قازاقستان پرەزيدەنتى ءىس-شارا الدىندا جاستاردىڭ كيىمدەر, سپورتشىلارعا ارنالعان تاعامدار ءوندىرىسى مەن ينتەراكتيۆتى قىزمەت كورسەتۋ پلاتفورمالارىن قۇرۋ جونىندەگى بىرقاتار جوبامەن تانىسىپ, ۇكىمەتكە بۇل باستامالاردى جۇزەگە اسىرۋدى جانە ىلگەرىلەتۋدى ەرەكشە باقىلاۋعا الۋدى تاپسىردى.
مەملەكەت باسشىسى جيىنعا قاتىسۋشىلاردى جاستار جىلىنىڭ اشىلۋىمەن قۇتتىقتاپ, بۇل شارانىڭ كەلەشەك ۇرپاق ءۇشىن ماڭىزى زور ەكەنىن اتاپ ءوتتى.
– جاستار – ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى. قازاقستاننىڭ بولاشاعى سىزدەرگە – سىزدەردىڭ بىلىمدەرىڭىزگە, كۇش-جىگەرلەرىڭىز بەن پاتريوتتىق سەزىمدەرىڭىزگە بايلانىستى. قازىر قولعا الىنعان جۇمىستاردىڭ ءبارى سىزدەردىڭ باقىتتى ومىرلەرىڭىز, سونداي-اق ءوز الەۋەتتەرىڭىز بەن مۇمكىندىكتەرىڭىزدى تولىق جۇزەگە اسىرا الۋ ءۇشىن اتقارىلىپ جاتىر, – دەدى نۇرسۇلتان نازارباەۆ.
قازاقستان پرەزيدەنتى ءىرى قالالارداعى جاس وتباسىلاردىڭ تۇرعىن ءۇي پروبلەمالارىنىڭ وزەكتىلىگىن اتاپ ءوتىپ, بۇل ماسەلەنى شەشۋ ءۇشىن تۇراقتى كىرىس بولۋ كەرەكتىگىن, سونداي-اق, ادامنىڭ جاقسى تۇرمىسىنىڭ نەگىزگى كوزى – جۇمىس ەكەنىن ايتتى.
– وتكەن جىلى قازاقستاندا ورتا مەكتەپتى 125 مىڭنان استام جاس تۇلەك ءبىتىرىپ شىقتى. كەلەشەكتە ەڭبەك نارىعىنا شىعاتىن جاستاردىڭ سانى ارتا تۇسپەك. قازىرگى ۋاقىتتا ەلىمىزدە 300 مىڭعا جۋىق ادام نەمەسە جاستاردىڭ 9 پايىزى وقۋعا جانە ەڭبەككە تارتىلماعان. بۇل ساناتقا جاتاتىن جاستاردىڭ سانىن ازايتۋعا سەپتىگىن تيگىزەتىن ءتيىمدى شارالار قابىلداۋ قاجەت, – دەدى مەملەكەت باسشىسى.
نۇرسۇلتان نازارباەۆ تەحنيكالىق جانە كاسىبي ءبىلىم بەرۋ جۇيەسىن ساپالى دامىتۋدىڭ نەگىزگى باسىمدىقتارىنا ارنايى توقتالدى.
– «100/200» قاعيداتى نەگىزىندە «جاس مامان» باعدارلاماسىن ازىرلەۋ قاجەت. ءۇش جىل ىشىندە بۇل جوبا ەلىمىزدىڭ بارلىق ءوڭىرى بويىنشا 200 مىڭعا جۋىق جاس ازاماتتى قامتيتىن بولادى. وسى جوبا اياسىندا جاڭعىرتىلعان 200 وقۋ ورنىنىڭ بازاسىندا سۇرانىسقا يە 100 يندۋستريالىق جانە قىزمەت كورسەتۋ ماماندىقتارى بويىنشا كادر دايارلاۋ ىسكە اسىرىلادى, – دەدى قازاقستان پرەزيدەنتى.
سوڭىندا مەملەكەت باسشىسى ۇكىمەت پەن جەرگىلىكتى اتقارۋشى ورگاندارعا ارنايى جول كارتاسىن ازىرلەۋدى تاپسىردى. بۇل جاس قازاقستاندىقتاردى قولجەتىمدى ءارى ساپالى ءبىلىم, جۇمىس, تۇرعىن ءۇي جانە وتباسىن قۇرۋ جونىندەگى ماڭىزدى قاجەتتىلىكتەرمەن قامتاماسىز ەتۋدى كوزدەيتىن ناقتى قولداۋ شارالارىن قامتۋعا ءتيىس.
ەلباسىنىڭ سويلەگەن ءسوزىنىڭ تولىق ءماتىنىن مىنا جەردەن وقي الاسىزدار.