىڭ بەرەرى مول دەپ ەسەپتەيمىز. سونىمەن قاتار وسى فەستيۆال ارقىلى وسكەلەڭ ۇرپاققا رۋحاني ءتالىم بەرىپ, جاستارىمىزدىڭ بويىندا پاتريوتتىق رۋح قالىپتاستىرۋدى دا كوزدەپ وتىرمىز. ويتكەنى, ۇلتتىق قۇندىلىقتاردان ءنار الىپ وسكەن ۇرپاقتىڭ وسالى بولمايدى. كەشەگى «تاۋەلسىزدىكتىڭ ۇرپاقتارى» اتتى فورۋمدا ەلباسى ايتقان پاتريوتتىق تاربيەنىڭ ءبىر ۇستىنى وسىنداي ۇلى مۇرالارىمىزعا دا تابان تىرەيتىنى ءسوزسىز. سوندىقتان جارتى جىلعا جالعاساتىن جاڭا جوبا ارقىلى ەلىمىزدىڭ بارلىق ءوڭىرىن قامتۋدى جوسپارلاپ وتىرمىز. سوعان بايلانىستى اتالعان فەستيۆال الداعى اقپان ايىندا پاۆلودار مەن سولتۇستىك قازاقستان وبلىستارىندا ۇيىمداستىرىلماق» دەپ جازعان بولاتىن.
جوبا پروديۋسسەرى بازاربەك اتىعايمەن پىكىرلەسكەنىمىزدە سەمەيدەگى كونتسەرت جوعارى دەڭگەيدە وتكەنىن جەتكىزدى. «كەشتى حالىق وتە كەرەمەت قابىلدادى. جاكەن وماروۆ قاراتاۋدىڭ, سىر بويىنىڭ مايلىقوجا, ق ۇلىنشاق, مادەلىقوجا سەكىلدى جىرشى-تەرمەشىلەرىنىڭ رۋحاني-ادامگەرشىلىكتى ناسيحاتتايتىن تەرمەلەرىن ورىندادى. كومەيمەن جىر ايتۋ مەكتەبىنىڭ ۇزدىك وكىلى الماس الماتوۆ شارانى لەكتسيا-كونتسەرت فورماتىندا جۇرگىزىپ وتىردى. قۇرمانعازى, دينا, داۋلەتكەرەي, سەيتەك باستاعان باتىس كۇيشىلىك مەكتەبىنىڭ وكىلى باتىرجان مىقتىباەۆ, جامبىل, ءسۇيىنبايدان باستاۋ الىپ, كەنەنگە جالعاسقان جەتىسۋ انشىلىك-جىرشىلىق مەكتەبىنىڭ وكىلى شولپان ءدارجانوۆا مەن التاي-ارقا مەكتەبىنىڭ وكىلى ەرلان رىسقالي ءبىر جارىم ساعات بويى كورەرمەندەرگە ەستەن كەتپەس ەرەكشە كەش سىيلادى. بارلىق مەكتەپتەردى قامتۋعا تىرىستىق. جەرگىلىكتى انشىلەردى دە قوستىق. جالپى, مۇنداي جوبا كەيبىر وبلىستاردا كوپتەن بەرى قولعا الىنباعان ەكەن. ماسەلەن, سولتۇستىكتە سوڭعى 10 جىل مۇعدارىندا وتپەپتى. سەمەي حالقى قاتتى ريزا بولدى. جاكەن وماروۆ پەن شولپان ءدارجانوۆا, باسقا دا ونەرپازدار سەمەيدىڭ حالقىنا ريزا بولدى. «زيالى, تالعامى بيىك اۋديتوريا ەكەن» دەپ باعالارىن بەرىپ جاتىر», - دەيدى ول.
ال ءداستۇرلى ءانشى ەرلان رىسقالي ءداستۇرلى مۋزىكا فەستيۆالى كورەرمەننىڭ عانا ەمەس, ۇلتتىق ونەردى ۇلىقتاپ جۇرگەن ونەرپازداردىڭ ەڭسەسىن كوتەرىپ تاستاعانىن تىلگە تيەك ەتتى. «ەلىمىزدىڭ باس پارتياسى - "نۇر وتاننىڭ" ۇلتتىق ونەردى ۇلىقتاپ جاتقانى قۋانتادى. سەمەيدە كونتسەرت كورۋگە كەلگەن ەلدە ەسەپ جوق. زال لىق تولى بولدى. حالىق سۋساپ قالىپتى. ءوز ونەرىن ابدەن ساعىنعان ەكەن. ءاربىر ونەرپازعا دەگەن ىقىلاس-قۇرمەتى ءتىپتى ەرەكشە بولدى. تەكتى اتانىڭ ۇرپاعى تەكتى ونەرىمەن قاۋىشتى. تەكتى ونەر تۇعىرىنان تۇسپەسىن», - دەيدى ءانشى.
ازامات قاسىم,
«Egemen Qazaqstan»
سەمەي