قاراعاندى وبلىسىنداعى «توپار جىلىجايلارى» سەرىكتەستىگىنىڭ داڭقى قىسى-جازى وسەتىن قيارىمەن, قىزاناعىمەن شىققان بولاتىن. دەگەنمەن, مۇندا اتالعان كوكونىس تۇرلەرىنەن باسقا ەكزوتيكالىق جەمىستەردى دە ءوسىرۋ دۇرىس جولعا قويىلعان. مىسالى, قازىر جىلىجايدا 440 ءتۇپ ليمون اعاشى مەن باسقا دا جىلۋدى جانى سۇيەتىن وسىمدىكتىڭ بىرنەشە ءتۇرى بار.
نەگىزى, توپارعا ليمون كوشەتتەرى 2000 جىلى ماسكەۋ, تاشكەنت جانە وسكەمەن قالالارىنان جەتكىزىلگەن بولاتىن. قازىر مۇندا ليموننىڭ «يۋبيلەينىي» جانە «مەيرا» دەپ اتالاتىن ەكى ءتۇرى وسىرىلەدى.
مۇنداعى جەمىس اعاشتارى قىركۇيەكتەن باستاپ قاڭتار ايىنا دەيىن ءونىم بەرەدى دە, كوكتەم شىققانشا دەمالادى. جىلىجاي قىزمەتكەرلەرىنىڭ ايتۋىنشا, ليمون اعاشىنان 100 كيلوعا دەيىن جەمىس الىنادى ەكەن. ءبىر جىلعا شاققانداعى ورتاشا ونىمدىلىك 40 تونناعا جۋىقتايدى. اعاشتاردان ءۇزىلىپ الىنعان تسيترۋستار بىردەن قاراعاندى مەن استانانىڭ ساۋدا نۇكتەلەرىنە جەتكىزىلەدى.
توپار جىلىجايىندا, سونداي-اق, ماندارين, اپەلسين, گرەيپفرۋت, انار, پاپايا وسىرىلەدى. كوفە مەن ءزايتۇن اعاشتارى دا بار. وسى كوكتەمدە كيۆي وتىرعىزىلىپتى. بيىل گۋاۆا, قۇرما, ءىنجىر اعاشتارى دا ءتاۋىر جەمىس بەرگەن.
– ەڭ باستىسى, ءوز ىسىڭە دەگەن زور سۇيىسپەنشىلىك بولۋ كەرەك. اعاشتار دا ادام سەكىلدى, ايالى الاقاندى سەزەدى, – دەيدى «توپار جىلىجايلارى» جشس-ءنىڭ ديرەكتورى سۇلتان ءمۇرسالىموۆ. – ولارعا ەڭ الدىمەن جايلى كليمات تۋدىرۋ قاجەت: تەمپەراتۋرا بىرقالىپتى, تىڭايتقىشتار ءنارلى بولسا عانا ءتاۋىر ءونىم جيناي الاسىڭ.
جىلىجاي كەشەنىنىڭ ورانجەرەياسىنا جىلدىڭ ءدال وسى مەزگىلىندە, ياعني كۇزدىڭ اياعى جانە قىستىڭ باسىندا كەلگەننىڭ ءجونى بولەك. سىرتتاعى ايازدان بوي توڭىپ, جىلىجايدىڭ ىشىنە كىرىپ كەلگەنىڭىزدە, يران باعىنا تاپ بولعانداي كۇي كەشەسىز. مۇنداي ەكزوتيكادان رۋحاني ءلاززات الماۋ ءتىپتى دە مۇمكىن ەمەس!
قايرات ءابىلدا,
«ەگەمەن قازاقستان»
قاراعاندى وبلىسى, اباي اۋدان