....ۇسىنىس جاسايدى
ەڭبەك ەرىنە كوشە اتاۋى بەرىلسە
زەينەت جاسىنان اسقاننان كەيىن, كۇش-قايراتى قايتا تاسىعان, ءسويتىپ 1966 جىلى 70 جاسقا قاراعان شاعىندا سوتسياليستىك ەڭبەك ەرى اتاعىن يەلەنگەن وتەمىس قالنيازوۆتىڭ ەسىمى اعا بۋىن وكىلدەرىنە جاقسى تانىس. ەرەن ەڭبەك يەسى ءوز زامانىندا جىل سايىن ءار 100 بيەدەن 100 ق ۇلىننان الىپ وسىرگەن. وتەكەڭنىڭ مەملەكەتكە وتكىزگەن جاس قۇناندارىنىڭ ارقايسىسىنىڭ سالماعى 345 كيلوگرامنان اينالعان. سونداي-اق ول بايگەگە قوساتىن سايگ ۇلىك باپتاپ ءوسىرۋدىڭ دە مايتالمانى ەدى.
ءو.قالنيازوۆ 1981 جىلى 84 جاسىندا دۇنيەدەن ءوتتى. بۇگىنگى ەگەمەن ەلىمىزدە دە جىلقى وسىرۋمەن اينالىسۋعا نيەت بىلدىرۋشىلەر از ەمەس. ارينە, بۇل قۋانارلىق ءىس. وسى ورايدا حات جولداۋداعى باستى ماقساتىم – ەلىمىز رۋحاني جاڭعىرۋ اياسىندا جاڭا تاريحي كەزەڭگە اياق باسقان تۇستا ەڭبەگىمەن ەر اتانعان, ءومىرىنىڭ سوڭىنا دەيىن قۇرىعى قولىنان تۇسپەگەن وتەمىس قالنيازوۆتاي تارلاندارىمىزدىڭ ەسىمدەرىن ۇلىقتاي بىلگەنىمىز ءجون دەپ سانايمىن. بۇل ءۇشىن اۋدان ورتالىعى شۇبارقۇدىقتاعى ءبىر كوشەگە ونىڭ ەسىمى بەرىلسە – بۇگىنگى ۇرپاققا ۇلگى-ونەگە بولماق. سونداي-اق مۇنداي يگىلىكتى دە, ىزگى ىستەر جاستار اراسىنداعى ەڭبەك تاربيەسىنە دە ءوز ىقپالىن تيگىزە الاتىنى انىق.
باقىتجان ەسەنقۇلوۆ,
ەڭبەك ارداگەرى
اقتوبە وبلىسى,
تەمىر اۋدانى,
شۇبارقۇدىق اۋىلى
...قۋانىشىن بولىسەدى
مۇمكىندىگى شەكتەۋلىلەر بايقاۋى
سەمەيدەگى مادەنيەت سارايىندا مۇمكىندىگى شەكتەۋلى جانداردىڭ شىعارماشىلىق قابىلەتتەرىن دامىتۋ, ونەرگە دەگەن قۇشتارلىقتارىن ارتتىرۋ, قوعامعا كىرىكتىرۋ تاجىريبەسىن تاراتۋ ماقساتىندا «ەكى جۇلدىز» شىعارماشىلىق بايقاۋى وتكىزىلدى. بايقاۋعا بيىل وبلىستىڭ 7 اۋدانىنان, قالانىڭ قوعامدىق بىرلەستىكتەرى, سونىمەن قوسا سەمەي قالاسىنىڭ «ارناۋلى الەۋمەتتىك قىزمەتتەر كورسەتۋ ورتالىعى» كمم-نەن بارلىعى 22 تالاپكەرلەر قاتىسۋعا ءوتىنىش ءبىلدىردى.
ءىس-شارا سوڭىندا جاس ەرەكشەلىكتەرىنە قاراي ءار سانات بويىنشا جەڭىمپاز جۇپتار انىقتالدى. سەمەيلىك اياجان داۋلەتقىزى مەن دارىن ايتقازين, زايساندىق دارحان قاسەيىنوۆ باس جۇلدەنى يەلەندى. شار, كوكپەكتى, زايساننان كەلگەن قاتىسۋشىلار 1-ورىندى جەڭىپ السا, 2-ورىندى اياگوز, جارما اۋداندارى ءوزارا ءبولىستى. سەمەي, ءۇرجار, كوكپەكتىدەن قاتىسقان ونەرپازدار 3-ورىنعا يە بولدى. شارا سوڭىندا جەڭىمپازدارعا باعالى سىيلىقتار مەن ديپلوم تابىستالىپ, مەرەكەلىك داستارقان ۇيىمداستىرىلدى.
رايحان بايتىلەۋوۆا,
ورتالىقتىڭ الەۋمەتتىك جۇمىس جونىندەگى مامانى
سەمەي
...ءسۇيسىنىس بىلدىرەدى
تۇلەكتەردىڭ تارتۋى
«رۋحاني جاڭعىرۋ» باعدارلاماسىنىڭ «اتامەكەن» جوباسى اياسىندا شەتپەدەگى ب.جۇماليەۆ اتىنداعى ورتا مەكتەپتىڭ 50 جىلدىعى مەن اۋداننىڭ 90 جىلدىعىنا وراي مەكتەپتىڭ تۇلەكتەرى قايىرىمدى ءىس جاسادى.
مەكتەپتىڭ 1968-2008 جىلعى تۇلەكتەرى وزدەرى وقىعان وقۋ ورداسىنىڭ ءىشى-سىرتىنا جاڭالىقتار ەنگىزدى. اتاپ ايتار بولساق, مەكتەپ تۇلەگى ايدوس اقجانوۆ 1,5 ملن تەڭگەگە مەكتەپتىڭ سىرتقى كەلبەتىن سىرلاپ جوندەسە, مەكتەپتىڭ 1973 جىلعى تاعى ءبىر تۇلەگى ءاليا سارمۋرزينا مەكتەپتىڭ الدىنا وقۋشىلار ءۇشىن ىڭعايلى بولسىن دەپ توسەنىشتەر توسەپ, ورىندىقتار قويىپ بەردى. سونداي-اق مەكتەپتىڭ 1996-2002 جىلعى تۇلەكتەرى 30 مەترگە جۋىق قۇنى 700 مىڭ تەڭگە بولاتىن «ب.جۇماليەۆ اتىنداعى ورتا مەكتەبى» دەگەن اسەم جازۋىن جازىپ بەردى. ال مەكتەپتىڭ سىرتقى قورشاۋىن دۋلان جولانبەكوۆ سىيعا تارتتى. جارتى عاسىردان بەرى جوندەۋ كورمەگەن مەكتەپتىڭ توق جۇيەسىن 1992-1993 جىلعى تۇلەكتەرى شاڭىتباي قوساي مەن التىنبەك سارسەنباەۆ ەلەكتر جۇيەسىن تولىقتاي جاڭارتىپ, 1 ملن تەڭگە كولەمىندە قولۇشىن سوزدى.
ال 1990 جىلعى تۇلەگى, كاسىپكەر ايدوس تۇيەباەۆ مەكتەپتىڭ سپورت زالىنا 500 مىڭ تەڭگە كولەمىندە قاراجاتپەن كومەكتەستى. مەكتەپتىڭ جىلۋ قۇبىرلارى دا ەسكى ەدى. بۇل ماسەلە دە تۇبەگەيلى شەشىلدى. ويتكەنى جىلۋدى تۇگەلدەي جاڭارتىپ بەرگەن 1984 جىلعى تۇلەگى, اۋىل تۇرعىندارى مارس ۇبىناەۆ پەن جاراس وزعانوۆ كومەكتەسىپ قولدادى.
اللابەرگەن قونارباەۆ
ماڭعىستاۋ وبلىسى,
ماڭعىستاۋ اۋدانى
...ماقتان تۇتادى
ماراپاتتاۋعا لايىق ازامات
مەملەكەت باسشىسىنىڭ ءبىلىم سالاسىنا قاتىستى باسىم باعىتتارىن ىسكە اسىرۋدا كوپكە ۇلگى كورسەتىپ جۇرگەن جانداردىڭ ءبىرى اقىلباي قايمولدينوۆ. ءوز ءىسىن بىلىكتىلىكپەن ورىنداپ جۇرگەن ول بۇگىندە باتىس قازاقستان وبلىسىنىڭ تەرەكتى اۋدانىنا قاراستى پودستەپنىي اۋىلىنداعى №1 ورتا مەكتەپتىڭ ديرەكتورى.
اقىلباي اسماق ۇلى ساپالى ءبىلىم, سانالى تاربيەسىمەن شاكىرتتەرىن بيىككە جەتەلەگەن, ەل سەنىمىن اقتاعان ارداقتى ۇستاز. ۇنەمى ءوزىن ءوزى جەتىلدىرىپ, ءبىلىمىن زامان تالابىنا ساي تولىقتىرىپ, ۇجىمعا ۇلگى-ونەگە كورسەتىپ جۇرەدى. اسىرەسە, وقۋشىلاردى ءوز بەتىنشە جۇمىس ىستەۋگە ۇيرەتۋ ادىستەمەسىن تەرەڭنەن قاۋزاپ, الەمدىك دەڭگەيدەگى وزىق تاجىريبەلەردى كەڭىنەن قولدانۋى ونىڭ بىلىكتىلىگىن ايقىن كورسەتەدى. كاسىبي شەبەرلىگىن شىڭداۋ ماقساتىندا ءتۇرلى كەڭەستەرگە, سەمينارلارعا, بايقاۋلارعا قاتىسىپ, تاجىريبە الماسىپ تۇراتىنىن دا ەرەكشە اتاپ وتكەن ءجون. ءبىلىم بەرۋدە ۇلتتىق ءداستۇردى, قازاق حالقىنىڭ تاريحى مەن مادەنيەتىن, تۋعان جەرگە قاتىستى قۇندىلىقتاردى كەڭىنەن قولدانىپ كەلەدى. وسىنداي ەرەن ەڭبەكتىڭ ناتيجەسىندە شاكىرتتەرى ۇنەمى اۋداندىق, وبلىستىق جانە رەسپۋبليكالىق ءپان وليمپيادالارى مەن عىلىمي جوبالار سايىسىندا توپ جارىپ, ۇزدىكتەر قاتارىنان كورىنىپ ءجۇر. سونىڭ ارقاسىندا ۇستازدىڭ دا ەڭبەگى ەلەنىپ, كوپتەگەن ماراپاتتارعا لايىق دەپ تانىلدى. سونىڭ ىشىندە حالىقارالىق پەداگوگيكا جانە يننوۆاتسيالىق تەحنولوگيالار, عىلىم اكادەمياسى, رەسپۋبليكالىق ء«بىلىم جانە عىلىم» شىعارماشىلىق بىرلەستىگى جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ العىس حاتتارىنا يە بولدى.
گۇلسارا مۇقانوۆا,
№1 پودستەپنىي مەكتەبىنىڭ مۇعالىمى
باتىس قازاقستان وبلىسى,
تەرەكتى اۋدانى