اقتاۋدا وبلىس اكتيۆىنىڭ جينالىسى ءوتىپ, جيىن بارىسىندا پرەزيدەنت نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جاڭا جولداۋىندا ايتىلعان ماقساتتار مەن مىندەتتەرگە قول جەتكىزۋگە قاجەتتى شارالار ايقىندالدى.
وبلىس اكىمى ەرالى توعجانوۆ جولداۋداعى ءبىرىنشى باسىمدىق حالىق تابىسىنىڭ ءوسۋى ەكەنىن اتاپ ءوتتى. 28 مىڭ بيۋدجەت قىزمەتكەرىنىڭ ەڭبەكاقىسى ورتا ەسەپپەن 35% - كە وسەدى. سونىمەن قاتار مۇمكىندىگى شەكتەۋلى 25 000 ادام ءۇشىن تولەم مولشەرى ۇلعايتىلاتىن بولادى. سوندىقتان ءوڭىر باسشىسى بارلىق بيۋدجەتتىك مەكەمەلەرگە, جالاقىنى كوتەرۋ تۋرالى ەسەپتى ەكونوميكا جانە بيۋدجەتتىك جوسپارلاۋ باسقارماسىنا دەرەۋ ۇسىنۋدى, سونداي-اق باسەكەلەستىكتى دامىتۋ جانە مونوپوليستىك كومپانيالاردىڭ تاريفتەرىن رەتتەۋ ماسەلەسى بويىنشا مونوپوليستەر مەن پيك-كە تەكسەرۋ جۇرگىزۋدى تاپسىردى.
– ەلباسى شاعىن جانە ورتا بيزنەس ءۇشىن سالىق امنيستياسىن جۇرگىزۋگە تاپسىرما بەردى. بۇل – وسىماقىلار مەن ايىپپۇلداردى ەسەپتەن شىعارۋ دەگەن ءسوز. تەك ادال سالىق تولەۋشىلەر ءۇشىن امنيستيا جاريالانادى. مەملەكەتتىك كىرىستەر دەپارتامەنتىنىڭ دەرەكتەرى بويىنشا, شامامەن 600 شاعىن جانە ورتا بيزنەس سۋبەكتىسى امنيستيانى قولدانا الادى, – دەدى ە.توعجانوۆ.
اگروونەركاسىپتىك سەكتوردى دامىتۋعا مەملەكەت بولگەن قاراجات ءبىرىنشى كەزەكتە ءوڭىردى جەرگىلىكتى اۋىل شارۋاشىلىعى ونىمدەرىمەن قامتاماسىز ەتۋ كورسەتكىشىن ارتتىرۋعا جول اشپاق. بۇل ءۇشىن ايماقتاعى اۋىل شارۋاشىلىعى باسقارماسى قاجەتتى قاراجاتتى وبلىسقا ءبولۋ بويىنشا مينيسترلىكپەن ءتيىستى جۇمىستار جۇرگىزۋى قاجەت.
مەملەكەت باسشىسى يننوۆاتسيانى دامىتۋعا ەرەكشە نازار اۋدارۋدى تاپسىرعان بولاتىن. ياعني, ەڭ الدىمەن بالامالى ەنەرگەتيكانى, جاڭا ماتەريالداردى, بيومەديتسينانى جانە باسقا دا باعىتتاردى ىلگەرىلەتۋدى قامتاماسىز ەتۋ قاجەت. بۇل باعىتتا ايماقتا باتىر اۋىلىندا قۋاتى 2 مۆت كۇن ەلەكتر ستانساسى پايدالانۋعا بەرىلىپ, ماڭعىستاۋ جانە تۇپقاراعان اۋداندارىندا جەل جانە كۇن ەلەكتر ستانسالارىنىڭ قۇرىلىسى جۇرگىزىلۋدە. سونداي-اق مۇناي كومپانيالارى يننوۆاتسيالىق جوبالار بويىنشا ۇلكەن جۇمىستاردى قولعا الۋدا.
ايماق باسشىسىنىڭ ايتۋىنشا, ماڭعىستاۋ وبلىسى «7-20-25» باعدارلاماسىمەن قولدانىسقا بەرىلگەن پاتەرلەر بويىنشا كوش باسىندا.
وبلىستا 3 جاستان 6 جاسقا دەيىنگى بالالاردى مەكتەپكە دەيىنگى بىلىممەن قامتۋ 93,7% (2017 جىلى 93,1%) قۇرايدى. جىل باسىنان 919 ورىندىق 10 بالاباقشا پايدالانۋعا بەرىلدى. جىل سوڭىنا دەيىن تاعى 23 نىسان پايدالانۋعا بەرىلەدى. ناتيجەسىندە كورسەتكىش 97,1%-كە جەتپەك. سونداي-اق مەديتسينالىق قىزمەت كورسەتۋ ساپاسىن ارتتىرۋ ماسەلەسىن شەشۋ ءۇشىن وڭىردە 1219 مەديتسينا قىزمەتكەرى جالاقىعا ۇستەماقى الادى. مەديتسينا سالاسىن تسيفرلاندىرۋعا دا ەرەكشە كوڭىل بولىنۋدە.
بۇگىندە ماڭعىستاۋ حالقىنىڭ بۇقارالىق سپورت تۇرلەرىمەن جانە دەنە شىنىقتىرۋىمەن قامتىلۋى 29,6%-ءتى قۇرايدى, بۇل سوڭعى 3 جىلمەن سالىستىرعاندا 8 ەسەگە كوپ.
– مەملەكەت باسشىسىنىڭ تاپسىرماسىنا سايكەس ءبىز ايماقتىق دەڭگەيدە رەزەرۆتەر تاۋىپ, وبلىس تۇرعىندارى ءۇشىن سپورتتى قولجەتىمدى ەتۋگە ءتيىسپىز. سونداي-اق سوڭعى جىلدا 20-دان استام سپورت الاڭى مەن 11 ءىرى سپورت نىسانى جەكە ينۆەستورلار ەسەبىنەن سالىندى. بيىل اقتاۋ قالاسىندا مۇز ايدىنىنىڭ, بوكس ورتالىعىنىڭ, بەينەۋ, ماڭعىستاۋ جانە سەنەك اۋىلدارىندا سپورت كەشەندەرىنىڭ قۇرىلىسى باستالدى. بيىلعى جىلى ماڭعىستاۋدا فۋتبولدى دامىتۋ ماقساتىندا جاڭا فۋتبول الاڭى سالىنىپ, «مۇنايشى» ستاديونى قايتا جوندەۋدەن ءوتتى, – دەدى ءوڭىر باسشىسى.
ءومىر ءسۇرۋدىڭ قولايلى ورتاسىن قۇرۋ ماسەلەسى بويىنشا پرەزيدەنت حالىققا جولداۋىندا وڭىرلىك جانە قالالىق ينفراقۇرىلىمدى دامىتۋعا ەرەكشە نازار اۋداردى. وسىلايشا, جىل سوڭىنا قاراي ماڭعىستاۋ اۋىلدىق ەلدى مەكەندەرىنىڭ 69%-ءى نەمەسە اۋىل حالقىنىڭ 89%-ءى ورتالىقتاندىرىلعان اۋىز سۋمەن قامتاماسىز ەتىلەدى. قازىرگى ۋاقىتتا اۋدانارالىق جولداردىڭ كوپشىلىگىنىڭ جاعدايى جاقسى, سوندىقتان اۋىلىشىلىك جولداردىڭ قۇرىلىسىنا قاراجات بولىنەتىن بولادى.
ەلباسى جولداۋىن ىسكە اسىرۋدىڭ باسقا دا اسپەكتىلەرىن قولدانۋ تۋرالى ويلارىمەن قوعام بەلسەندىلەرى ءبولىستى. تۋريستىك كلاستەردىڭ وكىلى, دەمالىس بازاسىنىڭ ديرەكتورى ۇ.احمەتوۆا «بيىلعى جازدا ماڭعىستاۋعا ساپارى كەزىندە, پرەزيدەنت اقتاۋ قالاسى تۇرىك انتالياسىنا بالاما بولۋى ءتيىس دەگەن تاپسىرما بەردى. بۇگىندە ۇكىمەت دەڭگەيىندە «كاسپي تەڭىزى جاعالاۋىنداعى تەڭىز كۋرورتىن دامىتۋ جونىندەگى جول كارتاسى» قابىلداندى, ونىڭ نەگىزگى باعىتى اقتاۋ قالاسىنان قۇرىق كەنتىنە دەيىنگى جاعاجاي ايماعىنىڭ ينجەنەرلىك ينفراقۇرىلىمىن سالۋ», دەپ اتاپ ءوتتى.
باسقوسۋدا «اقتاۋ – تازا قالا» جشس ديرەكتورى س.پارفەنوۆ, اقتاۋ قالاسىنداعى نازارباەۆ زياتكەرلىك مەكتەپتەرى پەداگوگيكالىق شەبەرلىك ورتالىعىنىڭ ديرەكتورى ق.بورانباەۆا, ءبىلىم سالاسىنىڭ ارداگەرى ت.تۇرعامباەۆ, وزگە دە بىرقاتار ازاماتتار پىكىر ءبىلدىرىپ, جولداۋدى ءار سالادا جۇزەگە اسىرۋ بويىنشا وي-پىكىرلەرىن ورتاعا سالدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى