ەلباسى دۇنيەجۇزى قازاقتارىنىڭ V قۇرىلتايىندا شەتتەگى قانداستارىمىزدىڭ اتامەكەن قازىعى – قازاقستانمەن اقپاراتتىق, مادەني-رۋحاني بايلانىسىن نىعايتا ءتۇسۋ ءۇشىن ولارعا وتاندىق مەرزىمدى باسىلىمداردىڭ قولجەتىمدىلىگىن قامتاماسىز ەتۋدى تاپسىرعان بولاتىن.
«Egemen Qazaqstan» گازەتى مەملەكەت باسشىسىنىڭ تاپسىرماسىن ورىنداۋ ماقساتىندا اقپارات جانە كوممۋنيكاتسيالار مينيسترلىگىنىڭ قولداۋىمەن وسى باعىتتا بىرقاتار جوبانى جۇزەگە اسىرىپ جاتىر. سونىڭ ءبىرى – قانداستاردىڭ قاراسى مول ەلدەردەگى قازاقى باق وكىلدەرىن باس باسىلىمدا تاجىريبەدەن وتكىزۋ. وسى ءىستىڭ اياسىندا تاعىلىمدامادان وتۋشىلەردىڭ العاشقى لەگى – موڭعولياداعى «جاڭا ءداۋىر» گازەتىنىڭ ءتىلشىسى قۋات ۋاتقان مەن «TV4» تەلەارناسىنىڭ ءتىلشىسى شىناربەك جومارت «ەگەمەنگە» كەلدى. بۇل باستاما ەلىمىزدىڭ موڭعولياداعى توتەنشە جانە وكىلەتتى ەلشىسى قالىبەك قوبلانديننىڭ اتسالىسۋىمەن جانە «ەگەمەننىڭ» قارجىلاي قولداۋىمەن جۇزەگە اسىپ وتىر. جۋرناليست قانداستارىمىز ەل گازەتىندە جيناعان تاجىريبەلەرىن ەندى ولگەيدەگى قازاق باسىلىمىن وركەندەتۋگە جۇمسايتىن بولادى.
«اتاجۇرتتاعى ەڭ ءىرى باسىلىمنان ءىس-تاجىريبەدەن ءوتۋ – مەن ءۇشىن ۇلكەن مارتەبە. «Egemen Qazaqstanda» قازاق جەرىندەگى جاڭالىقتاردان باستاپ, الەمدىك وقيعالارعا ۇلاسقان ساراپتامالىق ماتەريالدار مولىنان بەرىلەدى ەكەن. گازەتتىڭ شىعارماشىلىق, وندىرىستىك ۇدەرىستەرىن كوزبەن كورىپ, ۇلگى الارلىق جاقتارىن كوڭىلگە توقىدىق. الداعى جۇمىستارىمىزعا وسى تاجىريبەنى كەڭىنەن قولدانامىز», دەيدى بايولكەلىك قانداسىمىز قۋات ۋاتقان.
«موڭعوليادا قازاق تىلىندە اقپارات تاراتاتىن 1 راديو, 4 تەلەارنا, 2 گازەت, 1 جۋرنال, 2 ۆەب-سايت بار. بۇلار اتاجۇرتتاعى جاڭالىقتار مەن وقيعالاردى كۇندەلىكتى ينتەرنەت ارقىلى قاراپ, حالىققا ۇسىنادى. ول جاقتاعى قازاقتار قازاقستاننىڭ اقپارات ايدىنىن ۇنەمى باقىلاپ وتىرادى.
قانداستارعا بارىنشا قامقورلىق كورسەتىپ وتىرعان ەلباسىنا ريزاشىلىعىمىز زور. قازىر اقپاراتتىق شەكارالار جويىلدى. الەمدە نە بولىپ جاتقانىن تاۋ قويناۋىنداعى ادام دا ءبىلىپ وتىرادى. ال جۇمىس ىستەۋ تاسىلدەرى ءارتۇرلى. ەل گازەتىنە كەلىپ, قازاق جۋرناليستيكاسىنىڭ اۋاسىن جۇتۋ – ءبىزدىڭ دە تىنىسىمىزدى اشتى. ەندى سول ەكىنشى تىنىسىمىزبەن موڭعولياداعى قازاق باسىلىمدارىنا قىزمەت ەتەمىز», دەدى تاعى ءبىر باۋىرىمىز شىناربەك جومارت.
قازىرگى كۇنى «ەگەمەن» شەتتەگى اعايىننىڭ اتاجۇرتپەن بايلانىسىن كەڭەيتە تۇسەتىن باستامانى قانداستار كوپتەپ قونىستانعان باسقا دا ىرگەلەس ەلدەر باعىتىندا جالعاستىرۋدا. ۇلتتىق ءباسپاسوز تاريحىندا تۇڭعىش رەت «Egemen Qazaqstan» رەسەي اۋماعىندا گازەت تاراتۋعا ليتسەنزيا العانىن دا ايتا كەتەيىك. سول سياقتى بۇل جۇمىستار قىرعىز, موڭعوليا ەلدەرىندە دە جالعاسۋدا.
باعاشار تۇرسىنباي ۇلى,
«ەگەمەن قازاقستان»