ەستەن كەتپەس اسەر سىيلايتىن جاڭا جىل مەرەكەسىندە بيىل بالالار تاماشا توسىن سىيلارعا يە بولۋدا. جاڭا جىل قارساڭىندا №2 حالىققا قىزمەت كورسەتۋ ورتالىعىنىڭ ۇجىمى بالاقايلارعا ارناپ «تىلەكتەر شىرشاسىن» ۇيىمداستىردى. قايىرىمدىلىق اكتسياسىنىڭ كوزدەگەنى – تۇرمىسى تومەن وتباسىنان شىققان بالالاردىڭ اياز اتاعا جولداعان ارمان-تىلەكتەرىن ورىنداۋ. تولىعىراق ارىپتەسىمنىڭ بەينەماتەريالىندا.
جاڭا جىلدىق شىرشاعا كەلگەن بالالار ورتالىق قىزمەتكەرلەرىمەن ارنايى تاڭدالىپ الىنعان. ولاردىڭ اراسىندا كوپ بالالى وتباسىلار دا بار. اكتسيا بارىسىندا حالىققا قىزمەت كورسەتۋ ورتالىعىنىڭ قىزمەتكەرلەرى اقمولا وبلىسىنىڭ اۋداندارى مەن قالالارى بويىنشا 20 بالانىڭ تىلەگىن ورىنداپ, شاتتىققا بولەگەن.
–اتالمىش اكتسياعا مەملەكەتتىك كورپوراتسيانىڭ قىزمەتكەرلەرى مەن كليەنتتەرى قاتىستى. بۇل اكتسيا رەسپۋبليكانىڭ بارلىق ايماعىندا وتكىزىلدى. ءداستۇرلى تۇردە جىل سايىن حالىققا قىزمەت كورسەتۋ ورتالىقتارىندا «تىلەكتەر شىرشاسى» ورناتىلادى. وبلىس بويىنشا بارلىق اۋدانداردا بالالارعا جاڭاجىلدىق سىيلىقتاردى تابىستادىق. باستىسى, بالالاردىڭ قۋانىشىندا شەك جوق. سوندىقتان اتالمىش شارالاردى جىل سايىن ۇيىمداستىراتىن بولامىز. قالامىزدىڭ تۇرعىندارىن كەلە جاتقان جاڭا جىل مەرەكەسىمەن قۇتتىقتايمىن! تابىس تىلەيمىن. ارماندارىڭىز ورىندالا بەرسىن,–دەدى «ازاماتتارعا ارنالعان ۇكىمەت» مەملەكەتتىك كورپوراتسياسى وبلىستىق فيليالى ديرەكتورىنىڭ ورىنباسارى نۇربەك قايىرجانوۆ.
بالالاردىڭ اياز اتادان سۇرايتىندارى وتە قاراپايىم دۇنيەلەر. مىسالى, تيموفەي قويان قالاسا, اناستاسيا كەرەۋەتى بار قۋىرشاق العىسى كەلەتىنىن جازىپتى. مەرەكەلىك شارا بارىسىندا سىيلىقتار تابىس ەتىلدى.
بايقال ءبايادىل,
«ەگەمەن قازاقستان»
اقمولا وبلىسى