اقتوبەدە ءوڭىر باسشىسى بەردىبەك ساپارباەۆتىڭ توراعالىعىمەن اقتوبە وبلىسى اكىمدىگىنىڭ كەڭەيتىلگەن جينالىسى ءوتتى. وبلىستىڭ 2018 جىلعى الەۋمەتتىك-ەكونوميكالىق دامۋىنىڭ قورىتىندىسى قارالىپ, وسى جىلعى نەگىزگى مىندەتتەرى بەلگىلەندى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
وتكەن جىلدىڭ قورىتىندىسى تۋرالى اقتوبە وبلىسى اكىمىنىڭ ورىنباسارلارى ەسەپ بەردى. باياندامالارعا سايكەس, اقتوبە وبلىسى ەكى جىل (2017, 2018) قاتارىنان ەكونوميكا ءوسىمىن 5% دەڭگەيدە ۇستاپ كەلەدى
«جۇمىلا اتقارعان جۇمىستاردىڭ, ەلباسى, ۇكىمەت قولداۋلارىنىڭ جانە بارلىق مەملەكەتتىك باعدارلامالاردى جۇزەگە اسىرۋدىڭ ارقاسىندا ءبىز پرەزيدەنتتىڭ ەكونوميكا دامۋىنىڭ قارقىنىن تومەندەتپەۋ جونىندەگى تاپسىرماسىن ورىنداي الدىق. بارلىق نەگىزگى الەۋمەتتىك-ەكونوميكالىق كورسەتكىشتەر بويىنشا وسىمگە قول جەتتى. ءبىزدىڭ وسى جىلعى مىندەتىمىز – ءوڭىردى ءارى قاراي دامىتىپ, حالىقتىڭ ءال-اۋقاتىن جاقسارتۋ ءۇشىن بارلىق رەزەرۆتەردى پايدالانۋ»,-دەپ اتاپ ءوتتى جيىندى اشقان بەردىبەك ساپارباەۆ.
الدىن الا مالىمەتتەرگە سايكەس, 2018 جىلدىڭ قورىتىندىسى بويىنشا ونەركاسىپ ءوسىمىنىڭ دەڭگەيى 5,6% قامتىلعان, رەكوردتىق سوما بولىپ تابىلاتىن 1,9 ترلن. تەڭگەگە ءونىم وندىرىلگەن (2017جىل – 1,55 ترلن. تەڭگە). اۋىل شارۋاشىلىعى ءوسىمى 6,2% دەڭگەيدە, بارلىعى 228 ملرد تەڭگەگە ءونىم ءوندىرىلدى.
ەكونوميكاعا 516 ملرد تەڭگە ينۆەستيتسيا تارتىلدى, ءوسىم 10,8% (2017 ج - 437 ملرد. تەڭگە), بۇل - ءبىزدىڭ وبلىس ءۇشىن جوعارعى كورسەتكىش. سونداي-اق, 900 مىڭ شارشى مەتردەن استام تۇرعىن ءۇي پايدالانۋعا بەرىلدى. قۇرىلىس جۇمىستارىنىڭ كولەمى وبلىس بويىنشا 9,5% ءوستى. 20 مىڭنان استام جاڭا جۇمىس ورنى قۇرىلدى (2017 ج - 17 مىڭ)
شوعىرلاندىرىلعان بيۋدجەتكە 13% وسىممەن 535 ملرد. تەڭگە رەكوردتىق كولەمدەگى قاراجات ءتۇسىپ, بيۋدجەتتى يگەرۋ 100% قۇرادى.
ءوڭىر باسشىلىعى الەۋمەتتىك-ەكونوميكانى ءارى قاراي دامىتۋ ماقساتىندا 2019 جىلى بىرقاتار ماڭىزدى جوبالاردى جۇزەگە اسىرۋدى جوسپارلاپ وتىر. اتاپ ايتقاندا, ەلدى مەكەندەردە ينفراقۇرىلىمدى دامىتۋ كەزىندە بيۋدجەت قاراجاتىن نەعۇرلىم ءتيىمدى جۇمساۋ ءۇشىن «ادامدار ينفراقۇرىلىمعا» مودەلى نەگىزىندە وبلىستى دامىتۋدىڭ 5 جىلدىق جاڭا باعدارلاماسى ازىرلەنەتىن بولادى.
بۇدان باسقا, بوس كەن ورىندارىنىڭ الەۋەتىن پايدالانۋعا جۇمىستار جاسالادى. 2018 جىلى 18 كەن ورنى بويىنشا جەر قويناۋىن پايدالانۋعا كەلىسىمشارتتار جاسالدى. بۇل رەتتە الەۋەتى اشىلماعان ءالى دە 160 رەزەرۆتىك كەن ورنى بار.
جەرگىلىكتى بيلىك كۇشى سونداي-اق, شاعىن جانە ورتا بيزنەستى دامىتۋعا دا باعىتتالاتىن بولادى. بۇل ءۇشىن 22 ملرد تەڭگەدەن استام قاراجات قاراستىرىلعان, ونىڭ ىشىندە 5,1 ملرد تەڭگە «بەس الەۋمەتتىك باستاما» اياسىندا شاعىن نەسيەلەۋگە بولىنەدى.
دەنساۋلىق ساقتاۋ باسقارماسىندا مجس اياسىندا يادرولىق مەديتسينا ورتالىعى, چەك-اپ ورتالىعى, بالالار ونكولوگيالىق گەموتولوگيا ورتالىعى سىندى بىرەگەي جوبالاردى جۇزەگە اسىرۋ جالعاسىپ, ءبىلىم سالاسىندا كەم دەگەندە 25 جەكە بالاباقشا مەن 10 جاڭا مەكتەپ اشىلماق.
ايتا كەتەيىك, بىلتىر وبلىستاعى بارلىق مەكتەپتەر جاڭا كومپيۋتەرلەرمەن 100% قامتىلسا, بيىل ەلباسى تاپسىرماسىنا سايكەس بارلىق بالاباقشالار مەن مەكتەپتەر بەينەكامەرالارمەن جاراقتاناتىن بولادى.
بۇدان وزگە, وسى جىلعا 1 ملن. شارشى مەتردەن استام تۇرعىن ءۇيدى پايدالانۋعا بەرۋ, كەم دەگەندە 50 ونەركاسىپ كاسىپورىندارىن جاڭعىرتۋ, 21 مىڭ جاڭا جۇمىس ورىندارىن قۇرۋ جانە اقتوبەلىكتەردىڭ ەڭبەكاقىسىن ءارى قاراي كوبەيتۋ مىندەتتەرى قويىلعان.
كەزدەسۋ اقتوبە اكىمى ءىلياس يسپانوۆتىڭ قالانىڭ 150 جىلدىعىن مەرەكەلەۋگە دايىندىق بارىسى تۋرالى ەسەبىمەن اياقتالدى. ايماق باسشىسى بەردىبەك ساپارباەۆ مەرەيتويعا دايىندىق جۇمىستارىنا ءار اقتوبەلىكتىڭ بەلسەندى قاتىسۋى كەرەكتىگىن اتاپ ءوتتى.
«مەرەيتوي قالانىڭ دامۋىنداعى ماڭىزدى كەزەڭ بولۋى كەرەك, كونتسەرتتەر مەن باسقا دا ويىن-ساۋىق ءىس-شارالارىن وتكىزۋمەن عانا شەكتەلۋگە بولمايدى. بۇل وقيعانى ءبىراز جىلدار بويى ەسكە تۇسىرەتىن جانە اقتوبەلىكتەردىڭ پايداسىنا قىزمەت ەتەتىن كوپتەگەن جوبالار بولادى. ولاردى ىسكە اسىرۋعا ەرەكشە جاۋاپكەرشىلىكپەن قاراۋ كەرەك. سونىمەن قاتار, ءبىر دە ءبىر اقتوبەلىك ءوز قالاسىن دامىتۋ ءۇشىن سىرت قالماي, ءوز ۇلەستەرىن قوسۋى كەرەك. ءبىز بارلىعىمىز بىرگە كۇش - جىگەرىمىزبەن كوپ نارسە جاساي الامىز», - دەدى وبلىس اكىمى.