جالاعاش كەنتىنىڭ نىسانباي جىراۋ كوشەسىندەگى №136 ءۇيدىڭ ەسىگى قىسى-جازى جابىلمايدى دەۋگە بولادى. سەبەبى, مۇندا عاسىر جاساعان راۋشان اتتى انا تۇرادى. بىلەتىندەر ونىڭ اتىن اتامايدى, «الىپ انا» دەيدى. ونىڭ دا وزىندىك سەبەبى بار. ەندى سونىڭ ءمان-جايىنا توقتالايىق.
راۋشان اپا جاس كەزىندە سوۆحوزدا ساۋىنشى بولىپ جۇمىس جاساپ جۇرگەندە, سول شارۋاشىلىقتا قاسىنا جان جۋىتپايتىن سۇزەگەن بۇقا بولىپتى. بىردە جۇمىستا جۇرگەن راۋشان ويدا جوقتا سول بۇقامەن بەتپە-بەت كەزدەسىپ قالىپتى. قاشۋعا ءمۇمكىندىك بولماسا كەرەك. بۇقا قاراپ تۇرسىن با, مۇيىزىمەن تۇيرەمەك بولىپ ۇمتىلعان عوي. سول كەزدە جاس كەلىنشەك قوس قولىمەن ونىڭ مۇيىزىنەن ۇستاي الىپ, جەر تابانداپ تۇرىپ العان كورىنەدى.
جالاعاش كەنتىنىڭ نىسانباي جىراۋ كوشەسىندەگى №136 ءۇيدىڭ ەسىگى قىسى-جازى جابىلمايدى دەۋگە بولادى. سەبەبى, مۇندا عاسىر جاساعان راۋشان اتتى انا تۇرادى. بىلەتىندەر ونىڭ اتىن اتامايدى, «الىپ انا» دەيدى. ونىڭ دا وزىندىك سەبەبى بار. ەندى سونىڭ ءمان-جايىنا توقتالايىق.
راۋشان اپا جاس كەزىندە سوۆحوزدا ساۋىنشى بولىپ جۇمىس جاساپ جۇرگەندە, سول شارۋاشىلىقتا قاسىنا جان جۋىتپايتىن سۇزەگەن بۇقا بولىپتى. بىردە جۇمىستا جۇرگەن راۋشان ويدا جوقتا سول بۇقامەن بەتپە-بەت كەزدەسىپ قالىپتى. قاشۋعا ءمۇمكىندىك بولماسا كەرەك. بۇقا قاراپ تۇرسىن با, مۇيىزىمەن تۇيرەمەك بولىپ ۇمتىلعان عوي. سول كەزدە جاس كەلىنشەك قوس قولىمەن ونىڭ مۇيىزىنەن ۇستاي الىپ, جەر تابانداپ تۇرىپ العان كورىنەدى. مۇنداي كەدەرگىگە بۇرىن-سوڭدى كەزىكپەگەن الگى بۇقا بار پارمەنىمەن وڭدى-سولدى بۇلقىنسا كەرەك. سول كەزدە قوس ءمۇيىزى قابىعىمەن سىپىرىلىپ كەلىنشەكتىڭ قولىندا قالىپتى. ءبىر عاجابى الگى بۇقا سودان كەيىن ادامعا ۇمتىلۋىن قويعان كورىنەدى. بۇل وقيعا تەز ارادا اۋدان كولەمىندەگى ەلدى-مەكەندەردىڭ بارلىعىنا تارايدى. سۇزەگەن بۇقانىڭ تىرىدەي قوس ءمۇيىزىن ج ۇلىپ العان بۇل ءوزى نەتكەن الىپ كەلىنشەك دەپ ونى كورۋگە ارنايى كەلۋشىلەر قاتارى دا از بولماپتى.
مىنە, ءبىز بۇگىن ۋاقىتىندا الىپ كەلىنشەك اتانعان, 101 جاستاعى راۋشان اپانىڭ ۇيىنە كەلىپ وتىرمىز.
اپامىز مۇنتازداي تاپ-تازا بولمەدە دەمالىپ جاتىر ەكەن. ءبىز بارعاننان كەيىن اسىقپاي تۇرىپ, سالەمدەسىپ بولعان سوڭ جايعاسىپ وتىرىڭدار دەگەندەي يشارات ءبىلدىردى. ءسوزدى كەلىنى باقىتكۇل باستادى.
– ەنە, بۇل كىسىلەر سىزگە ارنايى كەلىپتى. قازىر ءسىزدى سۋرەتكە تۇسىرەدى. ءوزىڭىز جايلى گازەت بەتىنە ماقالا جازباق, – دەدى.
وسى ءساتتى كۇتىپ تۇرعانداي مەنىڭ سەرىگىم, اۋداندىق «جالاعاش جارشىسى» گازەتىنىڭ فوتوتىلشىسى ماحامبەت احمەتوۆ ءوز قىزمەتىنە كىرىسىپ تە كەتتى.
ءبىز راۋشان اپايدان ءوزى جايلى اڭگىمە ايتىپ بەرۋىن وتىندىك.
– بۇقارباي باتىر بابامىزدىڭ جۇبايى شىنار انامىزدان ءۇش بالا بولىپتى. ولار: كوتىبار, الدانازار, تومان. بۇلاردىڭ ۇشەۋىنەن دە ۇرپاقتار بار. مەن الدانازار اتامنىڭ بالاسى سەرالى اكەم مەن دامەگۇل شەشەمنىڭ وتباسىندا 1901 جىلى دۇنيەگە كەلىپپىن. اتام الدانازار ءۇش جۇزگە بەلگىلى, دۋالى اۋىزدى, ءارى ادىلەتتى, ءارى تاپقىر, ءارى وتكىر ازامات بولىپتى. ەل اراسىندا الدانازار ايتىپتى دەگەن ونەگەلى, وسيەتتى سوزدەر كوپ. مەن جاس كەزىمدە سول اتامنىڭ اڭگىمەسىن ەستىپ وسكەنمىن.
اتام جازعىتۇرىم جايلاۋعا كوشىپ شىققاننان كەيىن كوگالعا كىلەمدى توسەتىپ, ونىڭ ۇستىنە قات-قابات سالىنعان كورپەگە جايعاسىپ وتىراتىن ەدى. جاي وتىرمايتىن, اينالاسىنا بارلىق نەمەرەلەرىن, اۋىلدىڭ بارلىق بالالارىن جيناپ الىپ, ۇلداردى ءوز الدىنا, قىزداردى ءوز الدىنا كۇرەستىرەتىن. سوندا مەن ءوز قاتارلارىمنىڭ بارلىعىنان دا باسىم تۇسەتىنمىن. اتام الدانازار 1928 جىلى كوكتەمدە, ەل قاراقۇمعا كوشىپ بارا جاتقاندا «جىڭعىلدى قاق» دەگەن جەردە, 84 جاسىندا قايتىس بولدى. اتامنىڭ دەنەسىن اكەسى بۇقارباي باتىر بابامنىڭ قاسىنا جەرلەدى دەگەن ول اڭگىمەسىن ودان ءارى جالعاستىرىپ اكەتتى. – ءيا, ۋاقىت ءشىركىن ءوز دەگەنىن جاسايدى ەكەن. جاس ۇلعايعان سوڭ ادام ۇمىتشاق بولا ما دەيمىن. ايتايىن دەسەڭ, كوپ نارسە ەستە ساقتالماپتى. بىزدەر جاسىمىزدا «قىزعا قىرىق ۇيدەن تيىم» دەگەن ءسوزدى ەستىپ, قازاقتىڭ سالت-ءداستۇرىن ۇلكەندەردىڭ ايتۋى بويىنشا ەسىمىزدە ساقتاپ, ونى ءىس جۇزىندە ورىنداۋعا تالپىنىپ وسكەن ۇرپاقپىز.
اكەم مەن بەسىكتە جاتقاندا ءوزىنىڭ زامانداسى تابىن رۋىنىڭ موڭكە اتالىعىنىڭ قارجاۋباي اتتى ازاماتىمەن قۇدا بولۋعا ۋاعدالاسىپتى.
سوناۋ جىلدارداعى زوبالاڭ زاماندا اكەمنىڭ قۇداسى وزبەكستان جاققا قونىس اۋدارىپ, ەلگە كەيىن ورالىپتى. ولاردان حابار كۇتكەن اكە-شەشەم مەنى اتالعان جەرگە تۇرمىسقا 16 جاسىمدا شىعاردى. كەلىن بولىپ, تۇسكەننەن كەيىنگى باستى ماقساتىم – ءوز اۋلەتىمە كىر كەلتىرمەي, بارعان جەرىمە سۋداي ءسىڭىپ كەتۋ بولدى. شۇكىر, ول ماقساتىما دا جەتتىم. دۇنيەگە سەگىز پەرزەنت اكەلدىم. وكىنىشتىسى التاۋى جاستايىنان شەتىنەپ, ورىنكۇل مەن ورىنبەك قانا ۇرپاق جالعاستىرىپ وتىر.
جالپى, ەلىمىزدە ءاربىر وتباسىنان ۇلى وتان سوعىسىنا قاتىسپاعان ادام كەمدە-كەم, تىپتەن جوقتا شىعار. مۇنداي زوبالاڭ قارجاۋباي اقساقالدىڭ دا وتباسىن شارپىپ ءوتتى. جالعىز ۇلى ەمبەرگەن دە 1942 جىلدىڭ تامىز ايىندا جوسالى ستانساسىنان قىزىل ۆاگونعا ءمىنىپ, سوعىسقا اتتانعان ەدى.
– ەمبەرگەندى, بۇكىل وتباسىمىزبەن, اعايىن-تۋعان بولىپ, شىعارىپ سالدىق. جوسالى ستانساسىنا جينالعان جۇرتتا ەسەپ جوق بولاتىن. جىلاعان ايەلدەردىڭ زارلى داۋىسى ارادا قانشا جىل وتسە دە قۇلاقتان كەتەر ەمەس. بۇل ءبىر ەستەن كەتپەيتىن كۇن بولدى. اسىرەسە, كۇيەۋىمنىڭ «بالالاردىڭ امانشىلىعىنا قارا» دەگەن ءسوزى قۇلاعىمدا الىگە دەيىن ىزىڭداپ تۇرعانداي بولادى, – دەپ اياقتادى ءسوزىن راۋشان اپا.
قولىندا قارت اتا-ەنەسى جانە ەكى بالامەن قالعان ول ەندى ءۇي شارۋاسىمەن وتىرا بەرۋگە بولمايتىندىعىن كۇيەۋى سوعىسقا اتتانعان كۇنىنەن-اق سەزىنە باستادى. ول كەزدە وتىرعان قونىستارى «يىركول» اتالاتىن كولحوز ورتالىعى ەدى. تۇرمىس قيىندىعىمەن كۇرەسۋگە بەلدى بەكەم بۋعان ول ەڭبەك جولىن ساۋىنشىلىقتان باستادى.
وسى جۇمىستى ول قىرىق جىل بويى, ياعني 70 جاسقا دەيىن اتقارىپتى. وزىمەن ەڭبەكتەس بولعان زەينەتكەرلەردىڭ ايتۋىنشا, راۋشان اپا قانداي سيىر ساۋسا دا ءسۇت بۇلاعىن اعىزعان كورىنەدى. سونى بىلەتىن فەرما مەڭگەرۋشىسى مۇنىڭ الدىنا ەمشەگى قاتتى, ءسۇت بەرگىسى كەلمەيتىن اساۋ سيىرلاردى اكەلىپ بەرەدى ەكەن. ول كەزدە ءسۇت ساۋاتىن تەحنيكانىڭ جوقتىعىنان بارلىق جۇمىس قولمەن ىستەلەتىن. جازدىڭ تاس قايناتار شىلدەسىندە, قىستىڭ قاقاعان قىتىمىر ايازىندا ساۋىن مالىن كۇتىپ باپتاۋ, ودان ءسۇت ساۋىپ الۋ وڭاي شارۋا ەمەس-ءتى. وسىنداي قيىندىققا ول توزە دە ءبىلدى, ونى جەڭە دە ءبىلدى. بۇگىندە وسىنداي عاسىر جاساعان ارداگەر انانىڭ بار ەكەندىگىن بىرەۋ ءبىلسە, بىرەۋ بىلمەيدى. وسى ورايدا بىزدەر, كوپشىلىك قاۋىم, وبلىستىق ارداگەرلەر كەڭەسى ايماق باسشىسىمەن كەلىسە وتىرىپ, وبلىستىق تەلەديداردا, گازەتتەردە «عاسىر عۇمىر عيبراتى» اتتى ايدارمەن عاسىر جاساعانداردى ەلگە تانىستىرۋدى ماقسات تۇتىپ وتىرمىز. مۇنىڭ اسىرەسە, جاستار تاربيەسىنە قوسار ۇلەسى مول دەگەن ويدامىز.
ءاربىر جاقسى باستاما اينالاعا جاقسى جاڭالىق اكەلەدى. وسى باستاما ارقىلى ادام جانىنىڭ ۇزاق ءومىر سۇرۋگە ءمۇمكىندىگى بار ەكەندىگىنە, قولعا السا جەڭبەيتىن قيىندىقتىڭ بولمايتىندىعىنا ءوزىمىز دە كۋا بولىپ وتىرمىز. سونداي كەيىپكەرىمىزدىڭ ءبىرى – ءوزىمىز اڭگىمە ەتىپ وتىرعان راۋشان قوساەۆا اپايىمىز.
اپايىمىزدىڭ ءومىر بەلەستەرىندە كورگەن قيىندىقتارىن اۋىزبەن ايتىپ جەتكىزۋ تىپتەن قيىن. وتكەن عاسىرداعى وتىزىنشى جىلداردىڭ اشارشىلىعىن باسىنان كەشىرگەن انانىڭ ءومىرىڭدەگى ەڭ اۋىر قاسىرەت 1944 جىلى ەمبەرگەننەن قارا قاعاز كەلۋى ەدى. اللانىڭ جازۋىنان ارتىق ەشتەڭە بولمايدى دەگەن توقتامعا كەلگەن ول جارىنىڭ سوعىسقا اتتانىپ بارا جاتقانداعى «بالالاردىڭ امانشىلىعىنا قارا» دەگەن ەڭ سوڭعى ءسوزىن ەسىنە الدى. ەندىگى العا قويعان ەڭ باستى ماقساتى ەكى بالانى امان-ەسەن ەر جەتكىزۋ بولدى. سوعىس جەڭىسپەن اياقتالىپ, بەيبىت ءومىر باستالدى. سوعىستان ابىگەر بولعان حالىق ەندى-ەندى ەسىن جيناي باستادى.
راۋشان اپامىزدىڭ بۇل كەزەڭدەگى ەڭبەك جولى جايلى م.ءشامەنوۆ اتىنداعى اۋىلدىڭ ارداگەرلەر ۇيىمىنىڭ جەتەكشىسى توقسەيىت قابىلوۆ اعامىز بىلاي دەپ سىر شەرتەدى.
– راۋشان مەن ءۇشىن جەڭگە, ال مەن ول ءۇشىن قاينىمىن. ءبىر ءسوزبەن ايتقاندا, ونىڭ كەلىن بولىپ تۇسكەنىن كورگەندەردىڭ ءبىرىمىن. ول كەزدە توي بولعان ۇيگە اۋىل ادامدارىنىڭ تاي-تۇياعى قالماي جينالاتىن ەدى. ءبىز بۇل كەزدە ويىن بالاسى ەدىك. كەيىن كولحوزداستىرۋ ناۋقانى باستالعان كەزدە بۇل ايماقتا «يىركول», «بەلسەندى», «جىگەر» اتتى شاعىن-شاعىن كولحوزدار پايدا بولدى.
1949 جىلدىڭ باسىندا ءۇش كولحوز قوسىلىپ «مولوتوۆ» اتاۋىن الدى. كەيىن «كوممۋنيزم», سوسىن ءمورالى شامەنوۆ اتىنداعى شارۋاشىلىق بولدى. جەڭگەمىز اعامىز سوعىسقا كەتكەننەن كەيىن كولحوزدا ساۋىنشى بولىپ جۇمىس ىستەدى. ساۋىنشىلىقتى زەينەتكە شىققاننان كەيىن دە جالعاستىرىپ, 40 جىل بويى ءسۇت بۇلاعىن اعىزدى. بىرنەشە دۇركىن اۋدان بويىنشا ەڭ ۇزدىك ساۋىنشى اتاندى. موسكۆاداعى اۋىل شارۋاشىلىعى كورمەسىنىڭ بىرنەشە رەت مەدالىن الدى. بۇل ەڭبەكتەگى قولى جەتكەن تابىسى.
ال, ونىڭ كۇندەلىكتى قاراپايىم ومىردەگى ونەگەلى ىستەرى ءوز الدىنا. ول ادامدى جاتىرقاۋ دەگەندى بىلمەيدى. ەشكىمدى ءبولىپ-جارمايدى. ادامنىڭ بارلىعى دا وعان تۋىس. ۇلكەندى دە, كىشىنى دە قۇرمەتتەدى. قانشاما جىل بىرگە كورشى تۇرعاندا ونىڭ بىرەۋگە اشۋ شاقىرىپ, بىرەۋگە رەنجىگەن كەزىن كورگەن ەمەسپىز.
جەڭگەمىز تۇرمىس-تىرشىلىكتىڭ دە, جەسىرلىكتىڭ دە ازابىن كورگەن ادام. كۇيەۋىنەن جاس قالعان كوپ ايەلدەردىڭ قايتادان تۇرمىس قۇرعاندارىنىڭ دا كۋاسى بولدىق. ول دا ءومىر زاڭدىلىعى. ال, ءبىزدىڭ جەڭگەمىز اعامىزدىڭ شاڭىراعىنىڭ ءتۇتىنىن تۇتەتۋدەن جازبادى. بالالارىن تاربيەلەي ءجۇرىپ, باسىنا ءتۇسكەن بارلىق قيىندىقتى جەڭە ءبىلدى.
جەڭگەمىزدىڭ اسا قايراتتى, اسا قارۋلى ايەل بولعاندىعى بۇل ايماقتاعى بارشا جۇرتقا ءمالىم. ءبىر مىسال كەلتىرەيىن.
1964 جىلدىڭ جاز ايلارىنىڭ ءبىرى بولاتىن. ازاڭعى ساۋىننان كەيىن دەم الىپ وتىرعان ساۋىنشىلارعا تاياپ كەلگەن توكەن ءمىنايداروۆ دەگەن ازامات راۋشاننىڭ تۋ سىرتىنان كەلىپ, «جەڭەشە, سەنىڭ كۇشتىلىگىڭدى كورەيىن» دەپ ءوزىنىڭ 150 كيلوگرامدىق سالماعىنا سەنىپ ونى ەكى يىعىنان باسا باستاعان كەزدە, جەڭگەسى وتىرعان كۇيىنشە ەكى قولىمەن قاينىسىن باسىنان اسىرا لاقتىرىپ جىبەرگەنىن ءوز كوزىمىزبەن كورگەنبىز دەدى 90 جاستاعى قاينىسى توقسەيىت قابىلوۆ اعامىز. مۇنداي ءوز زامانىنىڭ الىپ اناسىن قالاي ماداقتاسا دا, قالاي دارىپتەسە دە, قالاي قۇرمەتتەسە دە ارتىق ەمەس. بۇل دا توقسەيىت اقساقالدىڭ ايتقانى. بۇعان ءبىز دە قوسىلامىز.
قىزى ورىنكۇلمەن وتباسىندا كەزدەسىپ, راۋشان اپاي جايلى ءسوز قوزعاعان ەدىك. سوندا سەكسەننىڭ تورىنە تاقاعان ورىنكۇل اپاي بىزگە بىلاي دەدى:
– اپام ءبىزدى جاسىمىزدان ەڭبەك ەتۋگە ۇيرەتتى. قولداعى مالدىڭ قىستىق ازىعىن دايىنداۋ ءىنىم ورىنبەك ەكەۋمىزدىڭ موينىمىزدا بولاتىن. قىستا جاعاتىن وتىندى دا ەكەۋمىز ءازىرلەيتىنبىز. ودان جامان بولعانىمىز جوق. جۇرت قاتارلى ءبىلىم دە الدىق. زەينەتكەرلىككە شىققانعا دەيىن اۋدانداعى ەلەۆاتوردا كۇرىشتى اقتاۋ تسەحىندا ەڭبەك جاسادىم. ءبۇگىندە نەمەرە-شوبەرەلەردىڭ قىزىعىن كورىپ وتىرعان جايىمىز بار. اپامنىڭ دەنە ءبىتىمى, ءجۇرىس-تۇرىسى, وتىرىسى عاسىر جاساسا دا ءوز قالپىنان پالەندەي وزگەرە قويعان جوق. راس, كوزىنىڭ كورۋى ويداعىداي ەمەس. ايتسە دە ەشكىمگە سالماق سالماي ءوزى ءجۇرەدى. ۇيگە اعايىن-تۋىستار كەلسە داۋىسىنان-اق تانيدى. وعان دا شۇكىرشىلىك جاسايمىز. جۇزدەن اسسا دا امان بولسا ەكەن دەپ تىلەيمىز. ءبىزدەرگە ول ءالى بۇرىنعىداي جاس سياقتى كورىنەدى.
وسىنىڭ الدىندا راۋشان اپايمەن اڭگىمە ۇستىندە ورىنكۇل ءسىزدىڭ تۇڭعىشىڭىز با دەپ سۇراعانبىز.
– ءيا, ول تۇڭعىشىم. بىراق ءوزى كىشكەنتايىنان اتا-ەنەمنىڭ باۋىرىندا وسكەندىكتەن, اجەمنىڭ قىزىمىن دەيدى دەدى ول.
– ءسىزدى شە؟
– مەنى اپا دەيدى. ونىڭ ءوزى دە سەكسەنگە قادام باستى. كۇيەۋى قارشابەك ەكەۋى ومىرگە 6 بالا اكەلىپ, 14 نەمەرە ءسۇيىپ وتىر.
– ال, وزىڭىزدەن تاراعان ءۇرىم-بۇتاق قانشا؟
– مەن قىزىم مەن ۇلىمنان 10 نەمەرە,14 شوبەرە, 3 ءشوپشەك ءسۇيىپ وتىرمىن.
اڭگىمە اراسىندا ءاربىر ادامنىڭ ەڭ باستى ارمانى ۇزاق جاساۋ عوي. ءبارى دە جۇزگە جەتۋدى ارماندايدى. الايدا بۇكىل اۋدانداعى 40 مىڭ ادامنىڭ ىشىنەن جۇزدەن اسقانى ەكەۋ عانا. سونىڭ ءبىرى ءوزىڭىز. ءسىزدىڭ ارمانىڭىز بار ما؟ – دەگەنىمىزدە:
– ارمانسىز ادام بولمايدى. ويتكەنى, ارمان بولماسا ءومىر دە بولمايدى. ارينە, مەنىڭ دە ارمانىم بار. وسى بيىل بۇقارباي باتىر بابامىزدىڭ 200 جىلدىق مەرەيتويى بولادى. سوعان قاتىسىپ, سول تويدى كورسەم دەيمىن. ۇرپاعىم امان بولسىن, ەل بيىككە جەتسىن دەپ تە ارماندايمىن.
ارمان دەمەكشى, راۋشان انانىڭ ۇلى ورىنبەك 52 جاسىندا دۇنيەدەن وزىپتى. ءبۇگىندە بارى دا, نارى دا كەلىنى باقىتكۇل مەن ودان تۋعان نەمەرەلەرى: نۇرىمجان, راحىمجان, ءاليا, ءاسيا.
– نۇرىمجان مەن راحىمجان كوزىمنىڭ قاراسى بولسا, ءاليا مەن ءاسيا كوزىمنىڭ اعى عوي, – دەيدى راۋشان اجە.
ادام ومىرىندە نەبىر تاڭعاجايىپ ساتتەر بولىپ جاتادى. ونى ادامنىڭ ءوزى اڭعارماعانىمەن سىرت كوزگە بىردەن بايقالادى. سونداي ساتتەردىڭ راۋشان اپايدىڭ ءومىر جولىندا دا از بولماعاندىعىن ونىمەن ەڭبەكتەس بولعان قاريالاردان ەستىپ ءبىلىپ وتىرمىز. ماسەلەن, راۋشان اپاي 70 جاسقا دەيىن ەڭبەكتەن قول ۇزبەپتى. «زەينەتكەرلىككە شىقتىڭىز, دەمالمايسىز با؟! دەگەن بالالارىنا. – مەنىڭ ون ەكى مۇشەل قوزعالىستا بولماسا جانىم جاي تاپپايدى, بوس وتىرسام اۋىرىپ قالامىن – دەگەن ول ودان ءارى. قاراپ تۇرسام زامان جاقسى, ەل تىنىش, بارلىق جەردە توقشىلىق. سوعان قاراماستان, كوپتەگەن ادامداردىڭ, ءتىپتى جاستاردىڭ دا ءولىم-ءجىتىمى كوبەيدى. ميىنا قان قۇيىلدى, جۇرەگى توقتاپ قالدى دەيدى. مۇنىڭ بارلىعى, مەنىمشە دەنە قوزعالىسىنىڭ ازدىعى ما دەيمىن. وسى كۇنى اتتام جەرگە جۇرت جاياۋ ءجۇرمەيتىن بولدى. سونىڭ زاردابى ءبارى دە – دەيدى ەكەن ول.
قاراپايىم ەڭبەك ادامىنىڭ وسى تۇجىرىمى قاراپ وتىرساڭىز, شىندىقتان الشاق جاتقان جوق.
شىڭعىس ايبوسىنوۆ,
قازاقستان جۋرناليستەر وداعىنىڭ مۇشەسى.
قىزىلوردا وبلىسى.