ەلباسى نۇرسۇلتان نازارباەۆتىڭ قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋى قوستانايلىقتارعا ەرەكشە سەرپىن بەردى.
وبلىس اكىمدىگىندە بۇگىنگى ۋاقىت ءۇشىن وزەكتىلىگى اسا ماڭىزدى تاريحي قۇجاتتى تالقىلاۋعا ارنالعان اكتيۆ جينالىسىندا ءوڭىر باسشىسى ارحيمەد مۇحامبەتوۆ جولداۋ ەلباسى نۇرسۇلتان نازارباەۆتىڭ ەلىمىز تاۋەلسىزدىگىن العاننان بەرى جۇرگىزىپ كەلە جاتقان ەكونوميكالىق-الەۋمەتتىك ساياساتىنىڭ جالعاسى بولىپ تابىلاتىنىن ايتتى.
– پرەزيدەنت العا قويعان مىندەتتەردى سارالاي وتىرىپ, ءار سالا بويىنشا ناقتى جوسپارلار قۇرۋىمىز قاجەت. ال بۇل تاپسىرمالاردى ىسكە اسىرۋ ەلىمىز دامۋىنداعى تاعى ءبىر تاريحي كەزەڭ بولىپ تابىلادى, – دەدى ارحيمەد بەگەجان ۇلى.
ماجىلىستە ءسوز العان قازاقستاننىڭ ەڭبەك ەرى سايران بۇقانوۆ اگروونەركاسىپ كەشەنىنىڭ الەۋەتىن تولىق ىسكە اسىرۋداعى العا قويعان مىندەتتەردىڭ ماڭىزدىلىعىنا توقتالدى.
– ەلباسى جولداۋدا اگروونەركاسىپ كەشەنىندەگى ەڭبەك ونىمدىلىگىن جانە قايتا وڭدەلگەن اۋىلشارۋاشىلىق ءونىمىنىڭ ەكسپورتىن 2022 جىلعا دەيىن 2,5 ەسە كوبەيتۋ قاجەت ەكەنىن ايتتى. بۇل مىندەتتەر ۇدەسىنەن شىعۋ ءۇشىن اۋىل شارۋاشىلىعىندا قولعا الار, شەشىمىن كۇتكەن كوپ ءىس بار. ءبىز ەگىندى ءوسىرۋدى ۇيرەندىك. بىراق ەگىن زيانكەستەرىمەن كۇرەستى ءتيىمسىز جۇرگىزۋدەن, زاماناۋي تەحنيكالاردىڭ جەتكىلىكسىزدىگىنەن ءونىمدى جيناۋ مەرزىمىن سوزىپ الادى دا, شارۋاشىلىقتار 20-30 پروتسەنتكە دەيىن شىعىنعا ۇشىرايدى. سوندىقتان الداعى بەس جىلدا الىنعان تەحنيكاعا سۋبسيديانى 25 پروتسەنتتەن 50 پروتسەنتكە دەيىن ماقساتتى تۇردە ۇلعايتسا بۇل اگروونەركاسىپ كەشەنىنە وتە ءتيىمدى قولداۋ بولار ەدى, – دەدى سايران بالكەن ۇلى.
ەلباسى جولداۋدا «نۇرلى جەر», «7-20-25» باعدارلامالارىنىڭ جالعاسىن تابۋىن جانە تۇرعىن ءۇيدى ادامدارعا بارىنشا قولجەتىمدى ەتۋدى تاپسىرعانى بەلگىلى. قوستاناي وبلىسىندا 2018 جىلى «نۇرلى جەر» اياسىندا 290,9 مىڭ شارشى مەتر تۇرعىن ءۇي سالىنادى, بۇل وتكەن جىلعى وسى مەرزىممەن سالىستىرعاندا 10 پروتسەنتكە كوپ.
– حالىقتىڭ الەۋمەتتىك از قورعالعان بولىگى ءۇشىن جالعا بەرىلەتىن تۇرعىن ءۇي قۇرىلىسىنا قارجى مينيسترلىگى قوستاناي وبلىسىنا الدىن الا 2,6 ملرد تەڭگە ءبولۋدى قاراستىرىپ قويدى. بۇل جالعا بەرىلەتىن ءۇي قۇرىلىسىن الداعى جىلى ەكى ەسە وسىرۋگە مۇمكىندىك بەرەدى, ياعني باسپاناعا ءزارۋ 500 ادام پاتەرلى بولادى, – دەدى وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى نۇرلان قاتاربەكوۆ.
جولداۋدا ەلباسى جاستار ساياساتىنا جاڭا بەتبۇرىس بەردى. قوستانايدا جاستاردىڭ 77 ۇكىمەتتىك ەمەس ۇيىمى, 38 اسكەري-پاتريوتتىق كلۋبى جۇمىس ىستەيدى. يدەولوگيالىق اكتيۆتە الداعى ۋاقىتتا وبلىستاعى جاستاردىڭ بارلىق مەملەكەتتىك باعدارلامالار مەن جوبالارعا بەلسەنە قاتىسۋىن قامتاماسىز ەتۋ ءۇشىن جاستار ۇيىمدارىن قارجىلاندىرۋدى ارتتىرۋ كەرەكتىگى ايتىلدى.
وبلىس اكىمى ارحيمەد مۇحامبەتوۆ جينالىستى تۇجىرىمداي كەلە, الدىمەن وبلىستا اقپاراتتىق-ناسيحات توبىن قۇرىپ, اۋداندار مەن قالالارعا, بارلىق ەلدى مەكەندەرگە شىعىپ, جولداۋدا ايتىلعان ماسەلەلەردى حالىققا كەڭىنەن ءتۇسىندىرۋ كەرەكتىگىن تاپسىردى. سونىمەن قاتار قۇجاتتاعى ايتىلعان ماسەلەلەرگە وراي وبلىستا ءار سالا بويىنشا الداعى ۋاقىتتا اتقارىلار ىستەردى اتاپ ءوتتى.
ءنازيرا جارىمبەت,
«ەگەمەن قازاقستان»
قوستاناي