شورت-ترەكتەن قازاقستان قۇراماسىنىڭ كوشباسشىسى, الەم كۋبوگى كەزەڭدەرىنىڭ جۇلدەگەرى ابزال اجىعاليەۆ جاتتىعۋ بارىسىندا توبىعىن شىعارىپ الدى. بۇل تۋرالى ۇلتتىق قۇرامانىڭ باس باپكەرى مادىعالي قارسىبەكوۆ مالىمدەدى دەپ جازادى Olympic.kz.
«جاتتىعۋ كەزىندە ابزال ابايسىزدا توبىعىن اۋىرتىپ الدى. تولىق قالپىنا كەلىپ ۇلگەرمەيتىن بولعاسىن, اقپان ايىندا گەرمانيادا وتەتىن الەم كۋبوگى كەزەڭىنەن سىرت قالۋعا ءماجبۇر. ونى دەرەۋ رەسەيدەگى تراۆماتولوگيا ينستيتۋتىنا كورسەتتىك. بىلىكتى دارىگەرلەر ايتارلىقتاي قاۋىپ كورىپ تۇرعان جوق. بىراق ءتورت اپتا بويى بالداقپەن جۇرەدى. 26 قاڭتار كۇنى ابزالدى استاناعا قايتارامىز. ال قالعان كوماندا مۇشەلەرى درەزدەندەگى الەم كۋبوگى كەزەڭىنە اتتانباقپىز», - دەيدى باس باپكەر.
شورت-ترەكتەن قازاقستان ۇلتتىق قۇراماسى بۇل كۇندەرى رەسەيدە بىرلەسكەن وقۋ-جاتتىعۋ جيىندارىن جۇرگىزۋدە. سپورتشىلاردىڭ الدىنداعى ءىرى جارىس – 1-3 اقپان كۇندەرى گەرمانيانىڭ درەزدەن قالاسىندا وتەتىن الەم كۋبوگىنىڭ ءتورتىنشى كەزەڭى.
«درەزدەندە ەل نامىسىن قورعايتىن سپورتشىلار ءتىزىمى انىقتالدى. ەرلەر اراسىندا نۇربەرگەن جۇماعازيەۆ, دەنيس نيكيشا, ءادىل عالياحمەتوۆ, مەرسايد جاقسىباەۆ, نۇرتىلەك قاجىعالي, ەۆگەني رەبيك سىنعا تۇسەدى. قىزدار اراسىندا اناستاسيا كرەستوۆا, ءاليا كيم, ولگا تيحونوۆا جانە اسەل تايشىمانوۆعا سەنىم ارتامىز», - دەدى قارسىبەكوۆ.
ەسكە سالا كەتەيىك, الەم كۋبوگى كەزەڭى وسىعان دەيىن كالگاري, سولت-لەيك-سيتي جانە الماتىدا ءوتتى. شەشۋشى سوڭعى كەزەڭ يتاليانىڭ تۋرين قالاسىندا 8-10 اقپان كۇندەرى ۇيىمداستىرىلادى.