باتىس قازاقستان وبلىسى قازتالوۆ اۋدانىنداعى كىتاپحانالار جىل باسىنان بەرى «اسىق تەراپياسى» اتتى جاڭا جوبا باستادى. ءبىر قىزىعى, بالالاردى ەپتىلىككە, مەرگەندىككە, تاپقىرلىققا باۋليتىن ۇلتتىق ويىن ەندى ...لاتىن ءالىپبيىن يگەرۋگە كومەكتەسىپ جاتىر ەكەن!
تىڭ يدەيانىڭ تۋىنا سەبەپكەر بولعان – قازتالوۆ اۋىلىندا الما ورازباەۆا اتىنداعى مەكتەپتىڭ 4 سىنىبىندا وقىپ جۇرگەن ارسەن اسىلان ۇلى بولىپ شىقتى. ول بيىلعى اقپان ايىندا ەكىنشى سىنىپتان بەرى جيناپ جۇرگەن 532 اسىعىن قازتالوۆ اۋداندىق ورتالىقتاندىرىلعان كىتاپحاناسىنا سىيعا تارتقان. سونداعى ويى «بۇل اسىقتىڭ قىزىعىن ءوزىم عانا كورمەي, كىتاپحانا كەلەتىن وزگە زامانداستارىممەن بولىسەيىن» ەكەن. ەلباسىنىڭ «رۋحاني جاڭعىرۋ» باعدارلاماسى باستالعالى بەرى قازتالوۆتىق مەتسەناتتار ەرەكشە بەلسەندىلىك تانىتىپ, تۋعان جەرىنە نەبىر سىي-قۇرمەت كورسەتىپ جاتقانى بالا جۇرەگىنە دە اسەر ەتسە كەرەك. ءسويتىپ, ون جاسار وعىلان ءوز قولىنداعى ەڭ قىمبات «قازىناسىن» كىتاپحاناعا اكەلىپ بەرگەن.
- كىشكەنتاي وقىرمانىمىزدان كەلگەن كەرەمەت سىيدى قالاي پايداعا اسىرساق دەپ كوپ ويلاندىق. ارعى زاماندا اسىق قازاق بالالارىنىڭ كۇندەلىكتى ويىنى بولعانىمەن, قازىر قولدانىستان شىعىپ بارا جاتقانى راس قوي. باستاپقىدا كىتاپحانا شارالارى كەزىندە وقىرماندارىمىزعا اسىق اتتىرىپ, سول ارقىلى سۇراقتارعا جاۋاپ بەرگىزىپ جۇردىك. بۇل ويىندارعا «اسىق تەراپياسى» دەپ ات قويىپ الدىق. ال قازىر لاتىن گرافيكاسىن ۇيرەتۋگە وسى اسىق تەراپياسىن پايدالانىپ وتىرمىز. اسىق ارقىلى تاربيەلەگەن جاس جەتكىنشەك ۇلتىنىڭ تانىمىنان قول ۇزبەي, ۇرپاق ساباقتاستىعىن جالعايدى دەپ ويلايمىز, - دەيدى قازتالوۆ اۋداندىق ورتالىقتاندىرىلعان كىتاپحانالار جۇيەسىنىڭ ديرەكتورى گۇلدانا داۋلەتوۆا.
ءبىر قىزىعى, باعزى دا جاڭا باستاما جان-جاقتى قولداۋ تاپقان. وسى اۋداندا عۇمار قاراش اتىنداعى قاراوبا مەكتەپ-گيمنازياسىنىڭ 3 سىنىپ وقۋشىسى ەرداۋلەت سەرجان ۇلى دا ءوزى جيناپ جۇرگەن 200-دەي اسىقتى اۋىل كىتاپحاناسىنا تارتۋ ەتكەن. باسقا اۋىلدار دا قاراپ جاتپادى. ءسويتىپ قازتالوۆ اۋدانىنداعى بارلىق 46 اۋىلدىق كىتاپحانادا «اسىق تەراپياسى» باستالىپ كەتتى.
اسىقپەن لاتىن ءالىپبيىن قالاي ۇيرەنەدى؟ – ول ءۇشىن اسىقتار ءتۇرلى-ءتۇستى بوياۋمەن بويالادى. سوسىن ءار اسىققا لاتىن گرافيكاسىنىڭ ءبىر ءارپى جازىلادى. كىتاپحاناعا كەلگەن وقىرمان وسى اسىقتاردان ءوز ەسىمىن, قىسقا سوزدەردى جازىپ ۇيرەنەدى. ءارى ويىن, ءارى ساباق.
- ەلباسىمىز «بولاشاققا باعدار: رۋحاني جاڭعىرۋ» اتتى ماقالاسىندا «حالقىمنىڭ تاعىلىمى مول تاريحى مەن ىقىلىم زاماننان ارقاۋى ۇزىلمەگەن ۇلتتىق سالت-داستۇرلەرىن الداعى وركەندەۋدىڭ بەرىك ءدىڭى ەتە وتىرىپ, ءاربىر قادامىن نىق باسۋىن, بولاشاققا سەنىممەن بەت الۋىن قالايمىن», - دەپ جازعان ەدى. ەلىمىزدىڭ لاتىن الىپبيىنە كوشۋى - ۇلتىمىز ءۇشىن جاسالعان ماڭىزدى قادامنىڭ ءبىرى دەپ ەسەپتەيمىن. سوندىقتان مۇنداي ماڭىزدى باستامانى قولداۋ, ونىڭ ەل-جۇرتقا, سونىڭ ىشىندە كىشكەنتاي وقىرماندارىمىزدىڭ ساناسىنا سىڭىرۋگە ءبىز دە وسىنداي جولمەن ۇلەس قوسۋدى ۇيعاردىق, - دەيدى گۇلدانا داۋلەتوۆا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى