قازاقستان يراننىڭ يادرولىق باعدارلاماسىنا قاتىستى جان-جاقتى قامتىلعان بىرلەسكەن ءىس-قيمىلدار جوسپارىن (جقبىج) ايماقتاعى يادرولىق قاۋىپسىزدىكتى قامتاماسىز ەتۋدىڭ ءتۇيىندى قۇجاتى رەتىندە قاراستىرادى. بۇل جونىندە قازاقستاننىڭ بۇۇ جانىنداعى تۇراقتى وكىلى قايرات وماروۆ بۇۇ قاۋىپسىزدىك كەڭەسىنىڭ اشىق وتىرىسىندا جاريا ەتتى, دەپ حابارلايدى ءسىم ءباسپاسوز قىزمەتى.
بۇۇ قاۋىپسىزدىك كەڭەسى 12 جەلتوقساندا بۇۇ باس حاتشىسىنىڭ 2231 قارارىنىڭ ورىندالۋى تۋرالى التىنشى جارتىجىلدىق بايانداماسىن قاراستىردى. باياندامانىڭ نەگىزگى مازمۇنىمەن كەڭەس مۇشەلەرىن بۇۇ باس حاتشىسىنىڭ ساياسي ماسەلەلەر جونىندەگى ورىنباسارى روزماري ديكارلو تانىستىردى. وتىرىسقا اقش مەملەكەتتىك حاتشىسى مايكل پومپەو قاتىستى.
«قازاقستان پرەزيدەنتى نۇرسۇلتان نازارباەۆتىڭ بۇۇ قاۋىپسىزدىك كەڭەسىنە ارناعان ساياسي جولداۋىندا اتالعانداي, قازاقستان يران يادرولىق باعدارلاماسى توڭىرەگىندەگى احۋالدى رەتتەۋ بويىنشا بىرلەسكەن ءىس-قيمىلدار جوسپارىنا جانە ونىڭ ودان ءارى جۇزەگە اسىرىلۋىنا ءوز قولداۋىن جالعاستىرىپ كەلەدى. ءبىز بۇل قۇجاتتىڭ ايماقتاعى بەيبىتشىلىك پەن تۇراقتىلىقتى ساقتاپ قالۋداعى ماڭىزدى ءرولىن, سونداي-اق يراننىڭ ءتۇرلى سالالارداعى ىنتىماقتاستىعىنىڭ جاڭا كەلەشەگى ءۇشىن ماڭىزى زور ەكەندىگىنە سەنىمدىمىز», - دەدى ق. وماروۆ.
بۇۇ باس حاتشىسىنىڭ بايانداماسىندا: «جقبىج- يادرولىق قارۋدى تاراتپاۋ سالاسىنداعى ماڭىزدى جەتىستىك, ءارى ديالوگ پەن ديپلوماتيا تيىمدىلىگىنىڭ كورنەكتى دالەلى» - دەلىنگەن. قازاقستان وسى كەلىسسوزدەر ۇدەرىسىنە 2013 جىلى الماتىدا ەكى سىندارلى كەزدەسۋلەر ۇيىمداستىرۋ ارقىلى تاريحي كەلىسىمگە قول جەتكىزۋگە ءوز ۇلەسىن قوسقانىن ماقتان تۇتادى.
قازاقستاندىق دەلەگاتسيا باسشىسى كەلىسىمنىڭ ىسكە اسىرىلۋىنان ونىڭ بارلىق تاراپتارى پايداسىن كورۋى ءتيىس دەگەن بۇۇ باس حاتشىسىنىڭ ۇندەۋىن قولداپ ءوتتى. سونىمەن قاتار, كەلىسىم تاراپتارىنىڭ ءوز ەكونوميكالىق وپەراتورلارىنا يرانمەن زاڭدى ىنتىماقتاستىعىن بۇۇ قاۋىپسىزدىك كەڭەسى قارارىنىڭ تالاپتارى اياسىندا جۇزەگە اسىرۋ بوستاندىعىن قامتاماسىز ەتۋ ۇمتىلىستارىنا دا پىكىرلەستىگىن ءبىلدىردى.
ق. وماروۆ قازاقستاننىڭ گەوگرافيالىق جاعدايى مەن ترانزيتتىك الەۋەتىن ەسكەرە وتىرىپ, ايماقتىڭ بارلىق ەلدەرىمەن بەلسەندى ارىپتەستىكتى دامىتۋداعى زاڭدى مۇددەلەرىنە نازار اۋداردى. جقبىج-ءنىڭ ورىندالۋىنىڭ ارقاسىندا ايماقتاعى ساۋدا-ەكونوميكالىق ىنتىماقتاستىق پەن دامۋدىڭ ايتارلىقتاي جاندانا ءتۇسۋى اتاپ ءوتىلدى.
«قازاقستان جان-جاقتى قامتىلعان بىرلەسكەن ءىس-قيمىلدار جوسپارى مەن 2231 قارارىنىڭ تاراتپاۋ رەجيمىن نىعايتۋعا جانە ايماقتاعى تۇراقتىلىق پەن بەيبىتشىلىكتى قامتاماسىز ەتۋگە ودان ءارى ۇلەسىن قوسا بەرەدى دەگەن ۇمىتپەن قاۋىپسىزدىك كەڭەسىندەگى ءوز جۇمىسىن اياقتاۋ ۇستىندە», - دەدى قر ەلشىسى ءوز سوزىندە.