ستاليندىك زۇلمات كەزىندە قازاق جەرىنە قونىس اۋدارعان شەشەن ازاماتى ۆاحيد گۋبانوۆتى قارماقشىلىقتار ۇلكەن ىلتيپاتپەن ەسكە الادى.
جاقىندا ۆاحيد احماد ۇلىنىڭ قۇرمەتىنە «فيزيولوگيا جانە مەديتسينا: دەنە تاربيەسىنىڭ وزەكتى ماسەلەلەرى» اتتى ءىى-ءشى حالىقارالىق عىلىمي- تاجىريبەلىك كوفەرەنتسيا ءوتتى. القالى جيىنعا ايماقتىق قازاقستان حالقى اسسامبلەياسىنىڭ مۇشەلەرى مەن سپورت سالاسىنىڭ ماماندارى قاتىستى.
ەكى مىڭىنشى جىلدارى «عاسىر ادامى» نوميناتسياسىنا ۇسىنىلعان ۆاحيد گۋبانوۆ ۇلتتار اراسىنداعى دوستىققا ولشەۋسىز ەڭبەك سىڭىرگەن ازامات. «دايموحك» شەشەن-ينگۋش ەتنو-مادەني ورتالىعىنىڭ توراعاسى ابۋ-قاسىم حاجاليەۆ «ونىڭ ءومىرى جاستارعا ۇلكەن ونەگە» دەيدى.
اسىل ازاماتتى ەسكە الۋعا ارنالعان دزيۋدودان وبلىستىڭ اشىق ءتۋرنيرىن ۇيىمداستىرعان ايماقتىق دەنە تاربيەسى مەتوديكالىق ورتالىعىنىڭ ديرەكتورى باۋىرجان ابەنعاليەۆ قازاقستان مەن شەشەنستان اراسىندا بەرىك بايلانىس ورناعاندىعىن,ونداعى ازاماتتاردىڭ قازاق حالقىنا قۇرمەتى زور ەكەندىگىن ايتادى.
باقتيار تايجان,
«ەگەمەن قازاقستان»
قىزىلوردا