اقتوبەلىك كاسىپكەرلەر پرەزيدەنتتىڭ 2018 جىلى اۋىلدىق ايماقتاردىڭ الەۋمەتتىك ورتاسىن جاڭعىرتۋ اياسىندا باستامالىق ەتكەن «اۋىل - ەل بەسىگى» اۋقىمدى جوباسىن دامىتۋعا قولدان كەلگەن ۇلەستەرىن قوسۋدا. ەلباسى باستاماسى وڭىردە كەڭ قولداۋ تاۋىپ, «اۋىل قامقورشىسى» اكتسياسى باستالدى.
وبلىس اكىمدىگىندە وڭىردەگى بيزنەس قوعامداستىق پەن مەملەكەتتىك قۇرىلىمداردىڭ وكىلدەرى جوبانىڭ ءتيىمدى جۇزەگە اسىرىلۋى ماسەلەلەرىن تالقىلادى.
«كاسىپكەرلەردىڭ ءبىر دە بىرەۋى يگى ىستەن تىس قالماسىن. ارقايسىسى ءوزىن تاربيەلەگەن تۋعان جەرىن دامىتۋعا, مەملەكەت باسشىسىنىڭ بارلىق الەۋمەتتىك باستامالارىن جۇزەگە اسىرۋعا ۇلەس قوسۋى كەرەك», - دەدى بەردىبەك ساپارباەۆ.
ايتا كەتەيىك, بىلتىر اقتوبە وبلىسىندا 2 ملرد تەڭگەگە 344 جوبا جۇزەگە اسىرىلعان بولاتىن, ياعني جاڭا الەۋمەتتىك نىساندار سالىندى, جولدا مەن كوپىرلەر جوندەلدى, ءبىلىم بەرۋ, دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق بازاسى كۇشەيتىلدى, از قامتىلعان جانە كوپ بالالى وتباسىلارعا كومەك كورسەتىلدى.
وسى جىلى كاسىپكەرلەر تۋىپ-وسكەن اۋىلدارىن قامقورلىققا الۋدى جالعاستىرىپ, 2,6 ملرد تەڭگەگە كومەك كورسەتۋدى جوسپارلاپ وتىر. وسىلايشا, 289 مەتسەنات 199 ەلدى مەكەندە 314 جوبانى جۇزەگە اسىرۋعا ۋادە بەردى. ونىڭ ىشىندە 4 جوبا دەنساۋلىق ساقتاۋ, 16 ءبىلىم بەرۋ, 69 تكش, 95 مادەنيەت پەن سپورت جانە ت.ب. نەگىزىندە, ساياباقتاردى اباتتاندىرۋ, سپورتتىق جانە ويىن الاڭدارىن ورناتۋ شارالارى, جول جۇمىستارى جۇرگىزىلىپ, اۋىل كلۋبتارى مەن مادەنيەت وشاقتارى جوندەلمەك.
قر مادەنيەت قايراتكەرى, قازاقستان حالقى اسسامبلەياسىنىڭ «بىرلىك» اقساقالدار كەڭەسىنىڭ توراعاسى ەركىن قۇرمانبەكوۆ اۋىلداردى جاڭعىرتۋ جاڭا نىسانداردى اشۋ عانا ەمەس دەپ ەسەپتەيدى. ونىڭ ويىنشا, يدەولوگيالىق قۇرامداسقا دا نازار اۋدارعان ماڭىزدى, ياعني وسكەلەڭ ۇرپاقتى پاتريوتيزم, وتانعا دەگەن سۇيىسپەنشىلىك رۋحىندا تاربيەلەيتىن اقساقالدار ينستيتۋتىن قايتا جانداندىرىپ, اۋىل تۇرعىندارىن ودان ءارى بىرىكتىرەتىن «ەڭ ۇزدىك اۋىل» بايقاۋىن وتكىزگەن ءجون.
ايتا كەتەيىك, «رۋحاني جاڭعىرۋ» باعدارلاماسى, پرەزيدەنتتىڭ « ۇلى دالانىڭ جەتى قىرى» ماقالاسى اياسىندا «اتامەكەن - اتالار. اسىلىم - اجەلەر» ءانسامبلى وبلىستىڭ بارلىق اۋداندارىندا كونتسەرت بەرەدى.
«اۋىل قامقورشىسى» جوباسىنىڭ قاتىسۋشىلارى الداعى جىلعا جوسپارلارىمەن ءبولىستى.
اتاپ ايتقاندا, العا اۋدانىنىڭ امانگەلدى اۋىلىندا ءوز قاراجاتىنا مادەنيەت ءۇيىن سالعان «رەيمقۇل» شارۋا قوجالىعىنىڭ باسشىسى سامات قالدىعۇلوۆ ساياباقتى اباتتاندىرىپ, اۋىل تۇرعىندارى ءۇشىن قوعامدىق مونشا مەن 10 ءۇي سالىپ بەرۋدى كوزدەپ وتىر.
مارتوك اۋدانىنا قاراستى حازرەت اۋىلىنان شىققان «اگروفيرما كوكۆەست» جشس باسشىسى ۆلاديمير پروسكۋرين 2018 جىلى ورتالىق سۋمەن جابدىقتاۋ قۇرالىن قالپىنا كەلتىرىپ, بۇكىل زەينەتكەردىڭ ءۇيىن تەگىن اۋىز سۋمەن قامتىسا, 2019 جىلى كوپىردى جوندەپ, جەرلەستەرىنىڭ اعىمداعى ماسەلەلەرىن شەشىپ بەرۋدى جوسپارلاپ وتىر.
مەتسەنات, «ناۋرىز سيم» جشس ديرەكتورى يبراگيم سارسەنباەۆ بيىل ىرعىز اۋدانىندا قۇنى 20 ملن تەڭگە تۇراتىن سپورت كەشەنىن سالماق. «التىن دالا» شارۋا قوجالىعىنىڭ باسشىسى ءساندىباي اليتۇرليەۆ قوبدا اۋدانىنىڭ قاراكەمەر اۋىلىندا ەلۋ ورىندىق بالاباقشانىڭ قۇرىلىسىن باستايدى جانە جارساي اۋىلىنا سپورت زال تارتۋ ەتەدى.
وبلىس اكىمى: «وبلىستاعى بارلىق كاسىپكەرلەردىڭ ەلباسى باستاماسىن قولداپ, بار كۇشتەرىن سالۋعا دايار ەكەندەرى قۋانتادى. ءبىز پرەزيدەنت تاپسىرمالارىن ساپالى ءارى ۋاقىتىندا ورىنداۋىمىز قاجەت», - دەپ ءسوزىن تۇيىندەدى.