2019 جىل الەم سپورتشىلارى ءۇشىن قاربالاسقا تولى بولماق. ويتكەنى, وسى ماۋسىمدا توكيو وليمپياداسىنىڭ جولدامالارى ءۇشىن تالاس باستالادى. وليمپيادالىق سپورت تۇرلەرىنىڭ وكىلدەرى ءتۇرلى وقۋ-جاتتىعۋ جيىندارىن باستاپ كەتتى. ءبارىنىڭ ماقساتى جالعىز – تورتجىلدىق دوداسىنان سىرت قالماۋ. وتاندىق سپورتشىلاردىڭ رەيتينگىلىك تۋرنيرلەردەگى مۇمكىندىگى مەن ىرىكتەۋ سىندارىنداعى الەۋەتى تۋرالى ماقالاسىن Olympic.kz جاريالادى.
سپورتتىق گيمناستيكانىڭ قازاقستانداعى تاريحى ارىدە جاتىر. ءبىزدىڭ ەلدە تۋىپ-ءوسىپ, وليمپيادادا توپ جارعان ۆالەري ليۋكين, نەللي كيم سىندى داڭقتى سپورتشىلاردى جانكۇيەر ۇمىتا قويعان جوق. دەسە دە, بۇل جەڭىستى ءداستۇردىڭ ەلىمىز تاۋەلسىزدىك العان سوڭ اقساپ قالعانى راس.
قازاقستان ەگەمەندىك العالى بەرى سپورتتىق گيمناستيكاداعى ەل ابىرويىن ساناۋلى سپورتشىلار قورعادى. وليمپيادا ويىندارىنا قاتىسقاندار قاتارىندا ەرنار ەرىمبەتوۆ پەن ستەپان گورباچەۆتار بار. بۇگىندە باپكەرلىك قىزمەتكە كوشكەن ەرىمبەتوۆتىڭ ءىزباسارلارى جوق ەمەس. اسىرەسە, وتكەن جىلعى الەم چەمپيوناتىنان سوڭ سپورتتىڭ بۇل تۇرىنەن دە جۇلدەگە ءۇمىتتى ەكەنىمىزگە كوز جەتكىزگەندەي بولدىق.
2018 جىلى كاتار استاناسى دوحادا وتكەن الەم چەمپيوناتى ءبىز ءۇشىن ەكى ماڭىزدى وقيعامەن ەستە قالدى.
بىرىنشىدەن, قازاقستاندىق گيمناستار كوماندالىق تۋرنيردە سىنعا ءتۇسىپ, 16-شى ورىن يەلەندى. بۇل توكيو وليمپياداسىنا جولداما تاراتاتىن باستى جارىس – شتۋتگارتتاعى الەم چەمپيوناتىنا قاتىسۋ مۇمكىندىگىن بەرەدى.
ەكىنشىدەن, ات سناريادىنداعى جاتتىعۋدا باق سىناعان ناريمان كۋربانوۆ ىرىكتەۋ كەزەڭىن ەكىنشى ورىندا اياقتاپ, فينالدا بەسىنشى ساتىعا تۇراقتادى. بۇل سوڭعى جىلدارى قازاقستان گيمناستارى كورسەتكەن ەڭ ۇزدىك ناتيجە ەكەنى ءسوزسىز.
2019 جىلى گيمناستاردى قانداي دودا كۇتىپ تۇر؟ توكيو وليمپياداسىنا جولداما الۋ مۇمكىندىگى كىمدەردە باسىم؟ وسى سۇراقتارعا جاۋاپ ىزدەپ كورەلىك.
2020 جىلعى جازعى وليمپيادا ويىندارىنا ىرىكتەۋ جارىسىنا رەتىندە الەم كۋبوگى كەزەڭدەرى تاڭداپ الىنعان. ناقتىلاي تۇسەتىن بولساق, گەرمانيانىڭ كوتبۋس (2018, 2019), اۆستراليانىڭ مەلبۋرن (2019,2020), ءازىربايجاننىڭ باكۋ (2019), كاتاردىڭ دوحا (2019,2020) قالالارىندا سپورتتىق گيمناستيكادان الەم كۋبوگى كەزەڭدەرى وتەدى.
العاشقى ليتسەنزيالىق تۋرنير بىلتىرعى جىلدىڭ اياق تۇسىندا كوتبۋستا ءوتىپ, قازاقستاندىق ميلاد كاريمي قول تىرەپ سەكىرۋدەن ۇزدىك بەستىككە ەندى. بۇل ميلادتىڭ وليمپياداعا اپارار جولداعى تىرناقالدى تابىستارىنىڭ ءبىرى.
سپورتتىق گيمناستيكادان 2019 جىلدىڭ العاشقى رەسمي جارىسى اۆستراليادا ۇيىمداستىرىلادى. 12-18 ناۋرىز ارالىعىندا مەلبۋرندە وتەتىن الەم كۋبوگى كەزەڭىندە ناريمان كۋربانوۆ پەن ميلاد كاريميدىڭ جۇلدەگە تالاسۋ مۇمكىندىگى بار. ليتسەنزياعا قول جەتكىزۋ ءۇشىن ولارعا مىندەتتى تۇردە جۇلدەلى ورىننان كورىنۋ قاجەت.
وليمپيادا ويىندارىنا دەيىن جالپى ەسەبى 8 الەم كۋبوگى كەزەڭى وتەتىنىن ەستەرىڭىزگە سالامىز.
الەم كۋبوگى كەزەڭدەرىنەن بولەك, وليمپيادا جولداماسى ازيا چەمپيوناتتارىندا دا ساراپقا سالىنادى. 2019 جىلدىڭ مامىر ايىندا موڭعوليانىڭ ۇلان-باتىر قالاسىندا, 2020 جىلى توكيودا وتەتىن سارى قۇرلىق دوداسى دا ليتسەنزيالىق تۋرنيرلەر ساناتىندا. ازيا چەمپيوناتىنىڭ قورىتىندىسى بويىنشا, كوپسايىستان 1-8 ورىنعا ەنگەن سپورتشىلاردىڭ وليمپياداعا قاتىسۋ مۇمكىندىگى زور. وسى ورايدا, ميلاد كاريميدەن ۇلكەن ءۇمىت كۇتەمىز.
قازاقستاننىڭ كوماندالىق ەسەپتە 2020 جىلعى وليمپيادا ويىندارىنا قاتىسۋى تۋرالى ماسەلە گەرمانيادا وتەتىن الەم چەمپيوناتىندا تۇبەگەيلى انىقتالادى. 4-13 قازان ارالىعىندا شتۋتگاردتا جالاۋى جەلبىرەيتىن دودا الەم ۇزدىكتەرىنىڭ باسىن قوسپاق. كوماندالىق سىندا توكيو وليمپياداسىنا جولداما الۋ ءۇشىن ءبىزدىڭ كومانداعا 4-12 ورىن العاندار قاتارىنا ەنۋ كەرەك.
ەسكە سالا كەتەيىك, كاتارداعى الەم چەمپيوناتىندا كوماندالىق ەسەپتە قازاقستان ءنامىسىن ىلياس ازيزوۆ, ەربول جانتىقوۆ, ميلاد كاريمي, اكيم مۋساەۆ جانە ناريمان كۋربانوۆ قورعادى.
التى جاتتىعۋ قورىتىندىسى بويىنشا قازاقستان كومانداسى جالپى ەسەبى 239.291 ۇپاي جينادى. قۇراما سپورتشىلارى قول تىرەپ سەكىرۋدەن ەڭ جوعارى ۇپاي الدى – 41.532.
«دوحاداعى الەم چەمپيوناتىنا 67 مەملەكەتتەن 293 گيمناست قاتىستى. ونىڭ ىشىندە 46 ەلدىڭ وكىلدەرى تولىق قۇراممەن كەلگەن. الەمدىك دودا 2020 جىلعى وليمپيادا ويىندارىنا العاشقى جولدامالاردى تاراتتى. كوماندالىق باسەكەدە العاشقى ءۇش ورىندى يەمدەنگەن كوماندالار تىكەلەي توكيو ليتسەنزياسىنا يە بولدى. ال 4-24 ورىنداعى كوماندالار 2019 جىلى شتۋتگاردتا وتەتىن ليتسەنزيالىق الەم چەمپيوناتىنا تولىق قۇراممەن (5-6 سپورتشى) قاتىسۋعا مۇمكىندىك الدى. ءبىزدىڭ كوماندانىڭ الدىنداعى باستى مىندەت – العاشقى 24 قۇرامانىڭ قاتارىنا ەنۋ ەدى. ءبىز بۇل تالاپتى ورىندادىق. ەندى بيىل شتۋتگاردتا وتەتىن سىندا ۇزدىك 12 كوماندا قاتارىنا كىرۋگە مىندەتتىمىز», - دەيدى باس باپكەر الەكساندر كيم.
ناريمان كۋربانوۆتىڭ الەم كۋبوگى كەزەڭدەرىندە ۇزدىك ۇشتىككە ەنىپ, ميلاد كاريميدىڭ بىرنەشە جاتتىعۋ بويىنشا فينالعا شىققانىن ەسكەرسەك, توكيو وليمپياداسىنداعى گيمناستار دوداسىنان ءبىزدىڭ سپورتشىلاردى كورەمىز دەگەن ءۇمىت باسىم.