تəۋەلسىزدىك بىزگە قۇدايدىڭ بەرگەن سىيى. بۇل – قاسيەتتى ۇعىم. بۇگىندە ەلىمىز ەڭسە تىكتەدى. رەسپۋبليكامىزدا حالىقارالىق دەڭگەيدەگى تالاي اۋقىمدى شارا وتكىزىلدى. دەگەنمەن ءəلى دە اتقارىلاتىن دۇنيەلەر شاش ەتەكتەن ەكەنى بەلگىلى. سوندىقتان ءبىز ارقانى كەڭگە الماي, وسى ۋاقىتقا دەيىن قول جەتكىزگەن جەتىستىكتەرىمىزدى ەسەلەي ءتۇسۋىمىز كەرەك. سول كەزدە مەملەكەت دامۋى قارقىن الادى. Əرينە بۇل وڭاي شارۋا ەمەس. ول ءۇشىن ەلىمىزدىڭ ءəربىر وعلانى ءوز سالاسىندا ۇزدىك اتانىپ, ءəربىر ازامات شاما-شارقىنشا ەلىمىزدىڭ دامۋىنا ۇلەس قوسۋى ءتيىس.
سپورتشى رەتىندە ەلىمىز تاۋەلسىزدىك العاننان كەيىن ەكى بىردەي وليمپيادا الامانىندا ەلىمىزدىڭ كوك تۋىن كوتەرگەنىم ءالى كۇنگە دەيىن كەۋدەمدى ماقتانىش كەرنەيدى. ەلىمىز جەكە-دارا مەملەكەت رەتىندە 1996 جىلعى اقش-تىڭ اتلانتا قالاسىندا وتكەن جازعى وليمپيا ويىندارىنا تۇڭعىش رەت قاتىستى. الەمنىڭ الپاۋىت مەملەكەتتەرى قاتىساتىن ءتورت جىلدىقتىڭ باستى دوداسىنا قازاقستان سپورتشىلارى دا وزگەلەرمەن يىق تىرەسىپ, جۇلدە ءۇشىن تالاستى. سول بايراقتى دودادا قازاقستاننىڭ بايراعىن ۇستاپ شىعۋ باقىتى ماعان بۇيىردى. العاش رەت وليمپياداعا قاتىسىپ جاتساق تا, قازاقتىڭ نامىستى ۇل-قىزدارى 3 التىن, 4 كۇمىس جانە 4 قولا مەدال ولجالادىق.
ءتورت جىلدان كەيىن سيدنەي وليمپياداسىنا قاتىسۋعا جولداما الىپ قانا قويماي, ەكىنشى رەت كوك تۋدى سيدنەي تورىندە الىپ شىعۋ مارتەبەسى ماعان بۇيىردى. ەكىنشى رەت ءوز موينىما ۇلكەن جاۋاپكەرشىلىكتى العانىمدى سەزىندىم. ەلباسى نۇرسۇلتان نازارباەۆ ماعان تۋدى تاپسىرعان كەزدە: «نۇرسۇلتان ءابىش ۇلى, ءسىز بەرگەن كوك بايراقتى سيدنەي ارەناسىندا ابىرويمەن الىپ ءوتىپ, وزىڭىزگە ابىرويمەن اكەلىپ تاپسىرامىن» دەگەن بولاتىنمىن. وسىنداي ۋادەمەن وليمپياداعا اتتانىپ, كوك تۋىمىزدى ابىرويمەن ەلباسىنا تابىستاعانىم ءالى كۇنگە دەيىن كوز الدىمنان كەتپەيدى. تۋدى پرەزيدەنتىمىزگە تابىستاپ تۇرعانىمدا ول كىسى ماعان: «اينالايىن ەرماحان, ەر ەكەنسىڭ! كوك تۋىمىزدى كوككە كوتەرىپ, سونى التىن جۇلدەمەن ماعان تاپسىرعانىڭ ءۇشىن راحمەتىمدى ايتامىن», دەدى. ەلباسىنىڭ بۇل ءسوزى ماعان وليمپيادانىڭ التىن جۇلدەسىنەن دە قىمبات بولدى.
الداعى ۋاقىتتا دا كوك تۋدى ابىرويمەن كوتەرەتىن تالاي ساڭلاق شىعاتىنىنا مەن كامىل سەنىمدىمىن. ەلىمىز تىنىش, تاۋەلسىزدىگىمىز باياندى بولسىن!
ەرماحان ىبىرايىموۆ,
سيدنەي وليمپياداسىنىڭ چەمپيونى