ت. جۇرگەنوۆ اتىنداعى قازاق ۇلتتىق ونەر اكادەمياسىندا مەملەكەت جانە قوعام قايراتكەرى, ءبىلىم مەن ونەردىڭ ناعىز جاناشىرى تەمىربەك جۇرگەنوۆتىڭ تۋعانىنا 120 جىل تولۋىنا ارنالعان حالىقارالىق عىلىمي-پراكتيكالىق كونفەرەنتسيا بولىپ ءوتتى.
جيىن «قازاقستان مەن ورتا ازياداعى ءبىلىم بەرۋدى, مادەنيەتتى جانە ونەردى ۇلتتىق سانانىڭ كەمەلدەنۋىندەگى بىرەگەي تاجىريبە رەتىندە جاڭعىرتۋ» اتتى تاقىرىپتا ۇيىمداستىرىلدى. ۇلت قايراتكەرى تەمىربەك جۇرگەنوۆ قازاق ونەرى مەن ءبىلىمىن دامىتۋعا ۇلكەن ۇلەس قوسقان ءبىرتۋار ازاماتتاردىڭ ءبىرى. شارانىڭ ماقساتى – جۇرگەنوۆتىڭ تاعىلىمى مول ونەگەلى عۇمىرىن كەيىنگى وسكەلەڭ ۇرپاققا كەڭىنەن ناسيحاتتاۋ.
حالىقتىڭ ارداقتى ۇلى, مەملەكەت قايراتكەرىنىڭ 120 جىلدىق مەرەيتويى اياسىنداعى سالتاناتتى جيىندى اكادەميا رەكتورى مىندەتىن اتقارۋشى, پروفەسسور ش.امىربەكوۆ كىرىسپە سوزبەن اشىپ, كونفەرەنتسيا جۇمىسىنا ساتتىلىك تىلەدى.
اتالعان كونفەرەنتسياعا ش.ءۋاليحانوۆ اتىنداعى تاريح جانە ەتنولوگيا ينستيتۋتى ديرەكتورىنىڭ ورىنباسارى, پروفەسسور س.بورباسوۆ, م.ۇلۋعبەك اتىنداعى وزبەكستان ۇلتتىق ۋنيۆەرسيتەتىنىڭ پروفەسسورى ز.يشانحودجاەۆا, رەسەي-تاجىك سلاۆيان ۋنيۆەرسيتەتىنىڭ كافەدرا مەڭگەرۋشىسى, دوتسەنت ا.ارتىقوۆ, قوعامدىق قور, ۇكىمەتتىك ەمەس ۇيىمدار جەتەكشىلەرى, جوعارى وقۋ ورىندارىنىڭ وقىتۋشى-پروفەسسورلارى, دوكتورانتتارى, تەمىربەك قارا ۇلىنىڭ تۋىسقاندارى قاتىستى.
ءىس-شارا بارىسىندا ارنايى كورمە ۇيىمداستىرىلىپ, دەرەكتى فيلم كورسەتىلدى. ت.جۇرگەنوۆتىڭ قايراتكەرلىك, قالامگەرلىك, ازاماتتىق بولمىسى جايىندا جان-جاقتى ءسوز بولدى. جۇرگەنوۆتانۋشى-عالىم ب.يمانعاليەۆ «ناركوم جۇرگەنوۆ» تۋرالى ارنايى بايانداما جاساپ, قايراتكەردىڭ رەسپۋبليكا تاريحىندا الار قوعامدىق-ساياسي ورنى, قالامگەرلىك مۇراسى, جاس ۇرپاققا بەرەر ونەگەسى تۋرالى كەڭ اۋقىمدا اڭگىمەلەپ, تىڭ ۇسىنىستارىن ورتاعا سالدى.
ت.جۇرگەنوۆ اتىنداعى قوعامدىق قوردىڭ توراعاسى ءسابي انسات: «دارا تۇلعانىڭ قايراتكەرلىگىن باعالاۋدا ءۇش ولشەم بار: بيىكتىك, تەرەڭدىك, كەڭدىك. تابيعي تالانتتاردى تانۋدا, ىزدەپ تابۋدا, ولارعا جاعداي جاساپ, ونەر كوگىندە جارقىراي كورىنۋىنە, اشتىقتان تۇرالاعان مەملەكەتتىڭ رۋحىن وياتۋدا ت.جۇرگەنوۆتىڭ ەڭبەگى زور. 1936 جىلى ماسكەۋدە وتكەن مادەنيەت دەكاداسىندا قازاق ۇلتىنىڭ رۋحى بيىك, ونەرى مەن ادەبيەتىنىڭ ەشبىر ەلدەن كەم ەمەستىگىن دالەلدەي ءبىلۋى جۇرگەنوۆتىڭ قايسار قايراتكەرلىگى مەن وراسان زور ىسكەرلىگى, ايىرىقشا ۇيىمداستىرۋشىلىق قابىلەتىنىڭ ارقاسىندا مۇمكىن بولعانىن ۇمىتپاۋىمىز كەرەك. ول ماسكەۋدە وقىعان قازاق ازاماتتارىنا قارجىلاي قولداۋ كورسەتىپ تۇردى جانە قازاق, وزبەك, تاجىك ازاماتتارىنىڭ ءبىلىمىن كوتەرۋ ءۇشىن ولاردى رەسەيدىڭ ورتالىق قالالارىنا جۇيەلى تۇردە جىبەرىپ وتىرعان, ال ولار ءوز كەزەگىندە ىرگەلى ءبىلىم وردالارىنان العان بىلىمىمەن ءوز ەلىنىڭ مادەنيەتىن, ونەرىن, ادەبيەتىن كوتەرۋگە اتسالىسقان. بۇل – تەمىربەك جۇرگەنوۆتىڭ كورەگەندىگىنىڭ جانە كەڭدىگىنىڭ دالەلى», دەدى ول بايانداماسىندا.
ايتا كەتۋ كەرەك, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى باۋىرجان يمانعاليەۆ بىرقاتار جوعارى وقۋ ورىندارىنىڭ ستۋدەنتتەرى ءۇشىن تەمىربەك جۇرگەنوۆ اتىنداعى ستيپەنديا تاعايىنداۋ, ورتا مەكتەپ وقۋلىقتارىنا «تۇلعاتانۋ» باعدارلاماسى بويىنشا قايراتكەرلىگى جايلى مالىمەت ەنگىزۋ ماسەلەلەرىن ۇسىندى.
ايگۇل احانبايقىزى,
«ەگەمەن قازاقستان»
الماتى