سدۋ ۋنيۆەرسيتەتىنىڭ بازاسىندا العاش رەت مەكتەپ جاسىنداعى جەتكىنشەكتەرگە ارنالعان روبوتوتەحنيكا مەكتەبى اشىلدى. جوبا سدۋ ۋنيۆەرسيتەتى مەن RobotX IT مەكتەپتەر جەلىسىنىڭ ەكىجاقتى سەرىكتەستىگىنىڭ ارقاسىندا ىسكە قوسىلدى.
روبوتەحنيكا مەكتەبى ەلباسىنىڭ «تسيفرلى قازاقستان» باعدارلاماسى اياسىندا جاسوسپىرىمدەردىڭ تسيفرلىق ساۋاتىن ارتتىرۋ ماقساتىندا جاس جەتكىنشەكتەرگە باعىتتالعان بىرەگەي الاڭ, دەگەن پىكىردە جوبا جەتەكشىلەرى. ايتا كەتكەن ءجون, مەكتەپتىڭ سالتاناتتى اشىلۋ راسىمىنە جالپى سانى 60-تان اسا ءبۇلدىرشىن العاشقى سىناق ساباقتارىنا قاتىسىپ, IT سالاسىنىڭ ءتۇرلى باعىتىنان ءوز مۇمكىندىكتەرى مەن ءبىلىم كوكجيەكتەرىن كەڭەيتۋگە مۇمكىندىك الدى.
- ءبىزدىڭ ماقساتىمىز – 7 مەن 17 جاس ارالىعىنداعى مەكتەپ وقۋشىلارىن جاستايىنان كومپيۋتەرلىك ءبىلىم الۋعا, ويىن ۇشقىرلاپ, لوگيكاسىن شىڭداۋعا ءوز ۇلەسىمىزدى قوسۋ. مەكتەپ باعدارماسى جان-جاقتى, مۇندا: روبوتوتەحنيكا, كومپيۋتەرلىك باعدارلامالاۋ, انيماتسيا, 3D مودەلدەۋ, راكەتامودەلدەۋ, كودتاۋ, لوگيكا, ءوز بەتىنشە ويىن قۇراستىرۋ سىندى ءتۇرلى باعىتتاردا ءبىلىم بەرىلەدى. اسىرەسە, قازاق مەكتەپتەرىندەگى بالالارعا زور كوڭىل ءبولىپ, وقۋ باعدارلاماسىن قازاق تىلىندە جۇرگىزۋگە يكەمدەدىك. مەكتەپتەن جان-جاقتى اقپارات العان تالىمگەرلەر, مەكتەپ ءبىتىرۋشى جاسقا جەتكەندە, بولاشاقتا قانداي ماماندىق يەسى بولۋىن ءوز بەتىنشە تاڭداپ, جاڭا تەحنولوگيالاردى تولىققاندى مەڭگەرىپ شىعادى. ال, زاماناۋي تەحنولوگيالاردى مەڭگەرگەن ۇرپاق كوشتەن قالماي, ەلىمىزدىڭ كوركەيۋىنە ۇلەس قوسارى ءسوزسىز. ەلىمىزدى كوركەيتىپ, 30 دامىعان مەملەكەتتىڭ قاتارىنا قوساتىن نەگىزگى كۇشىمىز – ءبىلىمدى ۇرپاق, - دەگەن پىكىردە جوبا جەتەكشىسى ميراس دولاەۆ.
جوبانىڭ اۆتورلارى جاس جەتكىنشەكتەرگە تەك عانا جاڭا تەحنولوگيالاردى ۇيرەتىپ قويماي, ۇزدىك تالىمگەرلەردى رەسپۋبليكالىق جانە حالىقارالىق جارىستارعا قاتىستىرۋدى كوزدەپ وتىر. ال, جەتكىنشەكتەردى بايقاۋلارعا باپتايتىن سدۋ ۋنيۆەرسيتەتىنىڭ ينجەنەرلىك جانە جاراتىلىستانۋ فاكۋلتەتىنىڭ بەلدى ۇستازدارى مەن تۇلەكتەرى.