ۇيقىڭىز جايلى بولۋ ءۇشىن قالاي جاتقانىڭىز دۇرىس؟ شالقاڭىزدان, وڭ يا سول جاق قابىرعاڭىزعا قيسايىپ جاتىپ, ۇيقىڭىز قانسا بولدى ما؟ جوق, ولاي ەمەس ەكەن. مىسالى, دارىگەرلەر شالقادان جاتىپ ۇيىقتاۋ ساۋ ادامنىڭ دا تىنىس الۋ جۇيەسىنە زيان ەكەنىن ەسكەرتەدى.
ال ءسابي كۇتىپ جۇرگەن اناعا شالقادان جاتۋعا مۇلدە بولمايدى. ول ىشتەگى نارەستەنىڭ تىنىس الۋىن ناشارلاتادى. سونىمەن قاتار اناسىنىڭ دا جۇرەك قان تامىرلارىنا وتە زيان. نەگە؟ ويتكەنى شالقايىپ جاتۋ ءبىر مينۋتتا جۇرەككە قۇيىلاتىن قاننىڭ كولەمىن ازايتادى. ول جاتىرعا باراتىن قانعا دا تەرىس اسەر ەتەدى. سونىڭ سالدارىنان ىشتەگى شاقالاقتىڭ دەمالۋى قيىندايدى.
عالىمدار دۇنيەگە ءسابيى جانسىز كەلگەن 150 انا مەن ساۋ بالا تۋعان 600 ەرىكتى ايەلدىڭ ۇيىقتاۋ ادەتتەرىن زەرتتەپتى. زەرتتەۋ ناتيجەسىندە 28 اپتا تولعاننان كەيىن شالقادان جاتىپ ۇيىقتاۋ ءولى بالا تۋ قاۋپىن 4 پايىزعا جوعارىلاتادى. بۇل قوسىمشا فاكتورلاردى ەسەپتەمەگەندە. ال قۇرساققا 37 اپتا تولعاندا شالقادان جاتىپ ۇيىقتاۋ ءتىپتى قاۋىپتى. سەبەبى بالا تۋرا سول ۋاقىتتاردا وتە نازىك بولادى.
بۇل كەڭەستى كەز كەلگەن اياعى اۋىر انا, بولاشاق انا ءبىلۋى ءتيىس. ال ءبىزدىڭ شاريعاتىمىزدا سۇننەتكە ساي وڭ قابىرعاڭىزعا قيسايىپ ۇيىقتاۋ ابزال.