تاياۋدا سان-فرانتسيسكو قالاسىنىڭ زاماناۋي سۋپەرماركەتتەرىنىڭ بىرىندە قىزىق تاجىريبە جۇرگىزىلدى. ولار مەنىڭ دۇكەندەگى بۇكىل ارەكەتىمدى, ياعني چەددار ءتاتتى جۇگەرىسىن ساتىپ الاتىنىمدى نە ۇرلايتىنىمدى انىقتاپ كورۋگە تالپىندى. تاجىريبەگە مەن دە قىزىقتىم.
دۇكەندە ورناتىلعان 27 كامەرا مەنىڭ ءاربىر ارەكەتىمدى دەرەك رەتىندە تىركەپ وتىرادى. ال زەرتتەۋشىلەر مەنىڭ ويىمنان حابارسىز.
وتكەن ايدا سان-فرانتسيسكودا العاش رەت Standard Market دەپ اتالاتىن ساتۋشىسىز, اۆتوماتتى دۇكەن اشىلدى. ارنايى ءموبيلدى باعدارلامانى جۇكتەپ العان ساتىپ الۋشىلار اۋماعى 176 شارشى مەتر بولاتىن دۇكەننەن قالاعان زاتىن تاڭداپ الادى. وندا شىعار ەسىكتە تەكسەرۋدىڭ جانە تاۋاردى كاسسادان وتكىزۋدىڭ قاجەتى جوق. كامەرالار ساتىپ الۋشى مەن تاۋاردى انىقتاپ, كىمنىڭ نە العانىن تىركەپ وتىرادى. جالپى جوباسى وسى.
مۇنداي جوباعا 2017 جىلى باستالعان Standard Cognition ستارتاپى نەگىز بولدى. مۇنداعى ماقسات – 2020 جىلعا قاراي كۇن سايىن 100 دۇكەنگە وسى جۇيەنى ەنگىزىپ وتىرۋ.
باعدارلامانىڭ نەگىزىن سالۋشى جەتى ماماننىڭ بەسەۋى – اقش قۇندى قاعازدار جانە بيرجا كوميسسياسىنىڭ وكىلى. تاياۋدا ولار قارجىلىق الاياقتىق پەن ساۋدا قۇقىعىن بۇزۋدى انىقتايتىن, جاساندى ينتەللەكتىمەن جۇمىس ىستەيتىن باعدارلاما جاساپ شىعاردى. قازىر اتالعان ماماندار سول سەكىلدى كۇردەلى ماسەلەنى انىقتاپ كورمەك: مەن ءتاتتى جۇگەرىنى ۇرلايمىن با؟
قاڭتاردا Amazon سيەتلدە ءوزىنىڭ العاشقى ساتۋشىسىز دۇكەنىن ىسكە قوستى. سودان بەرى ەلدە بىرنەشە وسىنداي دۇكەن اشىلدى. قىتايدا ساتۋشىسىز سۋپەرماركەتتەرگە جۇرگىزىلگەن تاجىريبە جەتەرلىك.
الايدا Standard Cognition-نىڭ باعىتى ءسال وزگەشە. ول نەگىزىنەن توبەگە قويىلعان كامەرالار مەن جاساندى ينتەللەكتىگە نەگىزدەلگەن ءموبيلدى باعدارلاماعا سۇيەنەدى. ول مەنىڭ كىدىرگەنىمدى, شوكولاد العانىمدى, نە ورنىنا قايتا قويعانىمدى ءبىلىپ وتىرادى. سونداي-اق دەنەم كەپتىرىلگەن مانگوعا, ال بەتىم ءتاتتى جۇگەرىگە قاراپ تۇرعانىنان دا حاباردار. ءتىپتى ۇرلىق جاساۋ نيەتىمدى دە بىلەدى (نەمەسە انىقتاۋعا تالپىنادى).
ء«بىز ادامداردىڭ ارەكەتى قانداي بولاتىنىن ۇيرەنىپ كەلەمىز. ەگەر ولار ۇرلاۋدى جوسپارلاسا, تەز-تەز ادىمداپ, ەسىككە قاراعىشتاي بەرەدى», دەيدى جوبانىڭ نەگىزىن سالۋشى مايكل سۋسۆال. جۇيە ىقتيمال ۇرىنى انىقتاعان كەزدە دۇكەن قىزمەتكەرىنە حابارلاما كەلىپ تۇسەدى. سودان كەيىن ونىمەن جەكە اڭگىمە جۇرگىزىلمەك.
ۇرىنى انىقتاۋ ساتىپ الۋشىلار تۋرالى وتە كوپ دەرەكتى تالاپ ەتەدى جانە ونداي مالىمەتتىڭ باسىم بولىگى ازىرگە قولدا جوق. سوندىقتان Standard Market اشىلعاننان بىرنەشە كۇن بۇرىن Standard Cognition 100 ادامعا دۇكەندە 4 ساعات ساۋدا جاساۋعا ءوتىنىش جاسادى. جاپونيادا كوماندا دەرەكتەر جيناۋ ماقساتىندا دۇكەندەر جەلىسىمەن جۇمىس ىستەگەن-ءدى. Standard Cognition-ءنىڭ ايتۋىنشا, ولار بيومەتريكالىق اقپارات جينامايدى. ويتكەنى بۇل جەكە ءومىر قۇپياسىن بۇزۋى مۇمكىن.
وتكەن جۇمادا دۇكەنگە كەلىپ, وسىندا ەكەنىمدى ءبىلدىرۋ ءۇشىن تەلەفونىمداعى ارنايى باعدارلامانى اشتىم. كەرەك زاتتاردى الىپ, شىعىپ كەتتىم.
سىرتتا ماعان سۋسۆال مىرزا كەزىكتى. تەلەفونىما ەسكەرتۋ كەلىپ تۇر ەكەن: ءبىر چەددار ءتاتتى جۇگەرىسى مەن ءبىر اجەتحانا قاعازىنىڭ جالپى قۇنى – 1,19 دوللار.
نەگىزىندە مەن ەكى قالتا ءتاتتى جۇگەرى العان ەدىم. اۋەلى ەكىنشى قالتانى الىپ, ءارلى-بەرلى ويلانىپ, قايتادان ورنىنا قويدىم. كەيىننەن جىلدامدىقپەن زىپ ەتكىزىپ قالتاما تىعىپ جىبەردىم. جۇيە مۇنى بايقاعان جوق.
«مۇنداي بولماۋى ءتيىس ەدى», دەدى سۋسۆال. ايتسە دە, جۇيە قاتەلەستى. ول يىعىن كوتەرىپ, جەڭىسكە جەتكەنىمدى ايتتى. سوندىقتان ءتاتتى جۇگەرى ماعان بۇيىردى.
كەلەشەكتە Standard Cognition مەن باسقا كومپانيالار تاۋاردىڭ قايدا ەكەنىن انىقتاۋدىڭ ءتيىمدى ءادىسىن ويلاپ تاباتىن شىعار. بىراق قازىرگى جۇيە ءالى تولىققاندى ەمەس. ال مەن تاتتىگە قارىق بولدىم.
© 2018 The New York Times News Service
ماقالانى اۋدارعان اباي اسانكەلدى ۇلى,
«ەگەمەن قازاقستان»