قاراعاندى وبلىستىق بەينەلەۋ ونەرى مۇراجايىندا تۇڭعىش رەت ۇيىمداستىرىلعان «ەڭبەك ادامى» فوتو بايقاۋ-كورمەسىنىڭ قورىتىندىسى شىعارىلىپ, جەڭىمپازدار ماراپاتتالدى.
قازىلار القاسىنىڭ شەشىمىمەن «مەن كاسىبىمدى ماقتان ەتەمىن» اتالىمىندا باس جۇلدە بەكزات بالتابەكوۆكە بۇيىردى. ال ء«وز ءىسىنىڭ شەبەرى» اتالىمىندا كەشۋباي ءبايدىلدينوۆتىڭ باعى جاندى. جەڭىمپازدارعا 30 000 تەڭگە سوماسىندا اقشالاي سەرتيفيكاتتار تابىس ەتىلدى.
شارانىڭ نەگىزگى ماقساتى قوعامدا ەڭبەك ادامىنا دەگەن قۇرمەتتى تاربيەلەۋ بولاتىن. مىسالى اتالعان بايقاۋدا قاتىسۋشى كەز كەلگەن سالا قىزمەتكەرى ءوزىن تانىستىرىپ, جۇمىسىنا دەگەن زور سۇيىسپەنشىلىگىن كورسەتۋگە ءتيىس بولاتىن. ۇيىمداستىرۋشىلاردىڭ ايتۋىنشا, مۇنداي بايقاۋلار كاسىپ ءيميدجىن جوعارىلاتىپ, ماماندىقتى سانالى تۇردە تاڭداۋعا ىنتالاندىرادى.
فوتو بايقاۋ-كورمەنى مادەنيەت, سپورت, تۋريزم جانە اقپارات قىزمەتكەرلەرىنىڭ سالالىق كاسىپوداعى ۇيىمداستىردى.
قايرات ءابىلدا,
«ەگەمەن قازاقستان»
قاراعاندى