قازاقستان رەسپۋبليكاسى قارۋلى كۇشتەرىنىڭ اسكەري-تاريحي مۋزەيىندە ەلىمىزگە بەلگىلى سۋرەتشى جانە قازاقتىڭ قارۋ-جاراق ەتنوگرافياسىن زەرتتەۋشى-عالىم قاليوللا احمەتجاننىڭ «ميف. ەپوس. تاريح» اتتى جەكە كورمەسى ءوتتى.
قاليوللا سامات ۇلى – سانكت-پەتەربۋرگ قالاسىندا ورنالاسقان ي.ە.رەپين اتىنداعى كەسكىندەمە, ءمۇسىن جانە ارحيتەكتۋرا ينستيتۋتىنىڭ تۇلەگى جانە قازاقتىڭ اسكەري ءداستۇرلى قارۋ-جاراق تاريحىن زەرتتەپ جۇرگەن بىلىكتى مامان. اتالمىش سالا بويىنشا اۆتور 100-دەن اسا عىلىمي-تانىمدىق ماقالا جانە ءۇش ۇلكەن مونوگرافيا جازعان. سۋرەتشىنىڭ كوركەم تۋىندىلارى قازىر انگليا, اقش, شۆەتسيا, پاكىستان, جاپونيا, گەرمانيا, يران, قىتاي, تۇركيا جانە رەسەي ەلدەرىندەگى جەكە كوللەكتسيالار قورىندا ساقتاۋلى تۇر.
ەتنوگراف-سۋرەتشىنىڭ وسى جولعى كورمەسىنە 120-دان استام تۋىندى كورەرمەن نازارىنا ۇسىنىلعان ەكەن. اتاپ ايتقاندا, «قازاق حالىق ەرتەگىسى» جانە «سىرتتاندار» مۋلتفيلمىنە جاساعان ەسكيزدەرى, قازاق جاۋىنگەرىنىڭ ءحVىىى عاسىرداعى قورعانىس جاراقتارى (دۋلىعا, كىرەۋكە, شاراينا, جاۋىنگەرلىك جەڭسە, تىزەلىك), سونداي-اق كوشپەندىلەردىڭ ورتا عاسىردا قولدانعان جاۋىنگەرلىك جادىگەرلەردىڭ ارحەولوگيالىق جانە يكونوگرافيالىق جاڭعىرتپاسى, عۇن ساربازدارىنىڭ كيىمى مەن قارۋ-جاراعىنىڭ رەكونسترۋكتسياسى, ارحەولوگيالىق ماتەريالدار بويىنشا جاساعان ساق جاۋىنگەرىنىڭ كيىمى مەن قارۋ-جاراق كەشەنى, سونىمەن قاتار ەركىن تاقىرىپتا فولكلورلىق وبرازدار نەگىزىندە جازىلعان كوركەم كەسكىندەر: «بايشۇبار», «تايبۋرىل», «شالقۇيرىق», تاعى باسقا كارتينالارى بار. بۇلاردان باسقا شەبەردىڭ عىلىمي ەڭبەكتەرى مەن اۆتورلىق قولجازبالارى دا كورمە تورىنە ورنالاسىپتى.
بەكەن قايرات ۇلى,
«ەگەمەن قازاقستان»