يننوۆاتسيالىق جوبالار جەتەكشىسى راۋان كەنجەحان ۇلى قازاقستاندا Open University جوباسىن اشۋدى ۇسىندى.
«ۇلتتىق اۋدارما بيۋروسى - ءوزىڭىزدىڭ تاپسىرماڭىزبەن «رۋحاني جاڭعىرۋ» باعدارلاماسىنىڭ ءبىر تارماعى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق جوباسىن» جۇزەگە اسىرۋعا قۇرىلعان قوعامدىق ۇيىم. بۇل دا جاستار ۇيىمى دەۋگە تولىق نەگىز بار. ويتكەنى اۋدارماعا جۇمىلعان نەگىزگى ماماندارىمىز - ەگەمەندىكتە ءبىلىم العان, ءبىر بولىگى «بولاشاق» باعدارلاماسىمەن وقىپ كەلگەن تاۋەلسىزدىك قۇرداستارى. بارلىعى دا وسىنداي مازمۇندا جوبادا جۇمىس ىستەپ جاتقانىن ماقتان تۇتادى. وتكەن جىلى ءبىز سىزگە وسى جوبا اياسىندا اۋدارىلعان 18 وقۋلىقتى تانىستىردىق. سودان بەرى 115 وقۋ ورنىندا 1000 دانامەن تەگىن تاراتىلدى» دەدى ۇلتتىق اۋدارما بيۋروسىنىڭ باسشىسى راۋان كەنجەحان ۇلى.
سونىمەن قاتار دۇنيەجۇزىنىڭ ەڭ بەدەلدى عالىمدارىنىڭ الەم بويىنشا ميلليون دانامەن تارالعان 30 وقۋلىعى قازاق تىلىنە اۋدارىلىپ, جارىققا شىعۋعا دايىن ەكەنىن جەتكىزدى. بۇل وقۋلىقتار جاڭا وقۋ جىلىندا ستۋدەنت جاستاردىڭ قولىنا تيەدى.
«وسى جوبامەن بىرگە ءبىز ونلاين وقۋ كۋرسىن دايىنداپ جاتىرمىز. بۇل بىلىكتى مامانداردىڭ قاتىسۋىمەن ۆيدەولەكتسيالار بولماق. ۆيدەولەكتسيالار, سونداي-اق, كونسپەكتىلەر مەن ءبىلىمدى تەكسەرۋگە ارنالعان سۇراق-جاۋاپتان تۇرادى. ونلاين كۋرس بۇل بىلىم بەرۋدىڭ تىڭ ءتاسىلى مەن جاڭا فورماتىنا اينالۋى مۇمكىن. «اشىق استانا ۋنيۆەرسيتەتى» بۇل «رۋحاني جاڭعىرۋ» باعدارلاماسىنىڭ ەڭ ماڭىزدى ناتيجەلەرىنىڭ ءبىرى بولادى. جاڭا تەحنولوگيالار كومەگىمەن جابدىقتالاتىن بۇل ۋنيۆەرسيتەت ءبىلىم ساپاسىن كوتەرۋمەن قاتار, ونى بارلىق ادامعا قولجەتىمدى ەتۋدە ۇزدىك ءرول اتقارادى دەپ ويلايمىن. بۇل ۋنيۆەرسيتەت الەمدەگى قاشىقتىقتان ءبىلىم بەرۋ, ونلاين وقۋ كونتسەپتسياسىمەن سايكەس كەلەدى. بۇل وقۋدىڭ مەتوديكاسى مەن تەحنولوگياسى پەرسونالدى وقىتۋ يدەياسىن قولدايدى. مۇندا ءاربىر ادام وزىنە قاجەتتى ارى ءوز مۇمكىندىگىنە سايكەس ءبىلىم الا الادى» دەدى ول.