الماتى وبلىسىندا 2 مىڭنان استام كوپ بالالى انا تۇرعىن ءۇي كەزەگىندە تۇر. بۇل تۋرالى وبلىس اكىمى اماندىق باتالوۆتىڭ بەلسەندى انالار توبىمەن كەزدەسۋىندە ايتىلدى.
وتكەن جىلدىڭ جەلتوقسان ايىندا ايماق باسشىسىنىڭ قابىلداۋىنا جازىلعان ءبىر توپ كوپ بالالى انا تالدىقورعان قالاسىنداعى تۇرعىن ءۇي كەزەگىنە قاتىستى ماسەلە كوتەرگەن بولاتىن. اكىم «التىن القا», «كۇمىس القا» يەگەرلەرىنە ءۇي كەزەگىنە قاتىستى تۋىنداعان پروبلەمانى ءوز باقىلاۋىنا الىپ, وڭتايلى شەشۋگە ۋادە بەرگەن ەدى. بۇل جولعى قابىلداۋدا الەۋمەتتىك سالاعا جاۋاپتى ماماندار مەن تۇرعىن ءۇي قۇرىلىسى سالاسىنداعى باسشىلاردى دا شاقىرىپ, اتقارىلعان ءىس جايىندا ەسەپتەرىن تىڭدادى.
وبلىس اكىمىنىڭ ورىنباسارى اقان ابدۋاليەۆ انالارعا اۋدان, قالا اكىمدەرىنە توقسان سايىن كەزەكتىڭ جىلجۋ رەتى, بەرىلگەن ۇيلەر تۋرالى ەسەپ بەرىپ وتىرۋ تاپسىرىلعانىن ايتتى. ال قالا اكىمى د. شالتاباەۆ كوپ بالالى وتباسىلارعا بەرىلەتىن كوپقاباتتى ءۇيدىڭ ورنى تاياۋ ارادا وبلىس اكىمىمەن كەلىسىلەتىنىن جەتكىزدى.
ءوز كەزەگىندە كوپ بالالى انالاردىڭ ءۋاجىن جانە اكىمدىك وكىلدەرىنىڭ بايانداۋىن تىڭداعان وبلىس اكىمى ا. باتالوۆ الدىڭعى بەرىلگەن تاپسىرمالاردىڭ, سونىڭ ىشىندە كەزەك رەتى تۋرالى اقپارات بەرۋ ءىسىنىڭ ءالى دە رەتتەلمەگەنىن, كوپ بالالى وتباسىلارىنا ارناپ ءۇي سالۋ ماسەلەسىندە دە ناقتى ۇسىنىس جوقتىعىن سىنعا الدى.
قالماحانبەت مۇقامەتقالي,
«Egemen Qazaqstan»
الماتى وبلىسى