بيىل ماڭعىستاۋ وبلىسىندا العاش رەت ءوز ءىسىن باستاپ, كاسىپ اشامىن دەگەن تۇرعىندارعا 1 پايىزبەن نەسيە بەرەتىن «نۇر كاپيتال» جوباسى باستاۋ العان بولاتىن. از ۋاقىتتىڭ ىشىندە 765,87 ملن تەڭگەگە 39 جوبا ماقۇلدانعان. ونىڭ تەڭ جارتىسى جاڭا جوبانىڭ يگىلىگىن كورىپ ۇلگەردى. بۇل تۋرالى وڭىرلىك كوممۋنيكاتسيالار قىزمەتىندە سۇحبات بەرگەن وبلىستىق كاسىپكەرلىك جانە ساۋدا باسقارماسىنىڭ باسشىسى ۆەنەرا مۇستاپاەۆا مەن «دامۋ» قورى ماڭعىستاۋ وبلىسى بويىنشا ايماقتىق فيليالىنىڭ ديرەكتورى گۇلجان قالىمبەتوۆا مالىمدەدى.
- ماڭعىستاۋ وبلىسىندا كاسىپكەرلىكتى دامىتۋعا «دامۋ» قورىمەن 1,8 ملرد تەڭگە, ماڭعىستاۋ وبلىستىق اكىمدىگىمەن 900 ملن تەڭگە ءبولىندى. وسىلايشا, «نۇر كاپيتال» ايماقتىق باعدارلاماسىن ىسكە اسىرۋعا باعىتتالعان قاراجاتتىڭ جالپى سوماسى 2,7 ملرد تەڭگەنى قۇرادى. باعدارلاما اقتاۋ قالاسىن قوسپاعاندا, ماڭعىستاۋ وبلىسىندا تىركەلىپ, جوبالارىن جۇزەگە اسىرىپ جۇرگەن شاعىن جانە ورتا كاسىپكەرلىك سۋبەكتىلەرىن قارجىلاندىرۋ ءۇشىن ازىرلەنگەن. كاسىپكەرلەر ءۇشىن اقىرعى مولشەرلەمە 1%-دى قۇرايدى, نومينالدى مولشەرلەمە جىلدىق 8,5%-دان كوپ ەمەس, 7,5%-ى سۋبسيديالانادى, ءبىر قارىز الۋشىعا قويىلاتىن ليميت 30 ميلليون تەڭگەدەن اسپاۋى كەرەك. بۇل باعدارلاما بويىنشا «سبەربانك» اق ەب, «ForteBank» اق, «حالىق بانكى» اق جف, «حالىق بانكى» اق موف, «بانك تسەنتر كرەديت» اق بانكتەرى ارىپتەس بولۋدا, دەيدى «دامۋ» قورى ماڭعىستاۋ وبلىسى بويىنشا ايماقتىق فيليالىنىڭ ديرەكتورى گ.قالىمبەتوۆا.
1 پايىزبەن نەسيە بەرەتىن اتالمىش جوبا ەلىمىزدە العاش رەت ماڭعىستاۋ وبلىسىندا باستالدى. كەلەر جىلى اتالعان جوبانى وزگە دە ايماقتار جۇزەگە اسىرۋدى جوسپارلاپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى