وڭىردە ارداگەرلەر, جاستار, ۇكىمەتتىك ەمەس ۇيىم وكىلدەرىنىڭ, اۋدان, قالا اكىمدەرىنىڭ, باسقارما, دەپارتامەنت باسشىلارىنىڭ, دەپۋتاتتاردىڭ, ەتنومادەني بىرلەستىك جەتەكشىلەرىنىڭ قاتىسۋىمەن «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋى جان-جاقتى تالقىلاندى. اكتيۆ جيىنىندا وبلىس اكىمى قۇمار اقساقالوۆ بايانداما جاساپ, سويلەۋشىلەر وي-پىكىرلەرىمەن ءبولىستى.
ايماق باسشىسى ستراتەگيالىق قۇجاتتا الەۋمەتتىك-ەكونوميكالىق ماسەلەلەر جان-جاقتى قامتىلعانىن, ەل تۇرعىندارىنىڭ ءومىر ساپاسىن جاقسارتۋ باستى باسىمدىق رەتىندە ايقىندالعانىن, العا قويعان مىندەتتەردى جۇزەگە اسىرۋعا بارلىق مۇمكىندىكتەر قاراستىرىلعانىن جەتكىزە كەلىپ, جەرگىلىكتى جەرلەردە اتقارىلاتىن شارالارعا توقتالدى. ەلباسى تاپسىرمالارىنىڭ ىشىندە جاھاندىق باسەكەلەستىككە قابىلەتتىلىكتى ودان ءارى قامتاماسىز ەتە وتىرىپ, ەكسپورتقا باعىتتالعان ەكونوميكانى قالىپتاستىرۋ وتە ماڭىزدى. بۇل ورايدا وبلىس اگروونەركاسىپ كەشەنىنىڭ الەۋەتىن تولىق ىسكە قوسۋدىڭ ءمانى زور. نەگىزگى مىندەت – ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2020 جىلعا قاراي 2,5 ەسە كوبەيتۋگە لايىقتى ۇلەس قوسۋ.
ءىرى سەرپىندى جوبالاردىڭ مەملەكەت تاراپىنان قولداۋ تابۋى ارقاسىندا اگرارشىلار وزىق تەحنولوگيالاردى كەڭىنەن قولدانىپ كەلەدى. بيىلعى كۇزگى وراق ناۋقانى ۇيىمشىلدىقپەن اتقارىلىپ, گەكتار بەرەكەلىگى 18 تسەنتنەردەن اينالدى. «بابىق-بۇرلىق», «زەنچەنكو جانە ك», «شاعالا-اگرو» سەكىلدى سەرىكتەستىكتەر ءار گەكتاردان 40-28 تسەنتنەر ءونىم جيناي ءبىلدى. استىق ءوندىرىسىن ءارتاراپتاندىرۋ, تسيفرلىق جۇيەنى ەنگىزۋ باعىتىندا ارنايى باعدارلامالار جۇمىس ىستەيدى.
بايانداماشى جەر قاتىناستارى سالاسىندا شەشىمىن تاباتىن ماسەلەلەرگە نازار اۋدارىپ, سوڭعى ءۇش جىلدا ماقساتسىز پايدالانىلعان 1,3 ميلليون گەكتار جەر تەلىمىنىڭ قايتارىلعانىن, ودان 1 ميلليون گەكتارى اۋىلشارۋاشىلىق اينالىمىنا قوسىلعانىن جەتكىزدى. وكىنىشتىسى سول, «بوگۆي», «ترانس اۆتو» سەكىلدى الپاۋىت كومپانيالاردىڭ الەۋمەتتىك جاۋاپكەرشىلىگىنىڭ تومەندەپ كەتكەنى سونشالىق, جىلدار بويى پاي ۇلەستەرىن بەرمەۋدى, جالاقى تولەمەۋدى ادەتكە اينالدىرعان. ونىمدىلىك كەمىپ كەتكەن. جۇمىسشى-قىزمەتكەرلەردىڭ ءومىر ءسۇرۋ دەڭگەيى ولاردى قىزىقتىرمايتىن سەكىلدى.
جولداۋ تالاپتارىنىڭ ءبىرى – شاعىن جانە ورتا بيزنەسكە, ەكسپورتتاۋشىلارعا قولداۋ كورسەتۋ, قايتا وڭدەۋ سەكتورىنا باسىمدىق بەرۋ, حالىق تۇتىناتىن تاۋارلاردىڭ اۋقىمىن كوبەيتۋ, ىشكى نارىقتى وتاندىق ونىمدەرمەن تولىقتىرۋ ەكەنىن اتاپ كورسەتكەن بايانداماشى بۇل باعىتتار بويىنشا اتقارىلاتىن ىستەردىڭ جاي-جاپسارىن اڭگىمەلەدى.
بيىل 3400 باس سيىرعا لايىقتالعان 8 ميلليارد تەڭگەنىڭ 7 جوباسى ىسكە قوسىلادى. سوندا جىلىنا 17 مىڭ توننا ءسۇت وندىرۋگە قوسىمشا مۇمكىندىك بەرەدى. ەكى ەت وڭدەيتىن كەشەن, قۇس فابريكاسى پايدالانۋعا بەرىلەدى. 8 ايدا 70 ميلليارد تەڭگەنىڭ اۋىلشارۋاشىلىق ونىمدەرى تەرەڭدەتىپ وڭدەلدى. ەكسپورت 1,2 ەسەگە ۇلعايىپ, يمپورت 10,3 پروتسەنتكە ازايعان.
جيىنعا قاتىسۋشىلار جەرگىلىكتى بيۋدجەت ەسەبىنەن جەڭىلدەتىلگەن يپوتەكا بويىنشا العاشقى جارنانى سۋبسيديالاۋعا 200 ميلليون تەڭگە بولىنەتىنى, ءبىرىنشى كەزەكتە بيۋدجەت سالاسى قىزمەتكەرلەرى قامتىلاتىنى تۋرالى جاڭالىقتى قۋانىشپەن قابىلدادى. مۇنىڭ ءوزى «7-20-25» تۇرعىن ءۇي باعدارلاماسىنا قاتىسۋشىلار ءۇشىن قولجەتىمدىلىكتى ارتتىرا تۇسەرى ءسوزسىز. القالى باسقوسۋدا 43 مىڭ سولتۇستىكقازاقستاندىقتىڭ, ونىڭ ىشىندە 300 ۋچاسكەلىك دارىگەر مەن 750 مەيىربيكەنىڭ جالاقىسى وسەتىنى, وبلىس ورتالىعىندا 1500 ورىندىق 2 ءبىلىم ءۇيى سالىنىپ جاتقانى, 120 مەكتەپتىڭ جوندەلەتىنى, 4 مىڭ كومپيۋتەر ورناتىلاتىنى ايتىلدى. سونىمەن قاتار كەلەسى جىلى 1500 پاتەرلىك 12 كوپ قاباتتى تۇرعىن ءۇي بوي كوتەرەتىنى, مەديتسينا مەكەمەلەرىنە 2,8 ميلليارد تەڭگەنىڭ جاڭا قوندىرعىلارى ساتىپ الىناتىنى, ورتالىق سۋ جۇيەسىنە 29 ەلدى مەكەننىڭ قوسىلاتىنى, مۇنىڭ ءبارى تۇرعىنداردىڭ ساپالى ءومىر ءسۇرۋ دەڭگەيىنە قولايلى جاعدايلار جاسايتىنى دا اتالىپ ءوتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى