مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىندە ارنايى مونيتورينگ توبىنىڭ بيىلعى جىلداعى العاشقى وتىرىسى ءوتتى. ءىس-شاراعا اگەنتتىكتىڭ اۋماقتىق دەپارتامەنتىنىڭ باسشىلىعى مەن قىزمەتكەرلەرى, وبلىس, قالا, اۋداندارداعى ارنايى مونيتورينگ توبىنىڭ مۇشەلەرى قاتىستى.
اگەنتتىكتىڭ اۋماقتىق دەپارتامەنتىنىڭ باسشىسى ارنايى مونيتورينگ توبىنىڭ ماقساتى مەن مىندەتتەرى, توپ ەرەجەسىنىڭ تالاپتارىمەن, 2019 جىلعا ارنالعان جۇمىس جوسپارىنىڭ جوباسىمەن تانىستىرىپ ءوتتى.
بۇدان باسقا اۋماقتىق دەپارتامەنت باسشىسى بىلتىرعى جىلدىڭ جۇمىس قورىتىندىسى مەن ناتيجەلەرىنە توقتالىپ ءوتىپ, الداعى ۋاقىتتاعى قوعامدىق مونيتورينگ وتكىزىلەتىن سالالاردى بەلگىلەدى.
ءوز كەزەگىندە وبلىستىق ارنايى مونيتورينگ توبىنىڭ ءتورايىمى رۋحيا الدوڭعاروۆا 2018 جىلى اتقارىلعان جۇمىستاردى ايتا وتىرىپ, نەگىزگى قول جەتكىزگەن ناتيجەلەردى ايتىپ ءوتتى. اتاپ ايتقاندا, وڭىردەگى دەنساۋلىق ساقتاۋ مەكەمەلەرىنە جۇرگىزىلگەن مونيتورينگ بارىسىندا اقتاۋ جانە جاڭاوزەن قالالارىنداعى ەمدەۋ مەكەمەلەرىندە بىرقاتار كەمشىلىكتەر انىقتالىپ, وبلىس اكىمىنىڭ قاتىسۋىمەن وتكەن وبلىستىق القا وتىرىسىندا جۇرتشىلىقتىڭ نازارىنا جەتكىزىلدى. ناتيجەسى بويىنشا وبلىستىق دەنساۋلىق ساقتاۋ باسقارماسىنا ءتيىستى تاپسىرمالار بەرىلدى.
جيىندا سونىمەن بىرگە وڭىردەگى وقۋ ورىندارىنا قاراستى ستۋدەنتتىك جاتاقحانالارعا جۇرگىزىلگەن باقىلاۋ جۇمىستارىنىڭ ناتيجەسى ءسوز بولدى. ياعني, قوعام بەلسەندىلەرىنىڭ انىقتاعانىنداي, جاتاقحانالاردا جوندەۋ جۇمىستارىن ايتپاعاندا, ستۋدەنتتەرگە ءتيىستى بولمەلەردە شەتەل ازاماتتارى دا زاڭسىز تۇرىپ جاتقاندىعى انىقتالدى. قازىرگى تاڭدا ستۋدەنتتىك جاتاقحانالاردا انىقتالعان كەمشىلىكتەردى جويۋ بويىنشا ءبىلىم بەرۋ ۇيىمدارىمەن ءتيىستى شارالار قولعا الىندى.
ەلىمىزدىڭ اقپاراتتىق كەڭىستىگىندە ءبىراز رەزونانس تۋدىرعان «قازاقستان تەمىر جولى» اق وڭىرلىك بولىمشەلەرىنە قاتىستى قوعامدىق مونيتورينگ ناتيجەلەرى دە نازاردان تىس قالعان جوق. قوعام بەلسەندىلەرى مەن بلوگەرلەر ماڭعىستاۋ وبلىسىنا قاراستى تەمىرجول ۆوكزالىندا باقىلاۋ جۇرگىزۋ بارىسىندا ۆوكزال قىزمەتكەرلەرىمەن جولاۋشىلار پويىزىنا بيلەتتەردىڭ جەتىسپەۋشىلىگىن قولدان جاساپ, ادامدارعا قيىنشىلىق تۋدىرىپ, سول ارقىلى جولاۋشىلار بيلەتتەرىن ۇستەمە اقىسىمەن قولدان ساتۋ, سونداي-اق بيلەتسىز جولاۋشىلاردان زاڭسىز تۇردە اقى الۋ سياقتى دەرەكتەردىڭ جۇيەلى تۇردە ورىن الىپ وتىرعاندىعى انىقتالدى.
ارنايى مونيتورينگ توبىنىڭ جۇرگىزگەن رەيدتىك شارالارى ناتيجەسىندە ءتيىستى ۇسىنىمدار بەرىلىپ, «قازاقستان تەمىر جولى» اكتسيونەرلىك قوعامىمەن الداعى ۋاقىتتا «ماڭعىستاۋ» ستانساسىنان قاتىنايتىن جولاۋشىلار پويىزدارىنا جاڭا ۆاگوندار بەرىلەتىن بولادى.
ارنايى مونيتورينگ توبىنىڭ مۇشەلەرى بۇقارالىق اقپارات قۇرالدارىندا نەمەسە الەۋمەتتىك جەلىلەردە تۇرعىنداردىڭ تاراپىنان كوتەرىلگەن ماسەلەلەرگە جەدەل تۇردە ارەكەت ەتىپ, ءتيىستى مەملەكەتتىك ورگاندارعا حابارلاۋ تاجىريبەسىن جالعاستىرىپ, كۇشەيتۋ قاجەتتىگىن ۇسىندى. قوعام وكىلدەرىنىڭ پىكىرىنشە, تۇرعىندارمەن كەرى بايلانىس مەحانيزمدەرىن جەتىلدىرۋدە ارنايى مونيتورينگ توبىنىڭ الەۋەتى زور بولماق.
جيىندى قورىتىندىلاي كەلە, اۋماقتىق دەپارتامەنت باسشىسى ن.جاننازاروۆا 2019 جىلعا ارنالعان ارنايى مونيتورينگ توبىنىڭ قوعامدىق باقىلاۋ جۇرگىزىلەتىن سالالار بويىنشا ۇسىنىستارىن قابىلداپ, وبلىس, قالا توپ قۇرامىن جاڭارتۋ, الەۋمەتتىك جەلىلەر مەن باق بەتىندەگى قوعامدى تولعاندىرعان ماسەلەلەردى كونسترۋكتيۆتى, زاڭ تالاپتارىنا سايكەس شەشۋ قاجەتتىگىن باسا ايتىپ, مونيتورينگ توبىنىڭ اتىنا كىر كەلتىرمەي, اگەنتتىكتىڭ اۋماقتىق دەپارتامەنتىمەن بىرلەسىپ قوعام يگىلىگى ءۇشىن جۇمىس جاساۋعا شاقىردى.
گۇلايىم شىنتەمىرقىزى,
«Egemen Qazagstan»
ماڭعىستاۋ وبلىسى