پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ تۋرالى» زاڭ جوباسى قارالدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
كونۆەنتسياعا 2018 جىلعى 12 تامىزدا اقتاۋ قالاسىندا وتكەن بەسىنشى كاسپي ءسامميتىنىڭ بارىسىندا قازاقستان, ازەربايجان, يران, رەسەي جانە تۇرىكمەنستان پرەزيدەنتتەرى قول قويعان بولاتىن.
كونۆەنتسيانىڭ ماقساتى - كاسپي تەڭىزىن, ونىڭ سۋىن, ءتۇبىن, قويناۋىن, تابيعي رەسۋرستارى مەن تەڭىز ۇستىندەگى اۋە كەڭىستىگىن پايدالانۋعا قاتىستى تاراپتاردىڭ قۇقىقتارى مەن مىندەتتەرىن ايقىنداۋ جانە رەتتەۋ.
كونۆەنتسيا كاسپي تەڭىزىندەگى ۇلتتىق ايماقتاردىڭ, يۋريديكتسياسى مەن ەگەمەندىكتىڭ اراجىگىن اجىراتۋ, قويناۋىن پايدالانۋ, ترانزيت جانە تاسىمالداۋ, سۋ استى تۇربا قۇبىرلارى مەن بايلانىس جەلىلەرىن جۇرگىزۋ قۇقىقتارىن, تابيعي ورتاسى مەن بيولوگيالىق رەسۋرستارىن قورعاۋعا بايلانىستى ماسەلەلەردى رەتتەيدى. قازىرگى زامانعى قاۋىپتەر مەن قاتەرلەرگە قارسى تۇرۋ, توتەنشە جاعدايلاردى ەسكەرتۋ جانە جويۋ, كاسپي ماڭى ەلدەرىنىڭ اسكەري قىزمەتى تۇرعىسىندا قاۋىپسىزدىك ماسەلەلەرىنە دەربەس نازار اۋدارىلدى.
كونۆەنتسياعا سايكەس, كاسپي تەڭىزىنىڭ ايدىنى ءتۇرلى تارتىپتەگى ايماقتارعا بولىنەدى. تاراپتار سىرتقى شەكاراسى مەملەكەتتىك شەكارا مارتەبەسىنە يە 15 تەڭىز ميلىنەن اسپايتىن كولەمدە اۋماقتىق سۋدى بەكىتتى. اۋماقتىق سۋلارعا ءار مەملەكەت تەك كاسىپ ەتۋ قۇقىعىنا يە ون ميلدىك بالىق اۋلاۋ ايماعى شەكتەسەتىن بولادى.
كونۆەنتسيا دەپوزيتاريى بولىپ تابىلاتىن قازاقستان رەسپۋبليكاسى بەسىنشى راتيفيكايالىق گراموتانى العان كۇننەن باستاپ كۇشىنە ەنەدى.
كوميتەت وتىرىسىندا سونداي-اق «ەۋرازيالىق ەكونوميكالىق وداقتىڭ ءۇشىنشى مەملەكەتتەرمەن, حالىقارالىق ۇيىمدارمەن نەمەسە حالىقارالىق ينتەگراتسيالىق بىرلەستىكتەرمەن حالىقارالىق شارتتارى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى.
كەلىسىمگە 2018 جىلعى 14 مامىردا سوچيدە ەۋرازيالىق ەكونوميكالىق وداققا مۇشە مەملەكەتتەردىڭ باسشىلارى قول قويعان.
قۇجات ەۋرازيالىق ەكونوميكالىق وداققا كىرمەيتىن ەلدەرمەن حالىقارالىق شارتتاردى جاساسۋ, ولاردىڭ قولدانىسىن توقتاتۋ جانە توقتاتا تۇرۋ ءتارتىبىن رەتتەيدى. كەلىسىمدە ءۇشىنشى ەلدەرمەن كەلىسسوزدەر جۇرگىزۋ ءراسىمى, كەلىسسوز دەلەگاتسياسى باسشىسىنىڭ وكىلەتتىكتەرى مەن مىندەتتەمەلەرى, كەلىسسوز ۇستانىمىن قامتيتىن جانە ءۇشىنشى تاراپقا بەرىلەتىن قۇجاتتاردىڭ جوبالارىن مۇشە مەملەكەتتەرمەن مىندەتتى كەلىسۋ رەتتەلگەن.
سونىمەن قاتار كەلىسىمدە حالىقارالىق شارتتار جوبالارىنا ەكونوميكالىق ينتەگراتسيا شەڭبەرىنەن شىعاتىن ەرەجەلەردى ەنگىزۋگە جول بەرمەۋ ماقساتىندا وداق پەن وعان مۇشە مەملەكەتتەر اتىنان ارەكەت ەتەتىن كەلىسسوزدەر جۇرگىزەتىن توپتاردىڭ قىزمەتىن باقىلاۋ تەتىكتەرى كوزدەلگەن.
وداق اتىنان حالىقارالىق شارتقا قول قويۋ مۇشە مەملەكەتتەر حالىقارالىق شارت جوباسىنا قاتىستى ءتيىستى مەملەكەتىشىلىك راسىمدەردى ورىنداعاننان كەيىن جوعارى كەڭەستىڭ شەشىمى نەگىزىندە جۇزەگە اسىرىلادى.
زاڭ جوبالارى سەناتتىڭ قاراۋىنا جىبەرىلدى.