«وتانداستار» قورى الداعى بەس جىل ىشىندە ەكسكۋرسيالىق تۋرلاردى ەلىمىزدىڭ وڭىرلەرىندە جۇيەلى تۇردە وتكىزۋدى جوسپارلاپ وتىر. ىزگى ماقساتتى جۇزەگە اسىرۋ تۇركىستاننان باستالدى.
ۇيىمداستىرۋشىلاردىڭ ايتۋىنشا, كيەلى جەرلەردى جاقىننان تانىپ, ءجىتى زەرتتەۋ ارقىلى شەتەلدەگى وتانداستارىمىز اتاجۇرتىنىڭ وتكەنىنە ءۇڭىلىپ, ەلىمىزدىڭ مادەنيەتىنە, ونەرىنە جانە حالىقتىق داستۇرلەرىنە جاقىنداي تۇسەدى. اتالمىش قور ۇيىتقى بولعان, تۇركىستان قالاسىندا باستالعان, «تۋعان جەرگە تاعزىم» كەڭ اۋقىمدى جوبانىڭ مىندەتى - الىس-جاقىن شەتەلدەردە, اۆستريا, انگليا, فرانتسيا, شۆەتسيا, يران, قىتاي, مونعوليا, تاجىكستان, رەسەي, بەلورۋس, وزبەكستان جانە قىرعىزستاندا تۇراتىن قانداستارعا ارناپ, قازاقستاننىڭ كيەلى جەرلەرىنە تاريحي-تانىمدىق ەكسكۋرسيالار سەرياسىن ۇيىمداستىرۋ. بۇل ورايدا قوجا احمەت ياساۋي, ارىستان باب كەسەنەلەرى, تۇركىستاننىڭ تاريحي مۇراجايى جانە ءوڭىردىڭ باسقا دا كورىكتى جەرلەرىن تانىستىرۋ ارقىلى قازاق حالقىنىڭ مادەني جانە رۋحاني قۇندىلىقتارىن ناسيحاتتاۋ كوزدەلىپ وتىر.
اتاجۇرتىنا كەلگەن قانداستاردى قارسى العان وبلىس اكىمى جانسەيىت تۇيمەباەۆ وسىناۋ ماڭىزدى كەزدەسۋ ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ اياسىندا ۇيىمداستىرىلىپ جاتقانىن ايتىپ, جۇزەگە اسىرىلىپ اۋقىمدى جۇمىستاردان حاباردار ەتتى. ال ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە «قازاقستاننىڭ كيەلى جەرلەرى» تاقىرىبىندا وتكەن «دوڭگەلەك ۇستەلدە» وبلىس اكىمى «قاسيەتتى قازاقستان» رەسپۋبليكالىق ورتالىعىنا 104 نىسان ۇسىنىلىپ, ونىڭ ىشىنەن 26 نىسان رەسپۋبليكالىق تىزىمگە ەنگىزىلگەنىن اتاپ ءوتتى. «قازاقستاننىڭ كيەلى جەرلەرى» جوباسى اياسىندا اتقارىلىپ جاتقان ىستەرگە توقتالدى. سونداي-اق, جۇزدەسۋدە «وتانداستار قورى» كەاق پرەزيدەنتى نۇرتاي ابىقاەۆ, «دۇنيەجۇزى قازاقتارىنىڭ قاۋىمداستىعى» رقب توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ, ق.ا.ياساۋي اتىنداعى حقتۋ رەكتورى بولاتبەك ابدراسيلوۆ, ۇلتتىق مۋزەيدىڭ «قاسيەتتى قازاقستان» ورتالىعى باسشىسىنىڭ ورىنباسارى باتىرحان جۇماباەۆ, مەملەكەتتىك ءتىلدى دامىتۋ قورىنىڭ ديرەكتورى ازات شاۋەەۆ جانە شەت ەلدىك دياسپورا وكىلدەرى ءسوز سويلەپ, وتكىزىلىپ جاتقان شارانىڭ ماڭىزدىلىعىن, ەلدى تانۋعا, بارىمىزدى باعالاۋعا, قۇندىلىقتاردى قادىرلەۋگە زور ىقپالى تيەتىنىن اتاپ ءوتتى.
ايتا كەتەلىك, «وتانداستار قورى» «تۋعان جەرگە تاعزىم» تاريحي-تانىمدىق ەكسكۋرسيالار جوباسىن «رۋحاني جاڭعىرۋ» مەملەكەتتىك باعدارلاماسى اياسىندا وتكىزىپ وتىر.
عالىمجان ەلشىباي,
«ەگەمەن قازاقستان»
تۇركىستان وبلىسى