قازاق حالقىنىڭ تاۋەلسىزدىككە جەتۋ جولى اۋىر بولدى. بۇل كەيبىرەۋلەر ويلاعانداي, اللانىڭ بەرە سالعان ەرەكشە سىيى ەمەس. كەرىسىنشە, نەبىر قيلى تاريحتى باستان كەشتى. «اقتابان شۇبىرىندى, القاكول سۇلامادان» ءوتتى. كونە تاريحتى بىلاي قويىپ, كەڭەس وكىمەتىنىڭ كەزىندە دە ءبىزدىڭ كورگەن قۇقايىمىز از بولعان جوق.
حح عاسىردىڭ 20-جىلدارى حالقىمىزدىڭ باسىنان وتكەن قۋعىن-سۇرگىندەر, قولدان ۇيىمداستىرىلعان اشارشىلىقتار, 30-جىلداردىڭ ويرانى – بارلىعى ناعىز ناۋبەت جايلاعان, ەل باسىنا قارالى كۇن تۋعان كۇندەر ەدى. «ەگەمەن قازاقستان» گازەتىنىڭ تاريحىنان «ماڭگىلىك ەلدىڭ عاسىرلىق شەجىرەسى» دەگەن كوپ تومدىق كىتاپتى ازىرلەۋ ۇستىندە بۇعان تاعى دا ءبىر رەت كوز جەتكىزە تۇستىك. وسىلايشا, مىڭ ءولىپ, مىڭ تىرىلگەن قازاق حالقى ابىلايلار ارمانداعان ەگەمەن زامانعا دا جەتتى. تاۋەلسىزدىككە جەتۋ جولى قانداي قيىن بولسا, ونى باياندى ەتىپ ۇستاپ تۇرۋ ودان دا قيىن ەكەندىگىن ءومىر كورسەتىپ وتىر.
وسىعان بايلانىستى, شەتەلدىك بەلگىلى ءبىر ساياساتكەردىڭ تۇجىرىمى ويعا ورالا بەرەدى. وتكەن عاسىردىڭ 90-جىلدارىنىڭ سوڭىنا قاراي, عىلىمي-ادىستەمەلىك بايلانىستى ورناتۋ ءۇشىن امەريكاعا باردىق. ءبىزدىڭ سالامىز بويىنشا ءبىلىم بەرەتىن وقىتۋشى-پروفەسسورمەن ارالاسىپ, شامامىز جەتكەنشە پىكىر الماستىق. سونداي اڭگىمەنىڭ بىرىندە, وكلاحوما شتاتىنداعى ۋنيۆەرسيتەتتىڭ تانىمال پروفەسسورى پارل «قازاق حالقى – جۇرەك جۇتقان باتىر ەل ەكەن. ايداھار مەن ايۋدىڭ ورتاسىندا وتىرىپ, تاۋەلسىزدىكتى باياندى ەتەمىز دەپ كۇرەسىپ جاتىر» دەگەن ەدى. قاپەلىمىزدە نە دەرىمىزدى بىلمەي, اڭتارىلىپ قالدىق. سوسىن ىلە سوزگە ارالاسىپ, «وندا نەگە قازاق جەرىندە ورناتقان اتوم قارۋىنىڭ كوزى قۇرىعانشا اسىق بولدىڭىزدار؟» دەدىم. سوندا بەلگىلى ساياساتكەر «اتوم قارۋى سىزدەردىڭ تاۋەلسىزدىكتەرىڭىزگە كەسىرىن تيگىزبەسە, پايداسىن كورە المايتىن ەدىڭىزدەر. پرەزيدەنتتەرىڭىز كورەگەندىك جاسادى. سىزدەر وزدەرىڭىزدى ۇلتتىق مەملەكەت رەتىندە ءومىر سۇرە الاتىندارىڭىزدى دالەلدەۋلەرىڭىز كەرەك. ياعني, تاريحى تەرەڭ, سالت-ءداستۇرى بار, وركەنيەت جولىنا تۇسكەن, ونەر, ءبىلىم مەن عىلىمدى سەرىك ەتكەن ەل بولۋلارىڭىز قاجەت. سوندا عانا ارماندارىڭىزعا جەتەسىزدەر» دەگەن تۇجىرىمى بۇگىنگە دەيىن ويىمنان كەتپەيدى.
قازىر ەلىمىزدى الەم تانىدى, حالىقارالىق ساياسات تا بىزبەن ساناساتىن بولدى. ءتۇرلى حالىقارالىق ۇيىمعا مۇشەلىككە ءوتىپ, ءتىپتى, كەيبىرىنە جەتەكشىلىك جاساپ تا ءجۇرمىز. ءوزى قۇرالپى ەلدەرمەن سالىستىرعاندا, ەكونوميكامىز دا ءبىراز دامىدى. ەندىگى جەردە ەلباسىنىڭ « ۇلى دالانىڭ جەتى قىرى» اتتى باعدارلامالىق ماقالاسىندا كورسەتىلگەن ۇلتىمىزدىڭ جەتى كەرەمەتىن قاستەرلەپ, امەريكالىق عالىم ايتقانداي, الەمگە تانىتۋىمىز كەرەك. سوندا عانا ۇلى دالانىڭ يەسى قازاق حالقىنىڭ تاۋەلسىزدىگى باياندى بولارى انىق.
نامازالى وماشەۆ,
قازاقستاننىڭ ەڭبەك سىڭىرگەن قايراتكەرى