بۇگىننەن باستاپ فۋتبولدان ۋەفا ۇلتتار ليگاسىنىڭ قورىتىندىسى شىعارىلۋدا. بۇعان دەيىن ءبىز ايتۋلى جارىستا قاي كوماندانىڭ قانداي ورىنعا جايعاسىپ, 2020 جىلى وتەتىن ەۋروپا چەمپيوناتىنىڭ ىرىكتەۋ سىنىندا ولاردىڭ قاي سەبەتكە تۇسكەن جايىندا بايانداعانبىز.
وسى جارىستىڭ قورىتىندىسى بويىنشا قازاقستان قۇراماسى قارسىلاستار قاقپاسىنا ەڭ كوپ سوققى باعىتتاعان كوماندالار اراسىندا ۇزدىك بەستىكتىڭ قاتارىنان كورىندى. جەرلەستەرىمىز نىسانانى 107 مارتە كوزدەگەن ەكەن. ارينە, بۇل – جاقسى كورسەتكىش. بىراق تەپكەن دوپتارىمىزدىڭ دەنى قيسىق كەتكەنىن مويىنداۋعا ءتيىسپىز. سونىڭ سالدارىنان ءبىز العا قويعان ماقساتقا قول جەتكىزە الماي, ءوز توبىمىزدا ەكىنشى ورىندا قالىپ قويدىق.
بۇل كوشتى – ارمەنيا قۇراماسى باستاپ تۇر. قاپ تاۋىنىڭ وكىلدەرى قارسى جاقتىڭ قاقپاسىنا 133 سوققى باعىتتاعان ەكەن. ودان كەيىنگى ورىنداردا بەلارۋس (113 سوققى) جانە مولدوۆا مەن ليۋكسەمبۋرگ (1008 سوققى) كوماندالارى.
جەكەلەگەن ويىنشىلار اراسىندا ريچارد المەيدا وسى جارىس بارىسىندا ەڭ كوپ پاس بەرىپتى. بۇل كۇندەرى ءازىربايجان قۇراماسى ساپىندا ونەر كورسەتىپ جۇرگەن «استانا» كلۋبىنىڭ جارتىلاي قورعاۋشىسى ءوز ارىپتەستەرىنە بەرگەن پاسىنىڭ 454-ءى ءدال جەتكەن ەكەن. ودان كەيىنگى ساتىلارعا مولدوۆالىق الەكساندر ەپۋريانۋ (444 پاس), گرۋزيالىق نيكا كۆەكۆەسكيري (437 پاس), يسپانيالىق سەرحيو راموس (433 پاس) جانە ازىربايجاندجىق گارا گاراەۆ (427 پاس) جايعاستى. وسى ورايدا, گرۋزيانىڭ ويىنشىسى كۆەكۆەسكيريدىڭ قازىرگى كەزدە قوستانايدىڭ «توبىل» كلۋبىنىڭ نامىسىن قورعاپ جۇرگەنىن ايتا كەتۋگە ءتيىسپىز. عالىم سۇلەيمەن,
«ەگەمەن قازاقستان»