بوب ديلان ءوزىنىڭ 15-ءشى ستۋديالىق البومىن دايىنداۋ ءۇشىن 1974 جىلدىڭ 16 قىركۇيەگىندە نيۋ-يوركتەگى A & R دىبىس جازۋ ستۋدياسىنا بارادى. 33 جاستاعى اقىننىڭ نەكەسى قىل ۇستىندە ەدى.
سول جىلى تابىستى بولعان تۋرىنا قاراماستان ونىڭ بەدەلى تەك ون جىل بۇرىن داۋىرلەگەن اندەرىمەن عانا تىكەلەي بايلانىستى بولدى. 1960-شى جىلداردىڭ سوڭىندا ديلان ۆۋدستوكتاعى باس تارتۋىنان كەيىن مارگينالدانعان فيگۋراعا اينالدى. ونىڭ سول جەردەن تاپقان ىشكى تۇراقتىلىعى 1969 جىلى جازىلعان «Nashville Skyline-دان» 1974 جىلداعى «Planet Waves-عا» دەيىنگى ءساتسىز ءارى شىعارماشىلىق فوكۋسسىز البومداردىڭ جارىققا شىعۋىن تەزدەتتى. ەندى وسىنىڭ ءبارىنىڭ وزگەرەتىن ۋاقىتى تۋعان ەدى.
«Blood on the Tracks» شەدەۆرىن جاساۋ دا ديلاننىڭ ۇزاق مانسابى سياقتى شىتىرمانعا تولى بولدى. البومنىڭ نۇسقاسى نيۋ-يوركتەگى ستۋديادا ءتورت كۇندە اياقتالدى, ديلاننىڭ شىدامسىز شىعارماشىلىق قارقىنى ونىڭ اندەرىن ناقتىلاۋ ءۇشىن جينالعان توپتى شاتىستىردى. گيتاريست ەريك ۆايسبەرگ كەيىنىرەك بۇل ساتتەردى ەسكە تۇسىرگەندە «مەن بوبتىڭ ءان جازۋ بارىسىنا اسا نازار اۋدارماعانى ءارى قىزىقپاعاندىعى تۋرالى انىق ءبىلدىم. ول كوپ شاراپ ءىشتى, ول ءسال ۇقىپسىز بولدى, بىراق ول انىق قاتەلىكتەردى تۇزەتپەي, كەلەسى انگە اۋىسىپ العا جىلجۋدى تالاپ ەتتى» دەيدى. سەسسيانىڭ ەكىنشى كۇنىندە التى مۋزىكانتتىڭ بىرەۋى عانا قالدى.
البومنىڭ شىعارىلىمى جەلتوقسان ايىنىڭ سوڭىنا جوسپارلانعان ەدى. البوم مۇقاباسى باسىپ شىعارىلدى, جارنامالىق ناۋقان اياقتالىپ, تاڭداۋلى راديوستانتسيالارعا سىناق تيراجدارى دا تاراتىلىپ قويدى. كوڭىلى تولماعان ديلان روجدەستۆونى ءوزىنىڭ اعاسى ءارى سەنىمدى دوسى دەۆيد تسيممەرمانمەن وتكىزدى. البومدى تىڭداعان دەۆيد اندەردىڭ تىم وتكىر جانە قاراپايىم حالىقتىڭ كوڭىلىنەن شىقپايتىنىن ايتىپ, سول سەبەپتى ونىڭ كوممەرتسيالىق تۇرعىدا ساتسىزدىككە ۇشىرايتىنىن جەتكىزدى. بويىن قورقىنىش بيلەگەن ديلان ءوزىنىڭ تريۋمفالدى قايتا ورالۋىن شەگەرىپ, سوڭعى مينۋتتا البومنىڭ شىعارىلماۋىن تالاپ ەتەدى.
سودان كەيىن ون ءاننىڭ بەسەۋى ميننەاپوليستەگى Sound 80 ستۋدياسىندا روجدەستۆودان كەيىنگى اپتادا ەكى كۇندە شۇعىل ارادا جەرگىلىكتى مۋزىكانتتاردان قۇرالعان توپپەن قايتا جازىلعان. قايتا وڭدەلگەن البوم 1975 جىلدىڭ 20 قاڭتارىندا تەز ارادا جارىق كوردى. وسىنداي تۇسىنىكسىز ءارى قيىن ءمان-جايلاردىڭ ورتاسىندا كەرەمەت ونەر تۋىندىسى دۇنيەگە كەلدى.
Blood on the Tracks جارىققا شىققان كۇننەن باستاپ, مەنىڭ دە ءومىرىمنىڭ ساۋندترەگىنە اينالدى. بۇل ءان دە ۆان مورريسوننىڭ «Astral Weeks» پەن مارۆين گاياننىڭ «What’s Going On» جانە ديلاننىڭ 1966 جىلى شىققان «Blonde on Blonde» سياقتى كلاسسيكالىق اندەر قاتارىنا جايعاستى. 1990 جىلداردىڭ ورتاسىندا «Blood on the Tracks: The New York Sessions» دەگەن اتپەن سD جارىق كوردى, بۇل تاسپانىڭ بەيرەسمي نۇسقاسى رەسمي جارىق كورگەننەن سوڭ كوپ ۇزاماي شىقتى. بۇنىڭ تىزىمىنە بۇرىنعى, سپارتاندىق «If You See Her, Say Hello and Idiot Wind» سياقتى اندەرى كىردى. ۋاقىت وتە كەلە مەن رەسمي نۇسقالارعا قاراعاندا بەيرەسميلەرىن وتە جاقسى كوردىم, ويتكەنى شيكى ءارى ءالى اياقتالماعان كۇيدە ولار سەزىمتال جانە اشىق ەستىلەدى.
شون و'حاگان
اۋدارعان ءمادينا جالەلقىزى
«ەگەمەن قازاقستان»