تۇڭعىش پرەزيدەنتىمىزدىڭ بيىلعى قازاقستان حالقىنا ارناعان جولداۋىن قاراعاندى قالاسىنداعى №4 ەمحانانىڭ ۇجىمىمەن بىرگە مەن دە دەن قويىپ تىڭدادىم. البەتتە, ماعان ەلباسىنىڭ دەنساۋلىق ساقتاۋ سالاسىنا قاتىستى ايتقان سوزدەرى ايرىقشا اسەر ەتتى. ءوز باسىم مۇنى مەديتسينا قىزمەتكەرلەرىنە كورسەتىلگەن قولداۋ, سونىمەن بىرگە ارتار جاۋاپكەرشىلىگى مول قادام دەپ قابىلدادىم.
پرەزيدەنت جولداۋدا «2019 جىلدىڭ 1 قاڭتارىنان باستاپ بارلىق ەمحانالار مەن اۋرۋحانالار مەديتسينالىق قۇجاتتاردى قاعازسىز, تسيفرلى نۇسقادا جۇرگىزۋگە كوشۋگە ءتيىس. بۇل 2020 جىلعا قاراي بۇكىل تۇرعىنداردىڭ ەلەكتروندى دەنساۋلىق پاسپورتتارىن جاساۋعا, كەزەكتەردى, بيۋروكراتيانى جويۋعا, قىزمەت كورسەتۋ ساپاسىن ارتتىرۋعا مۇمكىندىك بەرەدى», دەدى.
جالپى, قاراعاندى وبلىسىندا تسيفرلاندىرۋ جۇمىستارى وسىدان ەكى جىل بۇرىن قاناتقاقتى نۇسقا رەتىندە قولعا الىنا باستاعانىن ماقتانىشپەن ايتقىم كەلەدى. تسيفرلاندىرۋدىڭ ءبىر جاقسى جەرى, ناۋقاس الدىڭىزعا كەلگەندە, ول تۋرالى دەرەكتىڭ بارلىعى دا كوز الدىڭىزدا سايراپ تۇرادى. مۇنىڭ ءوزى ناۋقاسقا كورسەتىلەر قاجەتتى ەم-دومدى ۋاقىتتى سوزىپ الماي, دەر كەزىندە ساپالى تۇردە جاساۋعا سەپتىگىن تيگىزەدى. مىسالى, بۇرىن ءبىر ناۋقاسقا دارىگەر جارتى ساعات ۋاقىتىن جۇمساسا, قازىر ەم-دوم كورسەتۋدىڭ ۋاقىتى ەكى ەسەگە قىسقاردى. سونىمەن قاتار ناۋقاس تۋرالى دەرەكتەر ءبىر بازاعا ەنگىزىلىپ, ورتالىقتاندىرىلعان. مىسالى, بىزگە قارالىپ جۇرگەن ناۋقاس باسقا قالادا ىسساپارمەن ءجۇرىپ ەم قابىلدايتىن بولسا, ونىڭ ەگجەي-تەگجەيىنەن ءبىز ورتالىقتاندىرىلعان جۇيە ارقىلى سول زاماتتا حاباردار بولىپ وتىرامىز.
مەنىڭ ءوزىم قازىرگى ۋاقىتتا قاراعاندى قالاسىنداعى №4 ەمحانادا وفتالمولوگ, ياعني كوز دارىگەرى بولىپ جۇمىس ىستەيمىن. بالالار مەن ەرەسەكتەردى قاتار ەمدەيمىن, بۇعان رۇقسات بەرەتىن ارنايى سەرتيفيكاتىم بار. بۇگىنگى ۋاقىتتا ءبىزدىڭ ەمحانادا بيۋروكراتيالىق كەدەرگىلەردى جويۋ, سىبايلاس جەمقورلىقتىڭ الدىن الۋ سياقتى ماڭىزدى شارالار بويىنشا جۇمىستار بەلسەندى تۇردە جۇرگىزىلىپ جاتىر. ماسەلەن, دارىگەرلەردىڭ بولمەسى دىبىس جازۋ, بەينەتاسپاعا ءتۇسىرۋ قۇرالدارىمەن جابدىقتالعان. ياعني, ناۋقاس پەن دارىگەر اراسىنداعى اڭگىمە اشىق فورماتتا جۇرگىزىلەدى. سونىمەن قاتار سايتىمىز تۇراقتى جۇمىس ىستەيدى, الەۋمەتتىك جەلىلەردى دە بەلسەندى تۇردە قولدانامىز. ءبارى دە اشىق تۇردە: كەز كەلگەن ناۋقاس دارىگەردىڭ قىزمەتىنە كوڭىلى تولماسا, ارىز-شاعىمىن ينتەرنەت جەلىسى ارقىلى جوعارى جاققا كەدەرگىسىز جەتكىزە الادى. جاسىراتىنى جوق, مۇنىڭ ءوزى ءبىزدىڭ جۇمىسىمىزعا جاۋاپكەرشىلىكپەن قاراپ, جيناقى جۇرۋىمىزگە, بىلىكتىلىگىمىزدى ۇنەمى جەتىلدىرىپ, قىزمەت ساپاسىن ارتتىرىپ وتىرۋىمىزعا وتە قاتتى ىقپال ەتەدى.
نەگىزى, پرەزيدەنت جولداۋىنداعى 2019 جىلدىڭ 1 قاڭتارىنان باستاپ مەديتسينا قىزمەتكەرلەرىنىڭ ەڭبەكاقىسىن كوتەرۋ جونىندەگى مالىمدەمەنى قۋانا قابىلداعانىمىزدى جاسىرمايمىز. دەگەنمەن, ءبىز ءۇشىن الدىمىزعا كومەك سۇراپ كەلگەن ناۋقاستاردىڭ, جالپى تۇرعىنداردىڭ دەنساۋلىعى ەڭ ءبىرىنشى كەزەكتە ماڭىزدى ەكەندىگىن باسا ايتقىم كەلەدى.
ايدوس وماروۆ,
№4 قالالىق ەمحانانىڭ وفتالمولوگ دارىگەرى
قاراعاندى