بۇل كۇندەرى جانكۇيەر بىتكەننىڭ بارلىعى ۆانكۋۆەردەگى “كانادا حوككەي پلەيستى” جاعالاپ ءجۇر. راسىندا دا اعىلىپ كەلىپ جاتقان ادامداردا سان جوق. ويتكەنى, ايتۋلى سپورت كەشەنىندە شايبالى حوككەيدەن جارتىلاي فينالدىق باسەكەلەر وتەدى. ال ۇيەڭكىلەر ەلىنىڭ تۇرعىندارى حوككەي دەسە ىشكەن استارىن جەرگە قوياتىنى بەسەنەدەن بەلگىلى.
شيرەك فينالدا رەسەيدىڭ كۇل-تالقانىن شىعارعان كانادا حوككەيشىلەرىن قازىر جۇرت الاقاندارىنا سالىپ ايالاۋدا. بۇل كۇندەرى سيدني كروسبي, رايان گەتسلاۆ, كوري پەرري, پاتريك مارلو, ريك نەش, دجو تورنتون, دجەروم يگينلۋ, ەريك ستاال, دەنني حيتلي جانە روبەرتو لۋنگو سىندى ءبىر توپ ويىنشىلاردىڭ سۋرەتتەرى گازەت-جۋرنالداردىڭ ءبىرىنشى بەتتەرىنەن تۇسەتىن ەمەس. ول از دەسەڭىز, ايدىن يەلەرىنىڭ رەسەي قۇراماسىن قىسپاققا الىپ, شايبانى قاقپاعا ءدال سوعىپ جاتقانىن جەرگىلىكتى تەلەارنالار قايتا-قايتا قايتالاۋدا. كەزدەسۋ بارىسىنداعى باس باپكەر ۆياچەسلاۆ بىكوۆ پەن ورىستاردىڭ ماقتانىشى الەكساندر وۆەچكين جانە ەۆگەني مالكيننىڭ شاراسىز كۇيى دە كوگىلدىر ەكراننان ءجيى قىلاڭ بەرۋدە. مىنە, ەجەلگى قارسىلاسى – رەسەيمەن بولعان كەزدەسۋگە كانادا جۇرتشىلىعى وسىنداي ۇلكەن ءمان بەردى.
الايدا, اقتىق ايقاستىڭ جولداماسى ولاردىڭ ۋىسىنا وڭاي تۇسەدى دەپ ەشكىم نىق سەنىممەن ايتا المايدى. ويتكەنى, سلوۆاكيا قۇراماسى دا وزدەرىن بۇل وليمپيادادا جاقسى قىرىنان كورسەتە ءبىلدى. توپتىق باسەكەدە ولار رەسەيدى ۇتسا, شيرەك فينالدا شۆەتسيانىڭ “شاڭىن شىعاردى”. كاناداعا قارسى ماتچ قارساڭىندا شاعىن عانا سلوۆاكيانىڭ ورەندەرى “ولىسپەي-بەرىسپەيمىز” دەپ بىلەك ءتۇرىنىپ وتىر.
كەلەسى جارتىلاي فينالدا اقش پەن فينليانديا كەزدەسەدى. امەريكا قۇراماسىنىڭ دا وليمپيادانىڭ باس جۇلدەسىن الماعانىنا تابانى كۇرەكتەي 30 جىل وتكەن ەكەن. سوناۋ 1980 جىلى لەيك پلەسيدتە كىلەڭ ستۋدەنتتەردەن قۇرالعان ۇجىم ايگىلى كسرو قۇراماسىن قاپىدا قالدىرعانىن كوزى قاراقتى كورەرمەندەر ۇمىتا قويماعان بولار. ال فينليانديا كوڭىل-كۇيدىڭ كومانداسى. ولار بىردە جاسىنداي جارىق ەتسە, بىردە سۇرەڭسىز وينايدى. الايدا سوڭعى ءتورت وليمپيادانىڭ ۇشەۋىندە ولار ءجۇلدەلى ورىنداردى ولجالادى. 2006 جىلى تۋريندە كۇمىس مەدالدى يەلەنگەن بولاتىن. فيندەر بۇل جولى كەمىندە سول ناتيجەنى قايتالايمىز دەپ قۇلشىنۋدا.
ال قىزدار اراسىنداعى حوككەي ءتۋرنيرى ءوز مارەسىنە جەتتى. فينالدا كانادا مەن اقش كۇش سىناستى. تارتىسقا تولى ماتچ الاڭ يەلەرىنىڭ پايداسىنا شەشىلدى. ءۇشىنشى ورىن ءۇشىن باسەكەدە فينليانديا مەن شۆەتسيا نەگىزگى ۋاقىتتا تەڭ وينادى. وۆەرتايمدا 3:2 ەسەبىمەن العاشقىلارى جەڭىسكە جەتتى.
كەشە سپورتشىلار التى مەدالدار جيىنتىعى ءۇشىن تالاسقا ءتۇستى. ءبىزدىڭ سپورتشىلار سونىڭ تەك بىرەۋىندە عانا باق سىنادى. اتاپ ايتساق, قازاقستاننىڭ قىزدار كومانداسى 4 ح 5 ەستافەتالىق قاشىقتىقتا ونەر كورسەتتى. شاڭعى سپورتىنان ۇلتتىق قۇرامانىڭ باس باپكەرى الەكساندر باتيايكين سۆەتلانا مالاحوۆا, وكسانا ياتسكايا, ەلەنا كولومينا جانە تاتيانا روششيناعا سەنىم ارتۋدى ءجون سانادى. جاسىراتىنى جوق, ءدال قازىر ءبىزدىڭ قىزدار الەمنىڭ ماڭدايالدى كوماندالارىمەن ۇزەڭگى قاعىستىراتىن جاعدايدا ەمەس. ونىڭ وبەكتيۆتى جانە سۋبەكتيۆتى سەبەپتەرى بار. بىراق العاشقى وندىققا ەنۋگە ءتيىس ەدىك. سونى باپكەرلەر شاكىرتتەرىنىڭ قۇلاعىنا مىقتاپ ءسىڭىردى. ءناتيجەسىندە ماماندار ايتقان جورامال اينا-قاتەسىز كەلدى. قازاقستان قۇراماسى 10-ورىندى يەلەندى.
بۇگىن بياتلوننان 4 ح 7,5 ەستافەتاسى وتەدى. قازاقستاننىڭ ەرلەر كومانداسى بۇل سىندا مىناداي قۇرامدا ونەر كورسەتەدى: يان ساۆيتسكي, دياس كەنەشەۆ, نيكولاي برايچەنكو جانە الەكساندر چەرۆياكوۆ. ال 27-28 اقپاندا شاڭعىدان مارافوندىق باسەكەلەر وتەدى. ايەلدەر – سۆەتلانا مالاحوۆا, وكسانا ياتسكايا, ەلەنا كولومينا جانە ەلەنا انتونوۆا 30 شاقىرىمعا جۇگىرسە, ەرلەر – نيكولاي چەبوتكو, سەرگەي چەرەپانوۆ, الەكسەي پولتورانين جانە ەۆگەني ۆەليچكو 50 شاقىرىمدىق سايىستا كۇش سىناسادى.
عالىم سۇلەيمەن, ارنايى “ەگەمەن قازاقستان” ءۇشىن – ۆانكۋۆەردەن.