سلوۆەنيانىڭ پريمورسك وڭىرىندەگى پوۆير ەلدى مەكەنىندە يۋگوسلاۆيا پارتيزاندارىمەن بىرگە شايقاسقان جانە 1943 جىلى فاشيزمگە قارسى كۇرەستە ءوز ءومىرىن قيعان قازاقستاندىق قاھارمان «كاسسا سەبەرونى» ەسكە الۋ سالتاناتتى جيىنى ءوتتى.
قازاقستان ارداگەرلەر كەڭەسىنىڭ توراعاسى, پارلامەنت ءماجىلىسىنىڭ دەپۋتاتى باقتىقوجا ىزمۇحامبەتوۆ 75 جىل بويى قازاقستان جاۋىنگەرىنىڭ جادىنا ۇقىپتى قاراعانى جانە ونىڭ قابىرىنە جاساعان قامقورلىعى ءۇشىن پوۆير ەلدى مەكەنىنىڭ تۇرعىندارىنا جانە بۇكىل سلوۆەنيا حالقىنا قازاقستان حالقىنىڭ شىنايى العىسىن ءبىلدىردى.
سلوۆەنيانىڭ بۇرىنعى قورعانىس ءمينيسترى, قازىرگى سەجانا كوممۋنا باسشىسىنىڭ ورىنباسارى ليۋبيتسا ەلۋشيچ جەرگىلىكتى زەرتتەۋشىلەردىڭ كوپ اتقارعان ەڭبەكتەرى تۋرالى ايتىپ بەردى. پارتيزان-سەرىكتەستەرىنىڭ جازباشا مەمۋارلارى, سونداي-اق كۋاگەرلەردىڭ ۇرپاقتان ۇرپاققا جەتكىزگەن اڭگىمەلەرى, سونىڭ ىشىندە جارالانعان جاۋىنگەرگە قولداۋ كورسەتكەن قىز چەح كارولينانىڭ اڭگىمەلەرى «كاسسە سەبەرو» قازاقستاننان شىققانىن سەنىمدى تۇردە دالەلدەيدى. ءدىني قىزمەتكەر يوزەف ءميليچتىڭ قايتىس بولعانداردى تىركەۋ كىتابىندا جۇرگىزگەن جازباسىنا سايكەس «كاسسا سەبەرو» قازاقستاننىڭ وكتيابر اۋدانىنىڭ باعانات كولحوزىنان شىققان.
قازاقستان رەسپۋبليكاسىنىڭ سلوۆەنياداعى (قوسا اتقارۋشى) ەلشىسى قايرات سارىباي قاتىسۋشىلارعا قازاقستان-سلوۆەنيا اراسىنداعى قارقىندى دامىعان قارىم-قاتىناستارى تۋرالى ايتا وتىرىپ, ەسكە الۋ شارالارىن ۇيىمداستىرۋداعى ىنتىماقتاستىق ءۇشىن سلوۆەن سەرىكتەستەرىنە العىسىن ءبىلدىردى.
سونداي-اق, جيىندا رەسەيدىڭ سلوۆەنياداعى ەلشىسى د.زاۆگاەۆ, سەجانا كوممۋناسىنىڭ باسشىسى د.تەرچون جانە پوۆير ەلدى مەكەنىنىڭ باسشىسى ف.ۋرسيچ ءسوز سويلەدى. سلوۆەنياعا قر پارلامەنتى ءماجىلىسىنىڭ دەپۋتاتى, گەنەرال-لەيتەنانت ا.تاسبولاتوۆ, قر قورعانىس مينيسترلىگىنىڭ وفيتسەرلەرى, قر گفر-داعى اسكەري اتتاشەسى جانە ەۋروپاداعى جوعارى اسكەري وقۋ ورىندارىندا ءبىلىم الىپ جۇرگەن وفيتسەرلەرى بار وكىلەتتى دەلەگاتسيا جاۋىنگەر جادىنا تاعزىم ءبىلدىرۋ ءۇشىن كەلدى.
ەسكە الۋ شاراسى اياسىندا «جىراقتا جاتساڭ دا, وشپەس ەرلىگىڭ ەلىڭنىڭ جادىندا» دەگەن سوزدەر جازىلعان مەموريالدى تاقتا ورناتىلدى, سونداي-اق قازاقستاننىڭ ۇلتتىق پانتەونىنان الىنعان جەرى بار كاپسۋلا قويىلدى. جەرگىلىكتى تۇرعىندار جاۋىنگەردىڭ قابىرىنە گۇل شوعىرلارى مەن قازاقستاننان الدىرعان جەردى سالۋدا ەرەكشە جىلۋ مەن تولقۋدى تۋدىردى.
ءىس-شارا بارىسىندا قاتىسۋشىلارعا استانانىڭ 20 جىلدىعىنا ارنالعان فوتوكورمە, «جاۋ جۇرەك مىڭ بالا» ءفيلمى كورسەتىلدى. ءىس-شارا قر قۇرمەتتى كونسۋلدارى ديميتريا پيتسيگا (نوۆو-گوريتسا) مەن گوراز شيفرەر (ماريبور), سەجانا كوممۋناسىنىڭ ۇكىمەتى جانە قازاقستان-سلوۆەنيا بيزنەس كلۋبىنىڭ قولداۋىمەن ۇيىمداستىرىلدى.