كوپشىلىكتىڭ ءدال مۇنداي اق تۇيەنىڭ قارنى جارىلعان قۋانىشى كوپتەن بەرى بولماپ ەدى. سوندىقتان سۇيىنشىلەپ ايتۋعا ابدەن لايىقتى.
تۇرعىن ءۇي تۇرمىس جاقسارتۋدىڭ باستى سەبەبى. 34 پاتەرلىك كوپقاباتتى تۇرعىن ءۇي ەكى جىلدا سالىنىپ ءبىتتى. شالعايداعى شاعىن اۋداننىڭ ورتالىعى ءۇشىن اۋىز تولتىرىپ ايتاتىن-اق شارۋا. تۇرعىن ءۇي كەزەگىندە جۇزدەگەن ادام تۇر. سەڭ قوزعالعانىن كورگەن ولاردىڭ ەرتەڭگە دەگەن سەنىمدەرى نىعايىپ قالدى.
بۇل جولى باعى جانعانداردىڭ ىشىندە اتا-اناسىنان ايىرىلعان 7 جەتكىنشەك, الەۋمەتتىك جاعىنان از قامتىلعان 10 وتباسى بار.
–12 جىل كەزەكتە تۇردىم,–دەيدى وتىز جىل ءبىلىم سالاسىندا ەڭبەك ەتكەن التىنشاش اسقاروۆا,–بۇگىن قولىمىز جەتتى, قۋانىشتىمىز.
ءبىر ادام بولسا دا قۋانا بەرگەنگە نە جەتسىن؟!
بايقال ءبايادىل,
«ەگەمەن قازاقستان»
استراحان اۋدانى