«اشىقتىق, ايقىندىلىق جانە قولجەتىمدىلىك ءۇشىن» اتاعىنا ەكىنشى رەت يە بولعان پوليتسيا ۆەدومستۆوسىنا ارنايى كۋالىكتى قوعامدىق كەڭەستىڭ توراعاسى قايىرلى ەدىرەسوۆ تابىستادى.
پوليتسيا گەنەرال-مايورى بەرىك ءبىلالوۆ وبلىستىق, قالالىق جانە اۋداندىق ءماسليحاتتار دەپۋتاتتارىنىڭ الدىندا وسىمەن بەسىنشى رەت ەسەپ بەردى. مۇنداي كەزدەسۋلەر جىلداعى داستۇرگە اينالعان. سونداي-اق, پوليتسەيلەر تۇرعىنداردىڭ, قوعامدىق ۇيىمداردىڭ جانە باق وكىلدەرىنىڭ الدىندا دا ەسەپ بەرەدى.
«جۇمىستىڭ زاماناۋي جاڭا اشىق فورماتى ۆەدومستۆو قىزمەتىن بۇدان دا ايقىن ەتۋگە مۇمكىندىك بەردى. قولجەتىمدىلىكتى جانە تۇرعىنداردىڭ سەنىم دەڭگەيىن ارتتىرۋ ءۇشىن وبلىس پوليتسياسىنىڭ بارلىق قۇرىلىمدارى وزدەرىنىڭ قىزمەتىن فرونت-وفيستەر مەن مامانداندىرىلعان ورتالىقتار ارقىلى جۇزەگە اسىراتىن قىزمەت كورسەتۋدىڭ سەرۆيستىك مودەلىنە كوشتى», دەپ اتاپ ءوتىلدى جيىندا.
ەسەپتىك كەزدەسۋ اياسىندا حالىق قالاۋلىلارى بىرقاتار پوليتسيا وبەكتىلەرىن ارالادى. اتاپ ايتقاندا, كوشى-قون قىزمەتى ورتالىعى, قالالىق پوليتسيا باسقارماسىنىڭ فرونت-ءوفيسى, №10 ۋچاسكەلىك پوليتسيا پۋنكتى, تۇرعىلىقتى مەكەن-جايى جوق تۇلعالارعا ارنالعان تۇنەۋ ورنى, اتۋ ءتيرى مەن پوليتسيا ۆەدومستۆوسىنىڭ مۇراجايىنا باردى. قوعامدىق ءتارتىپتى ساقتاۋ مەن ازاماتتاردىڭ قاۋىپسىزدىگىن قامتاماسىز ەتۋ بويىنشا جۇمىس تيىمدىلىگىن ارتتىرۋ ءۇشىن ەنگىزىلگەن بەينەباقىلاۋ جۇيەسىمەن جانە باسقا دا وزىق تەحنولوگيالارمەن تانىستى.
مۇنداي تاعىلىمدى ءىس-شارالاردىڭ ماقساتى پوليتسيا دەپارتامەنتىنىڭ اشىق ۇدەرىسىن قامتاماسىز ەتۋ, جەدەل-قىزمەتتىك جۇمىس, ماتەريالدىق-تەحنيكالىق قامتاماسىز ەتۋ, قارجىلىق ايقىندىلىعى جايلى اقپاراتتاندىرۋ بولىپ تابىلادى. وڭىردەگى كريمينوگەندىك احۋال, كوشەلەر مەن اۋلالارداعى, ويىن-ساۋىق ورىندارىنداعى قوعامدىق ءتارتىپ, قاۋىپسىزدىك ۇدايى باقىلاۋدا. دەپۋتاتتار وبلىستىق پوليتسيا باسشىلىعىنىڭ الداعى جىلدى «ەسىرتكىسىز بولاشاق» جىلى دەپ جاريالاۋ جانە سينتەتيكالىق ەسىرتكىگە قارسى كۇرەستە مەملەكەتتىك ورگاندار مەن مۇددەلى ۆەدومستۆولاردىڭ جۇمىسىن ۇيلەستىرۋ تۋرالى شەشىمىن قولدادى. بۇل جۇمىستار ەلباسىنىڭ 2019 جىلدى جاستار جىلى دەپ جاريالاۋى تۋرالى باستاماسى اياسىندا ىسكە اسىرىلادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى