الماتىداعى قابىلداۋ ۇيىندە قازاقستاندىق ساۋلەتشىلەر, مۇسىنشىلەر جانە سۋرەتشىلەر اراسىنداعى «عىلىم جانە ونەر كودى» رەسپۋبليكالىق بايقاۋىنىڭ جەڭىمپازدارىن ماراپاتتاۋ سالتاناتى ءوتتى.
دەنساۋلىق ساقتاۋ سالاسىنداعى يننوۆاتسيالىق تەحنولوگيالاردى بەينەلەيتىن ەڭ ۇزدىك قولونەر تۋىندىلارىن تاڭداۋدى ماقسات ەتكەن بايقاۋعا بارلىعى 60 ءوتىنىم كەلىپ تۇسكەن. 40 جوبا جارتىلاي فينالعا ءوتتى. بايقاۋدىڭ ۇيىمداستىرۋشىسى – «Cultural Dialogue» قق, ال قازاقستاندىق فارماتسەۆتيكا ءوندىرىسىنىڭ كوشباسشىسى SANTO كومپانياسى ءا.قاستەەۆ اتىنداعى قر مەملەكەتتىك ونەر مۇراجايىمەن سەرىكتەستىكتە بايقاۋدىڭ باستاماشىسى ءارى باس دەمەۋشىسى رەتىندە قولداۋ كورسەتتى.
بايقاۋ ۇيىمداستىرۋشىلارىنىڭ مالىمەتى بويىنشا, ءمۇسىن وتكەن جىلى 135 جىلدىق مەرەيتويىن اتاپ وتكەن SANTO («حيمفارم» اق) زاۋىتىنىڭ جاڭا نىشانىنا اينالماق. بايقاۋ قاتىسۋشىلارى الدىندا سويلەگەن سوزىندە قر مادەنيەت جانە سپورت ءمينيسترى ارىستانبەك مۇحامەدي ۇلى اتالمىش بايقاۋ بيزنەس پەن ونەر اراسىنداعى الەۋمەتتىك سەرىكتەستىكتىڭ جارقىن ۇلگىسىن كورسەتتى دەپ اتاپ ءوتتى.
24 تامىزدا قاستەەۆ اتىنداعى قر مەملەكەتتىك ونەر مۇراجايىنىڭ فيليالى – ورتالىق كورمە زالىندا ەسكيزدەر مەن ماكەتتەردىڭ كورمەسى ۇيىمداستىرىلعان بولاتىن. كورمەگە قويىلعان 50-دەن اسا ەكسپوناتتاردىڭ باسىم كوپشىلىگى الماتى, استانا جانە وسكەمەننەن قاتىسقان مۇسىنشىلەردىڭ جۇمىستارى. بايقاۋ ۇيىمداستىرۋشىسى جاننا مامبەتوۆانىڭ ايتۋىنشا, عىلىم جانە ونەر تاقىرىبىنا ارنالعان رەسپۋبليكالىق بايقاۋعا قاتىسۋ سۋرەتشىلەردى شىعارماشىلىق تۇرعىدان ءوزىن دامىتىپ, قازىرگى زاماندا وزەكتى تاقىرىپتار ارقىلى ىشكى دۇنيەتانىمىن كورسەتەدى. بايقاۋعا ونەر تۋىندىلارىن, مۇسىندەر مەن ارت-وبەكتىلەردى جاساۋ جاعىنان تاجىريبەسى مول جەتەكشى ونەر قايراتكەرلەرىمەن قاتار, باستاۋشى مۇسىنشىلەر, شىعارماشىلىق جوعارعى وقۋ ورىندارى مەن كوللەدج ستۋدەنتتەرى قاتىستى.
بايقاۋعا قاتىسقان جۇمىستاردى قاستەەۆ اتىنداعى مەملەكەتتىك ونەر مۇراجايىنىڭ ونەرتانۋشىلارىنان جانە بيزنەس وكىلدەرىنەن قۇرالعان ساراپشىلار كوميسسياسى باعالادى. سونداي-اق, قازىلار القاسىنىڭ قۇرامىندا حالىقارالىق ساراپشى - «Starak Foundation» قورىنىڭ وكىلى Aneta Marcinkowska-Muszynska (پولشا) جۇمىس جاسادى.
ماراپاتتاۋ سالتاناتىندا ءۇش جۇلدەلى ورىندى يەلەنگەن جەڭىمپازداردىڭ ەسىمدەرى تومەندە اتالادى: 1-ورىن – شوقان تولەش, «ادام جانە تابيعات» جوباسى ءۇشىن; 2-ورىن – استانادان قاتىسقان «قاز ارت» شىعارماشىلىق كومبيناتى (بايمۇحانوۆ مەيرام, زاتينوۆا ۇلمەكەن, ليۋبارسكي دميتري), «ۆيترۋۆياندىق ادام» جوباسى ءۇشىن; 3-ورىن – ساۋلەتشى ساكەن نارىنوۆ, «دالانىڭ تۋماسى» جوباسى ءۇشىن. بايقاۋدىڭ باس جۇلدەسىنە الماتىدان قاتىسقان دۋلات ۇسەنباەۆ, ايدوس بۇركىتباەۆ, قانات بەگۋليەۆ, ءالىمجان توقباەۆ سىندى مۇسىنشىلەردەن قۇرالعان جاس شىعارماشىلىق كوماندا «بولاشاققا كوزقاراس» جوباسى ءۇشىن يە بولدى. باس جۇلدە يەگەرلەرى ءوز ءمۇسىنىن جاساپ شىعارۋ مۇمكىندىگىنە قول جەتكىزەدى. اقتىق سىننان سۇرىنبەي وتكەن قاتىسۋشىلاردىڭ جوبالارى بايقاۋ ولشەمدەرى مەن تاقىرىبىنا سايكەس كەلەدى, ءوزىنىڭ بىرەگەي يدەياسىمەن, كومپوزيتسياسىنىڭ تۇتاستىلىعىمەن ءارى بەينەلىلىگىمەن ەرەكشەلەنەدى, سونداي-اق, جوبالار تاعايىندالعان ساۋلەتتىك جانە ساياباقتىق لاندشافتقا سايكەس ۇسىنىلعان. جۇلدەلى ورىنداردىڭ جەڭىمپازدارى اقشالاي سىيلىققا يە بولدى. بايقاۋدىڭ بارلىق قاتىسۋشىلارى بىرەگەي ديزايندا بەزەندەندىرىلگەن كاتالوگپەن جانە سەرتيفيكاتپەن ماراپاتتالدى.
وسىعان وراي Polpharma توبى باقىلاۋ كەڭەسىنىڭ حاتشىسى, «Starak Family Foundation» قورىنىڭ پرەزيدەنتى ەلجبەتا دجيكوۆسكانىڭ ايتۋىنشا, بايقاۋ قازاقستاننىڭ كوركەمونەرشىلەر قىزىعۋشىلىق تانىتىپ, كوپتەگەن مۇسىنشىلەرگە ءوز جۇمىستارىن ۇسىنۋ ءۇشىن شابىت بەردى. بايقاۋ ۇزدىك جوباسى - «بولاشاققا كوزقاراس» تاماشا ءمۇسىنى قازاقستان پرەزيدەنتى جانىنداعى شەتەلدىك ينۆەستورلار كەڭەسىنىڭ وتىرىسى كەزىندە 2019 جىلدىڭ ماۋسىمىندا شىمكەنتتەگى زاۋىتتا سالتاناتتى جاعدايدا اشىلاتىن بولادى.
ەلۆيرا سەرىكقىزى,
«ەگەمەن قازاقستان»
الماتى