كوكشەتاۋ قالاسىندا تۇراتىن ەلەنا سامسونوۆا سان الۋان حوش ءيىستى سابىندى 10 جىلدان بەرى جاسايدى ەكەن. نەگىزگى ماماندىعى – پسيحولوگ. الايدا, ماقسات ەتكەن ىسىنەن مۇرات تاباتىنىنا كوزى جەتكەن سوڭ وسى كاسىپكە كوڭىلى قۇلاعان.
– ءبارى بالا كۇتىمىنە وراي دەمالىسقا شىققان ساتىمنەن باستالدى,– دەيدى ەلەنا سامسونوۆا. – اۋەلى سابىن دايىنداۋ تاسىلدەرىن عالامتوردان ىزدەپ تاپتىم. بىردەن كوڭىلىم اۋعان سوڭ, ىندەتە زەرتتەدىم.
جاڭا كاسىپ قىزىقتى بولىپ كورىنگەن. قولى جاتتىعا كەلە ءيىس سابىنداردى ءارتۇرلى ەتىپ قالىپتاپ, قيلى پىشىندە جاسايتىن بولدى. جاساعان زاتىڭنىڭ سىرتقى كەيپى دە جۇتىنىپ تۇرۋى كەرەك قوي.
– ءتۇرلى-ءتۇستى بوياۋ, يىستەندىرگىش قاجەت, – دەيدى شەبەر. – ساپاسى دا جامان ەمەس, ەشبىر حيميا جوق. نەگىزگى شيكىزاتىن رەسەيدەن الدىرامىن.
سورەدە تۇرعان سابىندار سابىن ەمەس, سان الۋان ويىنشىق ءتارىزدى. مىنا بىرەۋى قوربيعان قونجىق, ءسۇپ-سۇيكىمدى كۇشىك, ءتىپتى جەمىس-جيدەكتەر بەينەسىندەگىلەرى دە تولىپ جاتىر.
– ەلەنا بۇل توڭىرەكتەگى قولدان سابىن جاسايتىنداردىڭ تۇڭعىشى, – دەيدى «پاليترا سينەگوريا» بىرلەستىگىنىڭ جەتەكشىسى ەلەنا اندرونياك. – ءوزىمنىڭ دە كىشكەنتايىم بار. بالالاردى ويىنشىق سابىنمەن جۋىندىرۋ سونداي وڭاي, ولار ءۇشىن بۇل قىزىق. ءتىپتى ۇلكەندەردىڭ ءوزىن ەلىكتىرەدى.
بايقال ءبايادىل,
«Egemen Qazaqstan»
اقمولا وبلىسى