«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ جاستار جىلىنىڭ اشىلۋىنا قاتىستى پىكىر ءبىلدىردى.
«جاستار جىلى» ارقىلى ەلىمىزدە العاش رەت جاستارعا جۇيەلى تۇردە قولداۋ كورسەتۋدىڭ كەشەندى شارالارى قابىلدانىپ وتىر. وسىلايشا, ەلباسىمىز ۇزاقمەرزىمدى ماقساتتارىمىزعا قول جەتكىزۋدىڭ جاڭا مۇمكىندىكتەرىن كورسەتىپ بەردى. سوندىقتان قازاقستان جاستارعا ۇلكەن سەنىم ارتا وتىرىپ, دامۋدىڭ كەلەسى جاڭا كەزەڭىنە قادام باستى دەۋگە ابدەن بولادى», دەدى م.اشىمباەۆ.
سونىمەن قاتار سالتاناتتى ءىس-شارانىڭ «نۇر الەم» بولاشاقتىڭ ەنەرگياسى ەكسپو-مۋزەيىندە ءوتۋىنىڭ سەبەبىنە توقتالدى. م.اشىمباەۆتىڭ ايتۋىنشا, تاۋەلسىز قازاقستاندا تۋىپ-وسكەن, «بولاشاق» باعدارلاماسى ارقىلى الەمنىڭ ەڭ وزىق جوعارى وقۋ ورىندارىندا ءبىلىم العان, ساناسى اشىق, تىڭ يدەيالارعا باي ءبىزدىڭ بۇگىنگى جاستارىمىز – ەلىمىز ءۇشىن ناعىز بولاشاقتىڭ ەنەرگياسى. بۇل – تاۋەلسىزدىك ۇرپاقتارىنىڭ ەل دامۋىنا ناقتى ۇلەس قوسىپ, قازاقستاندى جاڭا بيىكتەرگە باستايتىن كەز كەلگەنىن بىلدىرەدى.
«جالپى قازاق ەجەلدەن جاستاردىڭ كۇش-قۋاتى مەن الەۋەتىنە ەرەكشە ءمان بەرىپ, قاشاندا وسكەلەڭ ۇرپاققا ۇلكەن سەنىم ارتقان حالىق. وعان اتا-بابامىزدان قالعان «اقىل – جاستان», «جاس كەلسە ىسكە» دەگەن سياقتى قاناتتى سوزدەر دالەل. وسى تۇرعىدان كەلگەندە, بيىلعى «جاستار جىلىنىڭ» ماڭىزى زور.
سونىمەن قاتار قازىرگى تاڭدا بۇكىل الەمنىڭ كۇردەلى وزگەرىستەردى باستان كەشىرىپ جاتقانىن دا كورىپ وتىرمىز. دۇنيە جۇزىندە تسيفرلى قوعام مەن ءبىلىم ەكونوميكاسىنا نەگىزدەلگەن جاڭا جاھاندىق وركەنيەت بەلەڭ الىپ كەلەدى. سول ۇردىستەرگە ساي بولۋىمىز ءۇشىن دە جاستارعا جاعداي جاساۋدىڭ بەرەرى مول», دەدى م.اشىمباەۆ.
بۇدان كەيىن «نۇر وتان» پارتياسى توراعاسىنىڭ ءبىرىنشى ورىنباسارى جاستار جىلىندا ناۋقانشىلىققا بوي الدىرماي, ناقتى ىستەرگە جول بەرۋ قاجەتتىگىنە نازار اۋداردى.
«ەلباسى اتقارار جۇمىستارىمىزدىڭ باعىت-باعدارىن باعامداپ بەردى. اتاپ ايتقاندا, ەلباسى قازاقستاندىق جۇمىسشى جاستاردىڭ باسپانالى بولۋىن قامتاماسىز ەتۋ ءۇشىن ەلىمىزدىڭ ءۇش مەگاپوليسىندە جالدامالى باسپانا ارقىلى بەرىلەتىن تۇرعىن ۇيلەر سالۋدى تاپسىردى.
ودان بولەك, جاستاردى جۇمىسپەن قامتۋ ماسەلەسىندە دە جاڭا باستامالار قولعا الىنباق. سونىڭ ىشىندە جاستاردىڭ كاسىپكەرلىكپەن اينالىسۋىنا قولداۋ كورسەتەتىن «جاس كاسىپكەر» جوباسىن ايرىقشا اتاپ وتكەن ءجون. «ديپلوممەن – اۋىلعا» باعدارلاماسىنا ەنگىزىلەتىن ماماندىقتار ءتىزىمىنىڭ كەڭەيۋى مەن تولەنەتىن جاردەماقىنىڭ كوبەيۋى دە اۋىل جاستارىنا كورسەتىلگەن ۇلكەن قولداۋ ەكەنى ءسوزسىز», دەدى م.اشىمباەۆ.
سونداي-اق ەلباسى جاستاردىڭ ساپالى ءبىلىم الۋىن قامتاماسىز ەتۋگە دە ەرەكشە كوڭىل بولگەنىن اتاپ ءوتىپ, جاس عالىمدارعا بەرىلەتىن گرانتتاردى كوبەيتۋ, قاشىقتىقتان وقىتۋ, جاستاردىڭ دۇرىس ماماندىق تاڭداۋىنا ىقپال ەتەتىن «جاس مامان» جوباسىن جۇزەگە اسىرۋ, قوعامنىڭ دامۋىنا ءوز ۇلەسىن قوسىپ جۇرگەن ەرىكتى ستۋدەنتتەردىڭ ستيپەندياسىن ءوسىرۋ سياقتى ناقتى تاپسىرمالار قازاقستان جاستارىنا بەرىلىپ وتىرعان مول مۇمكىندىك ەكەنىن جەتكىزدى.
«مەملەكەت باسشىسى قورشاعان ورتانى قورعاۋ جانە ەلىمىزدىڭ ەكوجۇيەسى مەن ءتۋريزمدى دامىتۋ ماسەلەسىندەگى جاستاردىڭ ءرولىن دە نازاردان تىس قالدىرمادى. ولاردىڭ اسكەري-پاتريوتتىق تاربيەسى مەن وتباسىلىق قۇندىلىقتاردىڭ ساقتالۋى دا ەلباسى توقتالعان وزەكتى ماسەلەلەردىڭ ءبىرى بولدى. مۇنىڭ بارلىعى الەمدە بولىپ جاتقان ۇردىستەر مەن وزگەرىستەردەن تۋىنداپ وتىرعان قاجەتتىلىكتەر. ويتكەنى ءدال قازىرگى كەزەڭدە تاۋەلسىزدىكتىڭ تۇعىرىن نىعايتىپ, ەلىمىزدىڭ باسەكەگە قابىلەتتىلىگىن ارتتىرۋدىڭ بىردەن ءبىر جولى جاستاردىڭ الەۋەتىن ءتيىمدى پايدالانۋ جانە ولارعا لايىقتى جاعداي جاساۋ. سوندىقتان ەلباسى ايتقان تىڭ باستامالار ەلدىگىمىزدىڭ ىرگەسىن ودان ءارى بەكىتىپ, تاۋەلسىزدىگىمىزدى كۇشەيتۋ جولىنداعى يگى ىستەرگە تىڭ سەرپىن بەرەدى دەپ سەنەمىز.
مەملەكەت باسشىسى وسى ىستەردىڭ ساپالى ءارى ۋاقىتىلى ورىندالۋىن «نۇر وتان» پارتياسىنا تاپسىرىپ, بارشا نۇروتاندىقتار مەن پارتيامىزدىڭ «جاس وتان» جاستار قاناتىنا ۇلكەن سەنىم ارتىپ وتىر. سوندىقتان ءبىز مەملەكەت باسشىسىنىڭ «جاستار جىلىنا» قاتىستى بارلىق تاپسىرمالارىنىڭ ساپالى ورىندالۋىن قامتاماسىز ەتىپ, ەلدىك مۇددە جولىنداعى يگىلىكتى ىسكە ءوز ۇلەسىمىزدى قوساتىن بولامىز», دەدى م.اشىمباەۆ.