مەملەكەت باسشىسى ن.نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جانە «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋلارى اياسىندا مەكتەپكە دەيىنگى تاربيە مەن وقىتۋ, ونىڭ ىشىندە بالالاردىڭ ەرتە دامۋىنا ارنالعان باعدارلامالاردىڭ بىرىڭعاي ستاندارتتارىن ەنگىزۋ ماسەلەلەرى پارلامەنت سەناتىندا تالقىلاندى. شارانى سەناتتىڭ الەۋمەتتىك-مادەني دامۋ جانە عىلىم كوميتەتى ۇيىمداستىردى, دەپ حابارلايدى پارلامەنت سەناتىنىڭ ءباسپاسوز قىزمەتى.
سەنات كوميتەتىنىڭ توراعاسى بىرعانىم ءايتىموۆا شارانى اشا كەلىپ, ەلباسى نۇرسۇلتان نازارباەۆ مەكتەپكە دەيىنگى تاربيە ماسەلەسىنە ەرەكشە ءمان بەرەتىنىن اتاپ ءوتتى. مەملەكەت باسشىسى «قازاقستان-2050» ستراتەگياسىندا مەكتەپكە دەيىنگى ءبىلىم بەرۋدىڭ جاڭا ادىستەرىنە كوشۋ قاجەتتىگىنە نازار اۋدارعان بولاتىن. ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا بالالاردىڭ ەرتە دامۋى ءۇشىن ءوز بەتىنشە وقۋ ماشىعى مەن الەۋمەتتىك داعدىسىن دامىتاتىن باعدارلامالاردىڭ بىرىڭعاي ستاندارتتارىن ەنگىزۋ بويىنشا تاپسىرما بەرىلدى. قازان ايىنداعى جولداۋدا دا مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ قاجەتتىگى اتاپ ءوتىلدى. ء«بىلىم بەرۋ ىسىندە 4ك مودەلىنە: كرەاتيۆتىلىكتى, سىني ويلاۋدى, كوممۋنيكاتيۆتىلىكتى دامىتۋعا جانە كوماندادا جۇمىس ىستەي بىلۋگە باستى نازار اۋدارىلدى. وسىعان بايلانىستى بىلىكتىلىك تالاپتارى, وقىتۋ ادىستەرى, تاربيەشىلەردىڭ جانە بالاباقشاداعى باسقا دا قىزمەتكەرلەردىڭ ەڭبەگىنە اقى تولەۋ جۇيەسى قايتا قاراستىرىلىپ, ءتيىستى «جول كارتاسى» ازىرلەنەتىن بولادى», - دەدى ب.ءايتىموۆا.
ءبىلىم جانە عىلىم ءمينيسترى ەرلان ساعاديەۆ 2018 جىلعى 5 قازانداعى جولداۋدى ىسكە اسىرۋ ءۇشىن مينيسترلىك مەكتەپكە دەيىنگى ءبىلىم بەرۋدىڭ ساپاسىن ارتتىرۋ, ونىڭ ىشىندە بىرىڭعاي بىلىكتىلىك تالاپتارىن ەنگىزۋ, ۇلتتىق بىلىكتىلىكتى تەستىلەۋ جانە مەكتەپكە دەيىنگى مەكەمەلەردەگى تاريبيەشىلەر مەن باسقا دا قىزمەتكەرلەردىڭ ەڭبەگىنە اقى تولەۋ جۇيەسىن قايتا قاراۋ جونىندەگى جول كارتاسىنىڭ جوباسىن ازىرلەگەنى تۋرالى سەناتورلاردى حاباردار ەتتى.
اتتەستاتسيالاۋدىڭ جاڭا سيپاتى (ۇلتتىق بىلىكتىلىكتى تەستىلەۋ) بويىنشا تاربيەشىلەردىڭ ەڭبەكاقىسىن ارتتىرۋ, ءسابيحانالاردا جۇمىس ىستەيتىن تاربيەشىلەر مەن كۇتۋشىلەرگە قوسىمشا اقى ەنگىزۋ جوسپارلانىپ وتىر.
سونداي-اق مەكتەپتە وقىتۋمەن بىردەي 0 سىنىپتارىندا جاڭارتىلعان باعدارلاما بويىنشا جۇمىس ىستەيتىن ۇستازدارعا دا قوسىمشا اقى قاراستىرىلىپ وتىر.
بالالاردى قامتۋ اياسىن كەڭەيتۋ ءۇشىن 2019 جىلى 62,4 مىڭ ورىندىق, ونىڭ ىشىندە 47,8 مىڭ ورىنعا 421 جەكەمەنشىك مەكتەپكە دەيىنگى ۇيىمدار اشۋ جوسپارلاندى. بۇل رەتتە 8,5 مىڭ ورىن 1-3 جاستاعى بالالارعا ارنالادى.
مينيستر اتاپ وتكەندەي, بالالار ءومىرى مەن دەنساۋلىعىن قورعاۋ مەكتەپكە دەيىنگى ۇيىمداردىڭ نەگىزگى مىندەتتەرىنىڭ ءبىرى جانە مەكتەپكە دەيىنگى ءبىلىم بەرۋ ساپاسىنىڭ كورسەتكىشى بولىپ تابىلادى. بالالاردىڭ قاۋىپسىز جاعدايدا بولۋى ماقساتىندا مينيسترلىكتىڭ ءبىلىم بەرۋ ۇيىمدارىن جابدىقتاۋ جونىندەگى بۇيرىعى بويىنشا 3 589 (58 پايىز) بالالار باقشاسىنا 40452 بەينە كامەرا ورناتىلدى.
مەكتەپكە دەيىنگى تاربيە مەن وقىتۋدىڭ وزەكتى ماسەلەلەرىن جان-جاقتى تالقىلاعاننان كەيىن ب.ءايتىموۆا بۇل سالاداعى جۇمىستار ودان ءارى جالعاساتىنىن اتاپ ءوتتى. الەۋمەتتىك-مادەني دامۋ جانە عىلىم كوميتەتى الداعى جىلى «قازاقستان رەسپۋبليكاسىنىڭ مەكتەپكە دەيىنگى جانە ورتا ءبىلىم بەرۋ ماسەلەلەرى بويىنشا زاڭناماسىن ودان ءارى جەتىلدىرۋ» تاقىرىبىنا ارنالعان دوڭگەلەك ۇستەل وتىرىسىن وتكىزەتىن بولدى.