جاسىنىڭ ۇلعايىپ قالعانىنا قاراماستان ليۋدميلا بۋتەنكو شۆەتسيادا وتكەن ەۋروپا چەمپيوناتىنان جەڭىسپەن ورالدى.
ول بايراقتى باسەكەدە ەلىمىزدىڭ ابىرويىن اسقاقتاتىپ, كەكۋشينكاي كاراتەدەن ۇيىمداستىرىلعان ءتۋرنيردىڭ كۋبوگىن يەلەندى.
ليۋدميلا بۋتەنكونىڭ كاراتەمەن اينالىسقانىنا 10 جىل. حالىقارالىق جارىسقا دەيىن ول ەلىمىزدە وتكەن رەسپۋبليكالىق تۋرنيردە توپ جارعان. 49 جاستاعى سپورتشى شۆەتسيادا وتكەن اقتىق بەلدەسۋدە قارا بەلدبەۋدىڭ يەسى ۋكراينالىق سپورتشىنى تىزە بۇكتىردى.
«دەنە شىنىقتىرۋ پانىنەن ساباق بەرەمىن. 14-ءشى ورتا مەكتەپتە شاكىرتتەرىمدى جاتتىقتىرامىن. 2016 جىلعى رەسپۋبليكالىق ءتۋرنيردىڭ قولا جۇلدەگەرىمىن», دەيدى ەۋروپا چەمپيونى. قازىرگى كەزدە پەتروپاۆلدا كاراتەمەن شۇعىلداناتىن ازاماتتاردىڭ قاتارى قالىڭ. 1200 سپورتشى بار.
«كەكۋشينكاي كاراتە جالپىقازاقستاندىق ۇيىمى» سقوف-نىڭ ديرەكتورى ۆلاديمير ۆيتچەنكونىڭ ايتۋىنشا, ەۋروپا چەمپيوناتىندا قازاقستان ۇلتتىق قۇراماسى 2-ءشى ورىندى يەلەنگەن. قىزىلجار وڭىرىنەن 3 سپورتشى ونەر كورسەتىپ, ليۋدميلا جەڭىستىڭ ەڭ بيىك تۇعىرىنا كوتەرىلگەن.
ول بۇگىندە رەسەيدە وتەتىن حالىقارالىق جارىسقا دايىندالىپ, كارى قۇرلىقتاعى جەڭىسىن قايتالاۋعا بەكىنىپ وتىر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى