ۆەنگريا استاناسى بۋداپەشتتە وتكەن ۇستەل تەننيسىنەن الەمدىك تۋردا قازاقستان قۇراماسىنىڭ ۇزدىگى كيريلل گەراسيمەنكو سىنعا ءتۇستى. بۇل تۋرالى Olympic.kz. حابارلادى.
ىرىكتەۋ كەزەڭىندەگى ءۇش ماتچتا كيريلل ۆەنگريالىق اندراشتى تسابۋدى 4:0, قىتايلىق سيۋ ءينبيندى 4:0, يسپانيالىق الۆارو روبلەستى 4:1 ەسەبىمەن جەڭدى.
1/16 فينالدا ءبىزدىڭ جەرلەسىمىزدى باسقا ەمەس, الەمنىڭ ءبىرىنشى راكەتكاسى, ءتورت دۇركىن الەم چەمپيونى, الەم كۋبوگىنىڭ ءتورت مارتە يەگەرى فان جەندونگ (قىتاي) كۇتىپ تۇرعان بولاتىن. تارتىستى وتكەن كەزدەسۋدە گەراسيمەنكو 2:4 ەسەبىمەن قارسىلاسقا جول بەردى.
«كيريلل بۇل تۋرنيردە وتە جاقسى ويىن كورسەتتى. ونىڭ دەڭگەيى ءوسىپ كەلەدى. اۆسترياداعى پرو تۋردا وعان ازداعان ساتتىلىك جەتىسپەگەن ەدى. سودان بەرى كيريلل ءوز ويىن ورنەگىن جاقسارتىپ, بۇرىن ءوزى ءۇشىن قيىنعا سوعاتىن قارسىلاستارىن وڭاي ءارى سەنىمدى تۇرلە ۇتا باستادى. التىنشى سەتتە ءبىزدىڭ سپورتشى فان جەندونگتان 10:9 ەسەبىمەن باسىم تۇردى. ەگەر سوڭىنا دەيىن جەڭىستى بەرمەگەندە, جەتىنشى كەزەڭدە ەسەپ تەڭەسەر ەدى. وكىنىشكە قاراي, الەمنىڭ ءبىرىنشى راكەتكاسى جەڭىستى وڭايلىقپەن بەرمەيدى. كيريلل ءۇشىن اتالعان كەزدەسۋ ۇلكەن تاجىريبە بولدى», - دەيدى ۇلتتىق قۇرامانىڭ كەڭەسشىسى دميتري لەۆەنكو.